Read Twi Asante Luka 18 Bible Online

Luka 18 - Twi Asante bible

Luka 18

¹ Na ɔbuu wɔn bɛ bi de kyerɛɛ sɛ ɛtwa sɛ nnipa bɔ mpaeɛ daa a wɔmmrɛ ho:

²Ɔtemmufoɔ bi tenaa kuro bi mu a ɔnsuro Onyankopɔn, nanso ɔmfɛre nnipa.

³Na okunafoɔ bi nso tenaa kuro no mu, na ɔbaa ne nkyɛn sɛ: Bu atɛn gye me me tamfo nsam!

⁴Na wampene maa no kyɛree kakra. Na akyire yi ɔkaa ne tirim sɛ: Mensuro Onyankopɔn na memfɛre nnipa deɛ,

⁵ nanso okunafoɔ yi ha me nti, mɛbu atɛn mama no, na wamfa ne ba a ɔba ha daa no ammɛdwan me ho.

⁶Na Awurade se: Montie deɛ ɔtemmufoɔ a ɔntene yi ka!

⁷Na Onyankopɔn, sɛ ɔto ne bo ase kyɛre wɔn ho nso a, ɔremmu atɛn nnye wɔn a wayi wɔn a wɔsu frɛ no awia ne anadwo no anaa?

⁸Mese mo sɛ, ɔbɛbu atɛn agye wɔn ntɛm. Nanso Onipa Ba no ba a, anka ɔbɛhunu gyidie asase so?

⁹Na ɔbuu binom a wɔde wɔn ho too wɔn ho soɔ sɛ wɔtene na wɔmmu wɔn a aka no bɛ yi sɛ:

¹⁰Nnipa baanu kɔɔ asɔrefie mpaebɔ; ɔbaako yɛ Farisini, na ɔbaako yɛ ɔtogyeni.

¹¹ Farisini no gyinae, na ɔbɔɔ mpaeɛ ne tirim sɛ: Onyankopɔn, meda wo ase sɛ mente sɛdeɛ nnipa a aka no teɛ: Amimfoɔ, nkontompofoɔ, ayerefafoɔ anaa ɔtogyeni yi mpo.

¹² Medi mmuada dapɛn mu mprenu, mede deɛ menya nyinaa so ntotosoɔ du du mema.

¹³ Na ɔtogyeni no deɛ, ɔgyinaa akyirikyiri, na wampɛ sɛ ɔma n’ani so kyerɛ soro mpo, na mmom ɔbɔɔ ne koko so kaa sɛ: Onyankopɔn, hu me debɔneyɛni mmɔbɔ!

¹⁴ Mese mo sɛ: Oyi de bem sane kɔɔ ne fie mmom sene ɔbaako no; na obiara a ɔma ne ho soɔ no, wɔbɛbrɛ no ase, na deɛ ɔbrɛ ne ho aseɛ no, wɔbɛma no so.

¹⁵Na wɔde nkɔkoaa nso brɛɛ no sɛ ɔmfa ne nsa nka wɔn; na asuafoɔ no hunuiɛ no, wɔkaa wɔn anim.

¹⁶Na Yesu frɛɛ mmɔfra no bae, see asuafoɔ no sɛ: Momma mmɔfra no mmra me nkyɛn, na monnsi wɔn kwan! Na yeinom sɛɛ na Nyankopɔn ahennie no wɔ wɔn.

¹⁷ Nokorɛ mese mo sɛ, obiara a ɔrennye Nyankopɔn ahennie sɛ abɔfra no, ɔrenkɔ mu koraa.

¹⁸Na ɔpanin bi bisaa no sɛ: Kyerɛkyerɛfoɔ pa, ɛdeɛn na menyɛ na manya daa nkwa?

¹⁹Na Yesu see no sɛ: Adɛn na wofrɛ me papa? Obiara nyɛ papa gye ɔbaako, ɔne Onyankopɔn.

²⁰ Wonim mmara nsɛm no: Nsɛe awadeɛ! Nni awu! Mmɔ korɔno! Nni adansekurumu! Di w’agya ne wo na ni!

²¹Na ɔkaa sɛ: Yeinom nyinaa, mefiri me mmɔfraase na medii soɔ.

²² Na Yesu tee saa no, ɔsee no sɛ: Ɛda so ka wo adeɛ baako, kɔtɔn deɛ wowɔ nyinaa, na kyɛ ma ahiafoɔ, na wobɛnya agyapadeɛ wɔ soro, na bra bɛdi m’akyi!

²³Na ɔtee yei no, ɛyɛɛ no awerɛho sɛ; ɛfiri sɛ na ɔyɛ ɔdefoɔ kɛseɛ.

²⁴Na Yesu hwɛɛ no kaa sɛ: Sɛ moahunu den a ɛyɛ ma asikafoɔ ne adefoɔ sɛ wɔbɛkɔ Nyankopɔn ahennie mu!

²⁵Na ɛyɛ mmerɛ ma yoma sɛ ɔbɛfa paneɛ aniwa mu sene sɛ ɔdefoɔ bɛkɔ Nyankopɔn ahennie mu.

²⁶Na wɔn a wɔteeɛ no kaa sɛ: Ɛnneɛ hwan na wɔbɛtumi agye no nkwa?

²⁷Na ɔkaa sɛ: Deɛ ɛntumi nyɛ hɔ nnipa fam no, Nyankopɔn fam deɛ, ɛbɛtumi ayɛ hɔ.

²⁸Na Petro se: Hwɛ, yɛagya ade nyinaa hɔ abɛdi w’akyi.

²⁹Na ɔsee wɔn sɛ: Nokorɛ mese mo sɛ: Obi nni hɔ a wagya efie anaa yerɛ anaa anuanom anaa awofoɔ anaa mma hɔ Nyankopɔn ahennie nti,

³⁰na ɔrennya no mmɔho pii ɛberɛ yi mu ne wiase a ɛreba no mu daa nkwa.

³¹ Na ɔfaa dummienu no ka kyerɛɛ wɔn sɛ: Hwɛ, yɛrekɔ Yerusalem, na nnoɔma a adiyifoɔ no atwerɛ afa onipa ba no ho nyinaa bɛba mu.

³²Na wɔbɛyi no ahyɛ wiase aman sofoɔ nsa, na wɔagoro ne ho, na wɔabɔ no adapaa, na wɔatete ntasuo agu ne so,

³³na wɔaka no mpire, na wɔakum no, na da a ɛtɔ so mmiɛnsa no, wasɔre bio.

³⁴ Na wɔn deɛ, wɔante yeinom biara ase, na asɛm yi ahunta wɔn, na wɔanhunu deɛ ɔkaeɛ no.

³⁵Na ɛbaa sɛ ɔrebɛn Yeriko no, na onifirani bi te kwankyɛn resrɛsrɛ adeɛ.

³⁶Na ɔtee sɛ nkurɔfokuo bi retwam no, ɔbisaa aseɛ.

³⁷Na wɔka kyerɛɛ no sɛ, Yesu Nasareni no na ɔretwam.

³⁸Na ɔteaa mu sɛ: Yesu, Dawid ba, hu me mmɔbɔ!

³⁹Na wɔn a wɔdi kan no kaa n’anim sɛ ɔmmua n’ano; nanso ɔkɔɔ so teateaa mu denden sɛ: Dawid ba, hu me mmɔbɔ!

⁴⁰Na Yesu gyina hyɛɛ sɛ wɔmfa no mmrɛ no. Na ɔbɛneeɛ no, ɔbisaa no

⁴¹sɛ: Ɛdeɛn na wopɛ sɛ meyɛ mema woɔ? Na ɔkaa sɛ: Awurade, ma menhunu adeɛ.

⁴² Na Yesu see no sɛ: Hunu adeɛ! Wo gyidie agye wo.

⁴³Na amonom hɔ ara, ɔhunuu adeɛ, na ɔdii n’akyi de animuonyam maa Onyankopɔn. Na ɔman no nyinaa hunuiɛ no, wɔde ayeyie maa Onyankopɔn.