Read Twi Asante Luka 2 Bible Online

Luka 2 - Twi Asante bible

Luka 2

¹Nna no mu no, mmara bi firi Kaesare Augusto nkyɛn baa sɛ wɔnkan wiasefoɔ nyinaa, ntwerɛ wɔn din.

²Yei ne ɔkan a ɛdi kan berɛ a na Kirenio yɛ Siria amrado no.

³Na nnipa nyinaa kɔɔ wɔn kurom kɔtwerɛɛ wɔn din.

⁴Na Yosef nso firii Nasaret a ɛwɔ Galilea sii mu kɔɔ Yudea, Dawid kuro a wɔfrɛ no Betlehem mu, ɛfiri sɛ na ɔfiri Dawid fie ne n’abusua mu,

⁵ kɔtwerɛɛ ɔno ne n’asiwa yere Maria a n’awoɔ abɛn no din.

⁶Na wɔwɔ hɔ no, n’awoɔ duruu so,

⁷ na ɔwoo n’abakan barima, na ɔde ntoma kyekyeree no, na ɔde no too mmoa adididaka mu, ɛfiri sɛ wɔannya kwan ahɔhodan no mu.

⁸Na nnwanhwɛfoɔ bi wɔ saa asase no so da wiram rewɛn wɔn nnwankuo anadwo.

⁹Na Awurade bɔfoɔ bɛgyinaa wɔn nkyɛn, na Awurade animuonyam hran twaa wɔn ho hyiae, na ehu kɛseɛ kaa wɔn.

¹⁰Na ɔbɔfoɔ no see wɔn sɛ: Monnsuro, na hwɛ, mede asɛmpa a ɛyɛ anigyeɛ pii na ɛbɛyɛ aman nyinaa dea merebrɛ mo,

¹¹sɛ nnɛ wɔawo Agyenkwa a ɔne Kristo, Awurade no, ama mo wɔ Dawid kurom.

¹²Na yei ne mo nsɛnkyerɛnneɛ: Mobɛhunu akɔkoaa a wɔde ntoma akyekyere no sɛ ɔda mmoa adididaka mu.

¹³ Na mpofirim ara ɔsoro asafo bebree bɛkaa ɔbɔfoɔ no ho yii Onyankopɔn ayɛ sɛ:

¹⁴ Animuonyam nka Onyankopɔn wɔ sorosoro, na asomdwoeɛ nka nnipa a wɔsɔ n’ani wɔ asase so.

¹⁵Na ɛbaa sɛ abɔfoɔ no firii wɔn nkyɛn kɔɔ soro no, nnwanhwɛfoɔ no keka kyerɛkyerɛɛ wɔn ho sɛ: Momma yɛnkɔ Betlehem, na yɛnkɔhwɛ asɛm a aba a Awurade ayi akyerɛ yɛn yi ɛ!

¹⁶Na wɔkɔɔ no ntɛm so, na wɔkɔhunuu Maria ne Yosef ne akɔkoaa no sɛ ɔda mmoa adididaka no mu.

¹⁷ Na wɔhunuu no no, wɔkaa abɔfra no ho asɛm a wɔka kyerɛɛ wɔn no.

¹⁸Na deɛ nnwanhwɛfoɔ no kaeɛ no yɛɛ wɔn a wɔteeɛ nyinaa nwanwa.

¹⁹ Na Maria deɛ, ɔde nsɛm yi nyinaa sieeɛ, na ɔdwenee ho n’akoma mu.

²⁰Na nnwanhwɛfoɔ no sane kɔe kɔhyɛɛ Onyankopɔn animuonyam, na wɔyii no ayɛ wɔ deɛ wɔteeɛ na wɔkɔhunuiɛ sɛdeɛ wɔka kyerɛɛ wɔn no nyinaa nti.

²¹ Na ɔdii nnawɔtwe a wɔrebɛtwa no twetia no, wɔtoo ne din Yesu sɛdeɛ ɔbɔfoɔ no kyerɛeɛ ansa na wɔrenyinsɛn no ɔyafunu mu no.

²² Na wɔn ahodwira nna duruiɛ sɛdeɛ Mose mmara seɛ no, wɔde no kɔɔ Yerusalem sɛ wɔde no rekɔma Awurade

²³ (sɛdeɛ wɔatwerɛ Awurade mmara mu sɛ: Ɔbarima biara a ɔbɛbue yafunu ano no, wɔbɛfrɛ no kronkron ama Awurade,)

²⁴ na wɔakɔbɔ afɔdeɛ sɛdeɛ wɔaka wɔ Awurade mmara mu no: Anyankuku mmienu anaa mmorɔnoma mma mmienu.

²⁵ Na hwɛ, ɔbarima bi wɔ Yerusalem a wɔfrɛ no Simeon; saa onipa yi tene, ɔsuro Nyame, na ɔretwɛn Israel awerɛkyekyerɛ no, na Honhom Kronkron wɔ ne so.

²⁶Na Honhom Kronkron no ayi akyerɛ no sɛ ɔrenhunu owuo, gye sɛ wahunu Kristo a ɔyɛ Awurade deɛ no ansa.

²⁷Na Honhom no maa no kɔɔ asɔrefie hɔ; na abɔfra Yesu awofoɔ no de no baa sɛ wɔrebɛyɛ sɛdeɛ mmara no teɛ ama no no,

²⁸ɔfaa no too n’abasa so, na ɔyii Onyankopɔn ayɛ na afei ɔkaa sɛ:

²⁹ Awurade, afei woregya w’akoa kwan asomdwoeɛ mu sɛdeɛ w’asɛm seɛ;

³⁰ɛfiri sɛ m’ani ahunu wo nkwagyeɛ

³¹a woasiesie wɔ aman nyinaa anim,

³² kanea a ɛbɛma amanaman so ateɛ na ɛbɛhyɛ wo man Israel animuonyam.

³³Na deɛ wɔkaa no ne ho no yɛɛ n’agya ne ne na nwanwa.

³⁴ Na Simeon hyiraa wɔn, na ɔka kyerɛɛ ne na Maria sɛ: Hwɛ, abɔfra yi na wɔde no asi hɔ ama Israel nnipa bebree ahweaseɛ ne wɔn sɔreɛ ne nsɛnkyerɛnneɛ a wɔbɛkasa atia no,

³⁵na wo nso, afena bɛhwire wo ara wo kra mu, na akoma bebree mu nsusuiɛ ada adi.

³⁶Na odiyifoɔ baa bi a wɔfrɛ no Hana wɔ hɔ. Ɔyɛ Fanuel ba a ɔfiri Aser abusuakuo mu. Wanyini, na ɔwaree ne mmabaaberɛ mu ne ne kunu tenaa mfirinhyia nson.

³⁷ Na ɔyɛ okunafoɔ a wadi bɛyɛ mfirinhyia aduɔwɔtwe nnan, na ɔmpa asɔrefie hɔ da, na ɔde mmuada ne mpaebɔ som Onyankopɔn adesaeɛ ne adekyeeɛ.

³⁸ Na dɔn no ara mu, ɔno nso bɛgyinaa hɔ bi yii Onyankopɔn ayɛ saa ara, na ɔkaa ne ho asɛm kyerɛɛ wɔn a wɔretwɛn ɔgyeɛ a wɔbɛgye Yerusalem no nyinaa.

³⁹Na wɔwiee amanneɛ nyinaa yɛ sɛdeɛ Awurade mmara kyerɛ no, wɔsane kɔɔ wɔn kuro Nasaret a ɛwɔ Galilea mu.

⁴⁰ Na abɔfra no nyiniiɛ, na ɔyɛɛ nnam, na nyansa yɛɛ no ma, na Nyankopɔn adom wɔ ne so.

⁴¹ Na n’awofoɔ kɔ Yerusalem daa afirinhyia Twam afahyɛ ase.

⁴²Na ɔdii mfirinhyia dummienu no, wɔkɔe sɛdeɛ afahyɛ no ho amanneɛ teɛ.

⁴³ Na wɔdii nna no wieeɛ, na wɔresane aba no, abɔfra Yesu no kaa akyire wɔ Yerusalem, nanso na n’awofoɔ nnim.

⁴⁴Na wɔsusuu sɛ wafra nnipakuo no mu nti, wɔkɔɔ da koro kwan, na wɔhwehwɛɛ no wɔn abusuafoɔ ne amannifoɔ mu.

⁴⁵Na wɔanhu no no, wɔsane baa Yerusalem bɛhwehwɛɛ no.

⁴⁶Na ɛbaa sɛ ne nnansa soɔ no, wɔkɔhunuu no wɔ asɔrefie sɛ ɔte akyerɛkyerɛfoɔ ntam retie wɔn na ɔrebisabisa wɔn nsɛm.

⁴⁷Na wɔn a wɔtiee no nyinaa, ne nyansa ne ne mmuaeɛ yɛɛ wɔn nwanwa.

⁴⁸Na wɔhunuu no no, ɛyɛɛ wɔn ahodwiri, na ne na see no sɛ: Ɔba, adɛn na woayɛ yɛn sɛɛ yi? Hwɛ, me ne w’agya de ahoyera na ahwehwɛ woɔ.

⁴⁹ Na ɔsee wɔn sɛ: Adɛn nti na mohwehwɛ me? Monnim sɛ ɛsɛ me sɛ metena m’agya fie?

⁵⁰Na wɔn deɛ, wɔante asɛm a ɔka kyerɛɛ wɔn no ase.

⁵¹ Na ɔne wɔn sii mu sane kɔɔ Nasaret, na ɔbrɛɛ ne ho ase maa wɔn. Na ne na de nsɛm yi nyinaa siee n’akomam.

⁵² Na Yesu nyinii nyansa ne kɛseyɛ ne Nyankopɔn ne nnipa nkyɛn adom mu.