Read Twi Asante Luka 5 Bible Online

Luka 5 - Twi Asante bible

Luka 5

¹Na ɛbaa sɛ nkurɔfokuo no kyeree ne so sɛ wɔrebɛtie Nyankopɔn asɛm no, na ɔgyina Genesaret tadeɛ no ho;

²na ɔhunuu akodoɔ mmienu sɛ ɛsisi ɔtadeɛ no ho, na apofofoɔ no afiri mu rekɔhohoro wɔn asau.

³Na ɔkɔɔ ɔkodoɔ no baako a ɛyɛ Simon dea mu srɛɛ no sɛ ɔntwe mfiri fam kakra. Na ɔtenaa aseɛ no, ɔfiri kodoɔ no mu kyerɛkyerɛɛ nkurɔfoɔ akuakuo no.

⁴ Na ɔgyaee kasa no, ɔka kyerɛɛ Simon sɛ: Siane kɔ deɛ ɛdɔ, na monkɔgu mo asau nyi nam!

⁵Na Simon buaa sɛ: Owura, yɛayɛ adwuma anadwo yi nyinaa, na yɛannya hwee, nanso w’asɛm nti mɛgu asau no.

⁶Na wɔyɛɛ saa no, wɔbumaa mpataa pii; a na wɔn asau no retete.

⁷Na wɔnyamm wɔn mfɛfoɔ a wɔwɔ kodoɔ baako no mu no sɛ wɔmmra mmɛsɔ wɔn mu; na wɔbae, na wɔhyɛɛ akodoɔ mmienu no mama ma anka ɛreyɛ amem.

⁸Na Simon Petro hunuiɛ no, ɔhwee Yesu nan ase kaa sɛ: Firi me nkyɛn kɔ, Awurade, na meyɛ onipa debɔneyɛni.

⁹Na ɔne wɔn a wɔka ne ho nyinaa, mpataa dodoɔ a wɔyiiɛ no nti, wɔn ho dwirii wɔn;

¹⁰ na sɛ nso ɛyɛɛ Yakobo ne Yohane, Sebedeo mma a wɔyɛ Simon mfɛfoɔ ara ne no. Na Yesu ka kyerɛɛ Simon sɛ: Nsuro! Ɛfiri nnɛ wobɛyi nnipa.

¹¹ Na wɔde akodoɔ no baa asase soɔ no, wɔgyaa ne nyinaa hɔ dii n’akyi.

¹²Na ɛbaa sɛ ɔwɔ nkuro no baako mu no, ɔbarima bi a kwata ayɛ ne ho nyinaa baa hɔ. Na ɔhunuu Yesu no, ɔde n’anim butuu fam srɛɛ no sɛ: Owura, sɛ wopɛ a, wobɛtumi ama me ho afi.

¹³Na ɔtenee ne nsa kaa no kaa sɛ: Mepɛ, wo ho mfi! Na ntɛm ara na kwata no firii ne ho kɔeɛ.

¹⁴ Na ɔbaraa no sɛ ɔnnka nnkyerɛ obiara; na ɔse: Kɔ, fa wo ho kɔkyerɛ ɔsɔfoɔ, na w’ahofire nti kɔma sɛdeɛ Mose hyɛeɛ no, na ɛnyɛ wɔn adanseɛ.

¹⁵Nanso ne ho asɛm trɛɛ mmom, na nkurɔfoɔ akuakuo pii bɛhyiaa sɛ wɔbɛtie no, na wasa wɔn nyarewa.

¹⁶ Nanso ɔtwee ne ho kɔɔ ɛserɛ so kɔbɔɔ mpaeɛ.

¹⁷Na ɛbaa sɛ da bi a ɔrekyerɛkyerɛ no, na Farisifoɔ ne mmara akyerɛkyerɛfoɔ a wɔfiri Galilea ne Yudea nkuraa nyinaa ase ne Yerusalem aba tete hɔ; na Awurade ahoɔden wɔ ne so a ɔde sa yadeɛ.

¹⁸Na hwɛ, mmarima bi de onipa bi a ɔda kɛtɛ so a, ɔyare mmubuo bae, na wɔrehwehwɛ kwan de no abɛto n’anim.

¹⁹Na nkurɔfokuo no nti wɔannya kwan a wɔde no bɛfa soɔ aba no, wɔkɔɔ ɔdan no atifi de no faa ntaayaa no mu, ne kɛtɛ so, bɛtoo mfimfini, Yesu anim.

²⁰Na ɔhunuu wɔn gyidie no, ɔsee no sɛ: Onipa, wɔde wo bɔne akyɛ wo.

²¹ Na Atwerɛfoɔ ne Farisifoɔ no firii aseɛ susuu sɛ: Hwan ne oyi a ɔka abususɛm yi? Hwan na ɔbɛtumi de bɔne akyɛ, gye Onyankopɔn nko ara?

²²Na Yesu hunuu wɔn adwene no, ɔbua see wɔn sɛ: Ɛdeɛn na moresusu wɔ mo akoma mu yi?

²³Deɛ ɛwɔ he na ɛyɛ mmerɛ, sɛ wɔbɛka sɛ: Wɔde wo bɔne akyɛ wo anaasɛ wɔbɛka sɛ: Sɔre na nante?

²⁴Na deɛ ɛbɛyɛ na moahunu sɛ Onipa Ba no wɔ tumi wɔ asase so, sɛ ɔde bɔne kyɛ nti, ɔsee obubuani no sɛ: Mese wo sɛ: Sɔre fa wo kɛtɛ, na kɔ wo fie!

²⁵Na amonom hɔ ara ɔsɔree wɔn anim faa deɛ ɔdaa soɔ no firii hɔ kɔɔ ne fie hyɛɛ Onyankopɔn animuonyam.

²⁶Na ɛyɛɛ wɔn nyinaa ahodwiri, na wɔhyɛɛ Onyankopɔn animuonyam, na ehu kaa wɔn pii, na wɔkaa sɛ: Ɛnnɛ deɛ, yɛahunu anwanwadeɛ.

²⁷Na yei akyiri no, ɔfirii adi, na ɔkɔhunuu togyeni bi a ne din de Lewi sɛ ɔte atogyeeɛ, na ɔka kyerɛɛ no sɛ: Di m’akyi!

²⁸Na ɔgyaa biribiara hɔ sɔre bɛdii n’akyi.

²⁹ Na Lewi too no pono kɛseɛ bi wɔ ne fie; na atogyefoɔ ne nnipa foforɔ pii ne wɔn bɛtenaa hɔ.

³⁰Na Atwerɛfoɔ ne Farisifoɔ nwiinwii kyerɛɛ n’asuafoɔ no sɛ: Adɛn nti na mo ne togyefoɔ ne nnebɔneyɛfoɔ didi na monom yi?

³¹Na Yesu see wɔn sɛ: Wɔn a wɔwɔ ahoɔden no, ɛnhia wɔn ɔyaresafoɔ, na mmom wɔn a wɔyareɛ no.

³²Mammɛfrɛ ateneneefoɔ, na mebɛfrɛɛ nnebɔneyɛfoɔ sɛ wɔnsakyera wɔn adwene.

³³Na wɔka kyerɛɛ no sɛ: Adɛn nti na Yohane asuafoɔ taa di mmuada na wɔbɔ mpaeɛ, na Farisifoɔ asuafoɔ nso yɛ saa ara; na w’asuafoɔ deɛ, wɔdidi na wɔnom!

³⁴Na ɔka kyerɛɛ wɔn sɛ: Mobɛtumi ama ayeforɔ asefoɔ no adi mmuada, berɛ a ayeforɔkunu ne wɔn wɔ hɔ yi?

³⁵Na nna bi bɛba a wɔbɛfa ayeforɔkunu no afiri wɔn nkyɛn; saa nna no mu na wɔbɛdi mmuada.

³⁶Na ɔbuu bɛ yi nso kyerɛɛ wɔn sɛ: Obi mfa ntoma foforɔ sini ntɛ atadeɛ dada mu; ɔyɛ saa a, foforɔ no bɛtu, ɛfiri sɛ deɛ ɔtwa firii foforɔ no mu no ne dada no nsɛ.

³⁷Na obi mfa nsa foforɔ ngu nwoma nkotokuo dada mu; anyɛ saa a, nsa foforɔ no bɛma nkotokuo no apaepae, na ahwiehwie agu, na nkotokuo no asɛesɛe.

³⁸Na ɛsɛ sɛ wɔde nsa foforɔ gu nkotokuo foforɔ mu.

³⁹Nso obi nnom nsa dada na ɔnhwehwɛ foforɔ, na mmom ɔka sɛ: Dada no na ɛyɛ.