Read Twi Asante Luka 24 Bible Online

Luka 24 - Twi Asante bible

Luka 24

¹Na da a ɛdi nnawɔtwe kan no anɔpahema, wɔkɔɔ ɛda no so, na wɔde nnuhwam a wɔasiesie no bae.

²Na wɔhunuu ɔboɔ no sɛ apire afiri ɛda no ano,

³na wɔhyɛnee mu no, wɔanhunu Awurade Yesu amu no.

⁴Na ɛbaa sɛ yei yɛɛ wɔn tirim keserenee no, hwɛ, mmarima baanu bɛgyinaa wɔn nkyɛn a wɔhyɛ ntadeɛ a ɛhyerɛn.

⁵Na ehu kaa wɔn maa wɔsisii wɔn tiri ase, na mmarima no ka kyerɛɛ wɔn sɛ: Adɛn na mohwehwɛ ɔteasefoɔ awufoɔ mu yi?

⁶Ɔnni ha, na wasɔre. Monkae sɛdeɛ ɔwɔ Galilea no, ɔka kyerɛɛ mo

⁷ sɛ: Ɛtwa sɛ wɔde Onipa Ba no hyɛ nnebɔneyɛfoɔ nsa, na wɔbɔ no asɛnnua mu, na da a ɛtɔ so mmiɛnsa no, wasɔre bio.

⁸Na wɔkaee ne nsɛm no;

⁹na wɔsane firii ɛda no so bɛkaa nnoɔma yi nyinaa kyerɛɛ dubaako no ne wɔn a aka no nyinaa.

¹⁰ Na Maria Magdalene ne Yohana ne Yakobo ne na Maria ne mmaa a wɔka wɔn ho no na wɔbɛkaa yeinom kyerɛɛ asomafoɔ no.

¹¹Nanso wɔn nsɛm no yɛɛ wɔn sɛ nsɛnhunu, na wɔannye wɔn anni.

¹²Na Petro deɛ, ɔsɔre tutuu mmirika kɔɔ ɛda no so, na ɔbɔɔ ne mu ase hwɛɛ mu no, ɔhunuu nwera no sɛ ɛgu fa, na ɔfirii hɔ kɔɔ fie, na deɛ asie no yɛɛ no nwanwa.

¹³Na hwɛ, da no ara wɔn mu baanu sii mu kɔɔ akuraa bi a wɔfrɛ no Emaus a ɛfiri Yerusalem rekɔ hɔ bɛyɛ nkwansimma aduosia ase.

¹⁴Na wɔredi nsɛm a asie yi nyinaa ho nkɔmmɔ.

¹⁵ Na ɛbaa sɛ wɔredi nkɔmmɔ na wɔrebisabisaa wɔn ho no, Yesu ankasa twe bɛnee ne wɔn bɔɔ anan kɔe.

¹⁶ Nanso wɔasosɔ wɔn aniwa mu, na wanhu no.

¹⁷Na ɔbisaa wɔn sɛ: Nkɔmmɔ bɛn na monam redie a mo werɛ ahoɔ yi?

¹⁸Na wɔn mu baako a wɔfrɛ no Kleopa buaa no sɛ: Wo nko ne hɔhoɔ wɔ Yerusalem a wonnim nsɛm a asi hɔ nnansa yi anaa?

¹⁹ Na ɔbisaa wɔn sɛ: Nsɛm bɛn? Na wɔsee no sɛ: Deɛ ɛfa Nasareni Yesu a ɔyɛ odiyifoɔ a ɔwɔ tumi, nneyɛɛ ne ɔkasa mu, Onyankopɔn ne ɔman nyinaa anim no ho,

²⁰sɛdeɛ asɔfoɔ mpanimfoɔ ne yɛn mpanimfoɔ de no kɔmaa sɛ wɔmmu no fɔ nkum no, na wɔbɔɔ no asɛnnua mu.

²¹ Na yɛn deɛ, yɛn ani daa so sɛ anka ɔno na ɔrebɛgye Israel. Nanso yei nyinaa akyiri no, nnansa ni a nsɛm yi siiɛ.

²² Na mmaa bi a wɔfiri yɛn mu abɛma yɛn ho adwiri yɛn. Wɔtuaa nhema kɔɔ ɛda no so,

²³na wɔanhunu n’amu no, na wɔba bɛkaa sɛ wɔahunu abɔfoɔ bi wɔn ani so nso a wɔkaa sɛ ɔte ase.

²⁴ Na wɔn a wɔne yɛn wɔ hɔ no mu binom kɔɔ ɛda no so, na wɔkɔhunuu sɛdeɛ mmaa no nso kaeɛ no ara; na ɔno ara deɛ, wɔanhu no.

²⁵Na ɔka kyerɛɛ wɔn sɛ: O adwenharefoɔ a moyɛ nyaa mo akoma mu sɛ mobɛgye deɛ adiyifoɔ no aka nyinaa adie!

²⁶Ɛnsɛ sɛ Kristo no bɛhunu saa amaneɛ no ansa na wakɔ n’animuonyam mu anaa?

²⁷ Na ɔfiri Mose ne adiyifoɔ nyinaa so kyerɛɛ wɔn atwerɛ nyinaa mu nsɛm a ɛfa ne ho ase.

²⁸Na wɔrebɛn akuraa a wɔrekɔ aseɛ no, ɔyɛɛ sɛdeɛ ɔrekɔ n’anim.

²⁹Na wɔhyɛɛ no dendeenden sɛ: Tena yɛn nkyɛn, na onwunu adwo, na adeɛ reyɛ asa. Ɛnna ɔhyɛnee mu ne wɔn kɔtenaeɛ.

³⁰ Na ɛbaa sɛ ɔne wɔn te adidiiɛ no, ɔfaa paanoo hyiraa so, na ɔbubu de maa wɔn.

³¹Na wɔn ani buee, na wɔhunuu no; na ɔno deɛ, ɔtu yeraa wɔ wɔn anim.

³²Ɛnna wɔsesee wɔn ho sɛ: Ɔne yɛn rekasa kwan mu na ɔbuee atwerɛ nsɛm no mu kyerɛɛ yɛn no, yɛn akoma mu anyɛ yɛn dɛdɛɛdɛ anaa?

³³Na wɔsɔree dɔn no ara mu sane baa Yerusalem; na wɔbɛhunuu sɛ dubaako no ne wɔn a wɔka wɔn ho aboaboa wɔn ano

³⁴ reka sɛ: Awurade anyane ampa, na wayi ne ho akyerɛ Simon.

³⁵Na baanu no nso kaa deɛ ɛsii kwan mu ne sɛdeɛ wɔhunuu no paanoobubuo mu no kyerɛɛ wɔn.

³⁶Na wɔrekasa saa no, ɔno ara ankasa bɛgyinaa wɔn mfimfini, na ɔsee wɔn sɛ: Asomdwoeɛ nka mo!

³⁷ Na wɔbobɔɔ binim, na wɔsuro susuu sɛ wɔahunu ɔsaman.

³⁸Na ɔka kyerɛɛ wɔn sɛ: Adɛn na mo akoma tutuo, na adɛn nti na adwene sɔresɔre mo akoma mu?

³⁹Monhwɛ me nsa ne me nan sɛ ɛyɛ me ara; momfa mo nsa nka me nhwɛ, ɛfiri sɛ ɔsaman nni nam ne nnompe sɛdeɛ mohunu sɛ mewɔ yi.

⁴⁰Na ɔkaa saa no, ɔde ne nsa ne ne nan kyerɛɛ wɔn.

⁴¹Na anigyeɛ nti wɔda so nnye nni na ɛyɛɛ wɔn nwanwa no, ɔbisaa wɔn sɛ: Mowɔ aduane bi wɔ ha anaa?

⁴² Na wɔmaa no apataa a wɔatoto sini bi.

⁴³Na ɔgye dii wɔ wɔn anim.

⁴⁴ Na ɔsee wɔn sɛ: Yei ne me nsɛm a me ne mo wɔ hɔ no, meka mekyerɛɛ mo no, sɛ ɛtwa sɛ deɛ wɔatwerɛ Mose mmara ne Adiyifoɔ ne Nnwom mu, wɔ me ho no nyinaa ba mu.

⁴⁵Ɛno na ɔbuee wɔn adwene mu maa wɔtee atwerɛ nsɛm no aseɛ.

⁴⁶Na ɔsee wɔn sɛ: Wɔatwerɛ sɛ: Kristo no bɛhunu amane, na da a ɛtɔ so mmiɛnsa no, wasɔre afiri awufoɔ mu,

⁴⁷na wɔafa ne din so akɔka adwensakyera ne bɔne fakyɛ amansan nyinaa mu, na wɔbɛfiri aseɛ wɔ Yerusalem.

⁴⁸Na mone yeinom ho adansefoɔ.

⁴⁹ Na hwɛ, meresoma m’agya bɔhyɛ no aba mo so; enti montena kuro no mu nkɔsi sɛ wɔbɛma mo ahoɔden afiri soro.

⁵⁰Na ɔde wɔn firii adi kɔduruu Betania; na ɔmaa ne nsa so hyiraa wɔn.

⁵¹Na ɛbaa sɛ ɔrehyira wɔn no, ɔne wɔn paepaee mu, na wɔmaa no so kɔɔ soro.

⁵²Na wɔkoto sɔree no, na wɔde anigyeɛ kɛseɛ sane baa Yerusalem.

⁵³Na wɔwɔ asɔrefie hɔ daa yii Onyankopɔn ayɛ.