Read Twi Asante Luka 23 Bible Online

Luka 23 - Twi Asante bible

Luka 23

¹Ɛnna nnipakuo no nyinaa sɔre de no kɔɔ Pilato anim.

² Na wɔfirii aseɛ totoo n’ano sɛ: Yɛahunu sɛ onipa yi resɛe yɛn man, na wabara sɛ wɔnnyi toɔ mma Kaesare, na ɔka sɛ ɔno ara ne Ɔhene Kristo no.

³Na Pilato bisaa no sɛ: Wone Yudafoɔ hene no anaa? Na ɔbuaa no sɛ: Woaka.

⁴Na Pilato ka kyerɛɛ asɔfoɔ mpanimfoɔ ne nkurɔfoɔ akuakuo no sɛ: Menhunu afobusɛm biara onipa yi mu.

⁵Nanso wɔkae ara sɛ: Ɔhwanyan ɔman mu, ɔkyerɛkyerɛ Yudea man nyinaa mu, ɔfirii aseɛ Galilea na ɔde abɛduru ha yi.

⁶Na Pilato tee Galilea din no, ɔbisaa sɛ onipa no yɛ Galileani anaa?

⁷ Na ɔhunuu sɛ ɔfiri Herode asase soɔ no, ɔmaa wɔde no kɔmaa Herode; na nna no mu no, na ɔno ara nso wɔ Yerusalem.

⁸ Herode hunuu Yesu no, n’ani gyee sɛ; ɛfiri sɛ ɔpɛɛ sɛ ɔhu no akyɛ, na wate ne ho nsɛm ntira. Na n’ani da so sɛ ɔbɛyɛ nsɛnkyerɛnneɛ bi na wahunu.

⁹Na ɔbisabisaa no nsɛm bebree, nanso wammua no.

¹⁰Nso na asɔfoɔ mpanimfoɔ ne Atwerɛfoɔ no gyina hɔ, na wɔtotoo n’ano ara.

¹¹Na Herode ne ne dɔm no bɔɔ no adapaa, goroo ne ho, na ɔhyɛɛ no atadeɛ nahanaha bi de no kɔmaa Pilato bio.

¹²Na da no ara na Herode ne Pilato faa adamfoɔ; akane no deɛ, na anka wɔyɛ aka.

¹³Na Pilato frɛɛ asɔfoɔ mpanimfoɔ ne mpanimfoɔ ne ɔman no boaa ano

¹⁴ka kyerɛɛ wɔn sɛ: Mode onipa yi abrɛ me sɛ obi a ɔsɛe ɔman; na hwɛ, mahwehwɛ ne mu mo anim, na manhunu nsɛm a mode totoo n’anomu afobusɛm biara onipa yi mu.

¹⁵Herode nso anhunu; na ɔmaa wɔde no brɛɛ yɛn, na hwɛ, ɔnyɛɛ deɛ ɛfata sɛ wɔku no.

¹⁶Enti mɛhwe no, na magyaa no.

¹⁷[Nso ɛsɛ no sɛ daa, afahyɛ no mu, ɔgyaa odeduani baako ma wɔn.][9]

¹⁸Na wɔn nyinaa teaa mu prɛko sɛ: Fa oyi kɔ, na gyae Baraba ma yɛn!

¹⁹(Ɔno na sakasaka bi a ɔkɔyɛɛ no kuro mu hɔ ne awudie nti wɔde no akɔto afiase.)

²⁰Na Pilato pɛɛ sɛ ɔgyaa Yesu nti, ɔkasa kyerɛɛ wɔn bio.

²¹Na wɔteaa mu sɛ: Bɔ no asɛnnua mu, bɔ no asɛnnua mu!

²²Na ɔkaa deɛ ɛtɔ so mmiɛnsa kyerɛɛ wɔn sɛ: Na bɔne bɛn na wayɛ? Manhunu adeɛ biara a wayɛ a ɛfata sɛ wɔku no, enti mɛhwe no, na magyaa no.

²³Na wɔde nne kɛseɛ kɔɔ so bisaa sɛ wɔmmɔ no asɛnnua mu; na wɔn nne boroo ne deɛ so.

²⁴Na Pilato buu atɛn sɛ ɛnyɛ sɛdeɛ wɔbisaeɛ no.

²⁵Na ɔgyaee deɛ sakasaka ne awudie nti wɔde no kɔtoo afiase a wɔsrɛɛ no no maa wɔn, na Yesu deɛ, ɔyii no mae sɛdeɛ wɔpɛ.

²⁶ Na wɔde no rekorɔ no, wɔsɔɔ Simon bi a ɔfiri Kirene a ɔfiri afuom reba no mu, na wɔde asɛnnua no too ne so sɛ ɔnsoa nni Yesu akyi.

²⁷Na ɔman no mu nnipakuo kɛseɛ dii n’akyi ne mmaa a wɔredi abooboo na wɔresu no.

²⁸Na Yesu danee n’ani kyerɛɛ wɔn kaa sɛ: Yerusalem mmammaa, monnsu me, na monsu mo ho ne mo mma!

²⁹ Na hwɛ, nna bi reba a wɔbɛka sɛ: Nhyira ne abonini ne yafunu a ɛnwoo da ne nufoɔ a wɔnnum da.

³⁰ Ɛnna wɔbɛfiri aseɛ aka akyerɛ mmepɔ sɛ: Monhwe yɛn so! ne nkokoɔ sɛ: Monkata yɛn so!

³¹ Na sɛ wɔde yei reyɛ dua mono a, ɛdeɛn na wɔde bɛyɛ dua wuiɛ?

³²Na wɔde nnebɔneyɛfoɔ baanu nso kaa ne ho kɔɔ sɛ wɔnkɔkum wɔn.

³³Na wɔduruu baabi a wɔfrɛ hɔ Tikwankoraa bea no, ɛhɔ na wɔsɛnee no ne nnebɔneyɛfoɔ no, ɔbaako wɔ ne nifa, na ɔbaako wɔ benkum.

³⁴ Na Yesu kaa sɛ: Agya, fa kyɛ wɔn, na wɔnnim deɛ wɔreyɛ! Na wɔtwee ntonto de kyɛɛ ne ntoma mu.

³⁵Na ɔman no gyina hɔ rehwɛ. Na mpanimfoɔ no nso yii no ahi sɛ: Ɔgyee binom; sɛ oyi ne Kristo no a Onyankopɔn ayi no no a, ma no nnye ne ho ɛ!

³⁶Na asraafoɔ no nso goroo ne ho, na wɔbaa ne nkyɛn bɛmaa no nsa kekakeka,

³⁷na wɔkaa sɛ: Sɛ woyɛ Yudafoɔ hene a, gye wo ho!

³⁸Na atwerɛ bi nso wɔ n’atifi sɛ: Oyi ne Yudafoɔ hene.

³⁹Na nnebɔneyɛfoɔ a wɔasɛne wɔn no mu baako yaa no sɛ: Ɛnyɛ wo ne Kristo no? Gye wo ho ne yɛn!

⁴⁰Na ɔbaako no buaa no kaa n’anim sɛ: Wo nso wonnsuro Onyankopɔn sɛ wowɔ afobuo koro yi ara mu yi?

⁴¹Na yɛn deɛ, deɛ ɛtene pɛpɛɛpɛ, na yɛanya deɛ ɛsɛ yɛn nneyɛɛ no; na oyi deɛ, ɔnyɛɛ mfomsoɔ adeɛ biara.

⁴² Na ɔkaa sɛ: Yesu, sɛ woba w’ahennie mu a, kae me!

⁴³Na ɔka kyerɛɛ no sɛ: Nokorɛ mese wo sɛ, nnɛ wobɛka me ho wɔ Paradise hɔ.

⁴⁴Na ɛbɛyɛ awia dummienu no, esum duruu asase nyinaa so de kɔsii awia nnɔnmmiɛnsa.

⁴⁵ Na owia duruu sum; na asɔredan mu ntoma a ɛtwa mfimfini no mu teeɛ.

⁴⁶ Na Yesu de nne kɛseɛ teaa mu sɛ: Agya, wo nsam na mede me honhom mehyɛ! Na ɔkaa saa no, ɔgyaa mu.

⁴⁷Na asraafoɔ ɔha so panin no hunuu deɛ asie no, ɔhyɛɛ Onyankopɔn animuonyam sɛ: Ampa ara, onipa yi yɛ onipa tenenee.

⁴⁸Na nkurɔfoɔ akuakuo a wɔbaa hɔ bɛhwɛɛ adeɛ no nyinaa hunuu deɛ asie no, wɔbobɔɔ wɔn koko so, sane kɔe.

⁴⁹ Na n’amannifoɔ nyinaa ne mmaa a wɔdii n’akyi firi Galilea no abɛgyina akyirikyiri rehwɛ nnoɔma yi.

⁵⁰Na hwɛ, ɔbarima bi a wɔfrɛ no Yosef a ɔyɛ badwani na ɔyɛ onipa pa na ɔtene

⁵¹ no deɛ, wampene wɔn agyina ne wɔn nneyɛɛ no so. Ɔfiri Yudafoɔ kuro Arimatea mu, na ɔno ara nso retwɛn Nyankopɔn ahennie no.

⁵²Ɔno na ɔkɔɔ Pilato nkyɛn kɔsrɛɛ no Yesu amu no.

⁵³Na ɔkɔyii amu no kyekyeree no nwera mu, na ɔde kɔtoo ɛda a wɔatwa no ɔboɔ mu, a onipa bi nnaa mu da mu.

⁵⁴Na da no yɛ ahosiesie da, na homeda rebɛn.

⁵⁵ Na mmaa no nso a wɔne no firi Galilea baeɛ no dii akyire kɔhwɛɛ ɛda no ne sɛdeɛ wɔde n’amu no too hɔ faeɛ.

⁵⁶ Na wɔsane bɛsiesiee nnuro ne ngo hwamhwam. Na homeda no, wɔyɛɛ komm homee sɛdeɛ mmara no teɛ no.