Read Twi Asante Luka 17 Bible Online

Luka 17 - Twi Asante bible

Luka 17

¹Na ɔka kyerɛɛ n’asuafoɔ no sɛ: Ɛdane sɛ deɛn ara a, suntiduatoɔ bɛba deɛ, nanso deɛ ɛnam ne so bɛba no nnue!

² Anka ɛyɛ ma no sɛ wɔde ayuyammoɔ kyekyere ne kɔn mu kɔto no twene ɛpo mu sene sɛ ɔbɛto nketewa yi mu baako suntidua.

³ Monhwɛ mo ho yie! Na sɛ wo nua fom a, ka n’anim; na sɛ ɔsakyera n’adwene a, fa kyɛ no!

⁴ Na sɛ ɔfom wo mprɛnson da koro, na ɔsane ba wo nkyɛn mprɛnson ka sɛ: Masakyera m’adwene a, fa kyɛ no!

⁵ Na asomafoɔ no see Awurade sɛ: To yɛn gyidie mu!

⁶ Na Awurade se: Sɛ mowɔ gyidie sɛ sinapi fua a, anka mobɛka akyerɛ akyee yi sɛ: Wo nhini ntutu na kɔtim ɛpo mu! Na ɛbɛtie mo.

⁷Mo mu hwan na ɔwɔ akoa a ɔfuntum asase anaasɛ ɔhwɛ mmoa, na ɔfiri afuom ba fie a, ɔbɛse no sɛ: Bɛsene ntɛm kɔtena adidiiɛ?

⁸Na ɔrense no sɛ: Siesie deɛ mɛdie, na bɔ abɔsoɔ bɛsom me, na mennidi na mennom ansa, na akyire yi no, wo nso woakɔdidi na woanom?

⁹Ɔbɛda akoa no ase sɛ wayɛ deɛ wɔahyɛ no no?

¹⁰Saa ara na mo nso sɛ moyɛ deɛ wɔahyɛ mo nyinaa a, monka sɛ: Yɛyɛ nkoa a mfasoɔ nni yɛn so; yɛayɛ deɛ ɛsɛ sɛ yɛyɛ.

¹¹ Na ɛbaa sɛ ɔrekɔ Yerusalem no, ɔfaa Samaria ne Galilea.

¹² Na ɔrekɔ akuraa bi aseɛ no, mmarima du bi a wɔyɛ akwatafoɔ hyiaa no a wɔgyinagyina akyirikyiri,

¹³na wɔmaa wɔn nne so sɛ: Owura Yesu, hu yɛn mmɔbɔ!

¹⁴ Na ɔhunuu wɔn no, ɔsee wɔn sɛ: Monkɔ mfa mo ho nkɔkyerɛ asɔfoɔ. Na ɛbaa sɛ wɔrekorɔ no, wɔn ho fiiɛ.

¹⁵Na wɔn mu baako hunuu sɛ ne ho asan no no, ɔsanee n’akyi de nne kɛseɛ bɛyii Onyankopɔn ayɛ,

¹⁶na ɔde n’anim butuu fam wɔ ne nan ase daa no ase. Ɔno deɛ, na ɔyɛ Samariani.

¹⁷Na Yesu buaa sɛ: Ɛnyɛ du no na wɔn ho fiiɛ? Na baakron no deɛ, wɔwɔ he?

¹⁸Wɔanhunu wɔn mu biara a ɔsane de animuonyam brɛɛ Onyankopɔn sɛ ɔnanani yi nko?

¹⁹ Na ɔsee no sɛ: Sɔre kɔ, wo gyidie agye wo.

²⁰ Na Farisifoɔ no bisaa no sɛ da bɛn na Nyankopɔn ahennie bɛba no, ɔbuaa wɔn sɛ: Nyankopɔn ahennie mma sɛ ani tua,

²¹ nanso wɔrenka sɛ: Hwɛ ha anaa ɛhɔ! Na hwɛ, Nyankopɔn ahennie no, mo mu na ɛwɔ.

²²Na ɔka kyerɛɛ asuafoɔ no sɛ: Nna bi bɛba a mobɛpɛ sɛ mobɛhunu Onipa Ba no nna no mu baako, na morenhunu.

²³ Na wɔbɛse mo sɛ: Hwɛ ha! anaa: Hwɛ hɔ! a, monnkɔ, nso monnni wɔn akyi!

²⁴ Na sɛdeɛ anyinam a ɛpa te ɔsoro ase fa hyerɛn kɔ ɔsoro ase, fa baabi no, saa ara nso na Onipa Ba no bɛyɛ ne da no mu.

²⁵ Nanso ɛtwa sɛ ɔbɛhunu amane pii na nnɛ mma yi po no ansa.

²⁶ Na sɛdeɛ ɛyɛɛ Noa nna no mu no, saa ara nso na ɛbɛyɛ Onipa Ba no nna mu.

²⁷ Wɔdidii, wɔnomee, wɔwaree yerenom na wɔmaa awadeɛ de kɔsii da a Noa hyɛnee adaka no mu, na nsuyire no baeɛ, na ɛbɛsɛee wɔn nyinaa.

²⁸Sɛ nso ɛyɛɛ Lot nna mu ne no, wɔdidii, na wɔnomee, wɔtɔe, wɔtɔnee, wɔduae, na wɔtotoo adan.

²⁹ Na da a Lot firii Sodom kɔeɛ no, ogya ne sɔfe firi soro tɔeɛ, na ɛbɛsɛee wɔn nyinaa.

³⁰Saa ara na ɛbɛyɛ ɛda a Onipa Ba no bɛyi ne ho adie no.

³¹ Da no ara, deɛ ɔwɔ ɛdan atifi na ne biribi wɔ ɛdan mu no, mma no nnsiane mmmɛfa; na deɛ ɔwɔ afuo mu no nso, mma no nnsane n’akyi.

³² Monkae Lot yere no!

³³ Obiara a ɔbɛhwehwɛ sɛ ɔgye ne kra no, ɛbɛfiri ne nsa, na obiara a ne kra bɛfiri ne nsa no ɔbɛgye no nkwa.

³⁴Mese mo sɛ: Anadwo no, nnipa baanu bɛda mpa korɔ so; wɔbɛfa ɔbaako, na wɔagya ɔbaako.

³⁵ Mmaa baanu bɛbom ayam ayuo; wɔbɛfa ɔbaako, na wɔagya ɔbaako.

³⁶[Mmarima baanu bɛtena afuom; wɔbɛfa ɔbaako, na wɔagya ɔbaako.][7]

³⁷ Na wɔbua see no sɛ: Ɛhe, Awurade? Na ɔsee wɔn sɛ: Deɛ efunu wɔ no, ɛhɔ na apɛtɛ bɛboaboa wɔn ano.