Read Twi Asante Luka 20 Bible Online

Luka 20 - Twi Asante bible

Luka 20

¹Na ɛbaa sɛ da koro bi a ɔrekyerɛkyerɛ ɔman no wɔ asɔrefie, na ɔreka asɛmpa no, asɔfoɔ mpanimfoɔ ne Atwerɛfoɔ ne mpanimfoɔ no baa ne so,

²na wɔbɛka kyerɛɛ no sɛ: Ka tumi ko a wode yɛ nnoɔma yi kyerɛ yɛn, anaasɛ hwan na ɔmaa wo tumi yi?

³Na ɔbua see wɔn sɛ: Me nso mɛbisa mo asɛm baako na monka nkyerɛ me:

⁴Yohane asubɔ no, ɛfiri soro anaasɛ ɛfiri nnipa?

⁵Na wɔdwendwenee sesee wɔn ho sɛ: Sɛ yɛka sɛ ɛfiri soro a, ɔbɛka sɛ: Ɛnneɛ adɛn nti na moannye no annie?

⁶Na sɛ yɛka sɛ ɛfiri nnipa a, ɔman no nyinaa bɛsi yɛn aboɔ; ɛfiri sɛ wɔgye di ampa sɛ Yohane yɛ odiyifoɔ.

⁷Na wɔbuaa sɛ, wɔnnim deɛ ɛfire.

⁸Na Yesu nso see wɔn sɛ: Me nso menka tumi ko a mede meyɛ yeinom menkyerɛ mo.

⁹Na ɔfirii aseɛ buu ɔman no bɛ yi sɛ: Onipa bi yɛɛ bobe turo, na ɔde fɛmm akuafoɔ bi, na ɔgyaa hɔ kɔɔ baabi kɔkyɛree.

¹⁰ Na berɛ no duruiɛ no, ɔsomaa akoa bi kɔɔ akuafoɔ no nkyɛn sɛ wɔmma no bobe turo no mu aba no bi; na akuafoɔ no hwee no maa no nam nsansa kɔe.

¹¹Na ɔsane somaa akoa foforɔ; na ɔno nso wɔhwee no bɔɔ no adapaa maa no nam nsansa kɔe.

¹²Na ɔsomaa deɛ ɔtɔ so mmiɛnsa; na ɔno nso, wɔpirapiraa no pamm no firii hɔ.

¹³Na bobe turo wura no kaa sɛ: Menyɛ dɛn? Mɛsoma me dɔba; ebia wɔbɛfɛre no.

¹⁴Na akuafoɔ no hunuu no no, wɔdwendwenee sesee wɔn ho sɛ: Ɔdedifoɔ no nie; momma yɛnkum no, na apɛgyadeɛ no nyɛ yɛn dea.

¹⁵Na wɔtwee no firii bobe turom hɔ kɔkumm no. Enti ɛdeɛn na bobe turo wura no bɛyɛ wɔn?

¹⁶Ɔbɛba abɛsɛe akuafoɔ yi, na ɔde bobe turo no ama afoforɔ. Na wɔteeɛ no, wɔkaa sɛ: Onyame mpa ngu!

¹⁷ Na ɔhwɛɛ wɔn anim kaa sɛ: Na ɛdeɛn ne yei a wɔatwerɛ sɛ: Ɔboɔ a abantofoɔ apoɔ no, ɛno na abɛyɛ tweaso tiboɔ.

¹⁸Obiara a ɔbɛhwe ɔboɔ no soɔ no, ɔbɛbubu; na deɛ ɛbɛhwe ne soɔ no, ɛbɛpɛkyɛ no.

¹⁹ Na Atwerɛfoɔ ne asɔfoɔ mpanimfoɔ no hwehwɛɛ sɛ wɔde wɔn nsa kɔsɔ ne mu kye no dɔn no ara mu, nanso wɔsuroo ɔman no; ɛfiri sɛ wɔhunuu sɛ ɛbɛ a ɔbuiɛ no, ɔne wɔn.

²⁰ Na wɔtɛɛ no, na wɔsomaa nsrafoɔ bi a wɔpatu yɛɛ wɔn anim sɛdeɛ wɔyɛ nnipa tenenee, sɛ wɔnkɔpɛ no asɛm, na wɔayi no ahyɛ amrado mmara ne ne tumi nsa.

²¹Na wɔbisaa no sɛ: Kyerɛkyerɛfoɔ, yɛnim sɛ wokasa na wokyerɛkyerɛ yie nanso womfɛre obiara anim, na wokyerɛkyerɛ Nyankopɔn kwan nokorɛ mu.

²²Yɛwɔ ho kwan sɛ yɛyi toɔ ma Kaesare anaasɛ yɛnnyi?

²³Na ɔhunuu wɔn adwemmɔne no, ɔka kyerɛɛ wɔn sɛ:

²⁴Momfa denare mmɛkyerɛ me! Hwan mfonini ne atwerɛ na ɛwɔ soɔ yi? Na wɔkaa sɛ: Kaesare deɛ.

²⁵Na ɔsee wɔn sɛ: Ɛnneɛ momfa Kaesare deɛ mma Kaesare ne Nyankopɔn deɛ mma Onyankopɔn.

²⁶Na wɔantumi annya n’asɛm bi ansɔ mu ɔman no anim, na ne mmuaeɛ no yɛɛ wɔn nwanwa, na wɔmuaa wɔn ano.

²⁷Na Sadukifoɔ a wɔka sɛ owusɔreɛ nni hɔ no mu bi ba bɛbisaa no

²⁸ sɛ: Kyerɛkyerɛfoɔ, Mose twerɛ maa yɛn sɛ: Sɛ obi nua wu, na ɔwɔ yere, na wanwo mma a, ne nua no mfa ne yere no nware, na ɔnwo mma mma deɛ wawuo no.

²⁹Nso anuanom baason tenaa ase. Na deɛ ɔdi kan waree yere, wannya ba, na ɔwuiɛ.

³⁰Na deɛ ɔtɔ so mmienu

³¹ne deɛ ɔtɔ so mmiɛnsa waree no; na saa ara na wɔn baason nyinaa waree no, na wɔannya mma, na wɔwuwui.

³²Na akyire yi no, ɔbaa no nso wui.

³³Na afei owusɔreɛ mu no, ɔbɛyɛ wɔn mu hwan yere? Ɛfiri sɛ wɔn baason no aware no.

³⁴Na Yesu bua see wɔn sɛ: Wiase yi mma ware, na wɔde wɔn ma awadeɛ;

³⁵na wɔn a wɔbɛbu wɔn sɛ ɛsɛ wɔn sɛ wɔn nsa bɛka wiase foforɔ no ne ɔsɔreɛ a wɔbɛsɔre afiri awufoɔ mu no deɛ, wɔnware, nso wɔmfa wɔn mma awadeɛ.

³⁶ Nso wɔntumi nwu bio; na wɔte sɛ abɔfoɔ, na wɔyɛ Nyankopɔn mma, sɛ wɔyɛ owunyane mma ntira.

³⁷ Na ɛfa awufoɔ nyaneeɛ ho deɛ, Mose nso kyerɛɛ wɔ wura no ho asɛm no mu, sɛ ɔfrɛ Awurade sɛ: Abraham Nyankopɔn ne Isak Nyankopɔn ne Yakob Nyankopɔn.

³⁸Na ɔnyɛ awufoɔ Nyankopɔn, na mmom ateasefoɔ deɛ; ɛfiri sɛ wɔn nyinaa te ase ma no.

³⁹Na Atwerɛfoɔ no mu bi buaa sɛ: Kyerɛkyerɛfoɔ, woaka no yie.

⁴⁰Na yei akyiri no, wɔantumi ammisa no asɛm bi bio.

⁴¹Na ɔka kyerɛɛ wɔn sɛ: Adɛn nti na wɔka sɛ: Kristo no yɛ Dawid ba?

⁴² Na Dawid no ara ka no Nnwom nwoma no mu sɛ: Awurade see me wura sɛ: Tena me nifa

⁴³kɔsi sɛ mede w’atamfo bɛyɛ wo nan ase ntiasoɔ.

⁴⁴Sɛ Dawid frɛ no owura a, na ɛyɛɛ dɛn na ɔyɛ ne ba?

⁴⁵Na ɔman no nyinaa retie no, na ɔsee asuafoɔ no sɛ:

⁴⁶ Monhwɛ mo ho yie Atwerɛfoɔ a wɔpɛ ntadeɛ atentene mu nanteɛ, na wɔpɛ edwa mu nkyea ne mpanimfoɔ nkonnwa hyia adan mu, ne mpanimfoɔ tenabea adidie ase no ho;

⁴⁷wɔn na wɔbɔ akunafoɔ apoo, nanso wɔboapa bɔ mpaeɛ atentene kyerɛ. Yeinom na wɔbɛnya afobuo a ɛso.