Read Twi Asante Luka 8 Bible Online

Luka 8 - Twi Asante bible

Luka 8

¹ Na ɛbaa sɛ yei akyiri no, ɔkɔfaa nkuro ne nkuraa nyinaa mu, kaa Nyankopɔn ahennie ho asɛmpa kyerɛe, na dummienu no ka ne ho,

² ne mmaa bi a wasa wɔn ahonhommɔne ne ahoɔmmerɛ, wɔn ne Maria a wɔfrɛ no Magdalene a ɔtuu ahonhommɔne nson firii ne mu no

³ne Yohana, Herode fiepanin Kusa yere, ne Susana ne afoforɔ bebree a wɔde wɔn ahodeɛ bi somm no.

⁴Na nkurɔfokuo pii boaboaa wɔn ano ne wɔn a wɔfiri nkuro no nyinaa mu baa ne nkyɛn no, ɔbuu wɔn bɛ sɛ:

⁵Ogufoɔ bi firii adi kɔguu n’aba. Na ɔreguo no, ebi kɔguu kwankyɛn; na wɔtiatiaa so, na ewiem nnomaa bɛsosɔe.

⁶Na ebi kɔguu ɔbotan so; na ɛfifiriiɛ no, ɛhyee, ɛfiri sɛ ɛnni fonwunu ntira.

⁷Na ebi kɔguu nkasɛɛ mu; na nkasɛɛ no ne no fifirii, na ɛmiaa no.

⁸Na ebi kɔguu asase pa mu; na ɛfifirii, na ɛsoo aba ahodoɔ ɔha. Na ɔkaa saa no, ɔteaa mu sɛ: Deɛ ɔwɔ aso bɛtie no, ma no ntie!

⁹Na n’asuafoɔ no bisaa no sɛ: Ɛbɛ yi ase ne sɛn?

¹⁰ Na ɔse: Mo deɛ, wɔde ama mo sɛ monhunu Nyankopɔn ahennie mu ahuntasɛm no; na wɔn a aka deɛ, wɔde ama wɔn mmebuo mu, na wɔahunu, na wɔanhunu mu, na wɔate, nanso wɔante aseɛ.

¹¹ Na ɛbɛ no ni: Aba a wɔguo no ne Nyankopɔn asɛm.

¹²Ɔkwankyɛn deɛ no ne wɔn a wɔteɛ; na ɔbonsam ba bɛyi asɛm no firi wɔn akoma mu, na wɔannye anni na wɔannye wɔn nkwa.

¹³Ɔbotan so deɛ no ne wɔn a wɔte asɛm no a, wɔde anigyeɛ gyeɛ, nanso yeinom nni nhini, na wɔgye di ma no kyɛre kakra, na sɔhwɛ berɛ ba a, na wɔagyae.

¹⁴Na deɛ ɛguu nkasɛɛ mu no ne wɔn a wɔteɛ, na wɔnam asetena yi mu dadwene ne haw ne ahonya ne anigyedeɛ mu na ɛmia wɔn, na wɔn aba no mmere nwie.

¹⁵ Na asase pa mu deɛ no ne wɔn a wɔde akoma pa a ɛyɛ te asɛm no, na wɔde sie, na wɔnam boasetɔ mu so aba.

¹⁶ Na obi nsɔ kanea mfa adeɛ nkata so, anaasɛ ɔmfa nsi mpa ase; na mmom ɔde si kaneadua so, na wɔn a wɔkɔ mu hɔ ahunu kanea no.

¹⁷ Na biribi nni kokoam a wɔrenyi no adie, na ahunta a wɔrenhunu, na ɛrenna adie.

¹⁸ Enti monhwɛ yie sɛdeɛ mote asɛm no fa. Na obiara a ɔwɔ no na wɔde bɛma no; na deɛ ɔnni bi deɛ, deɛ ɔsusu sɛ ɔwɔ mpo, wɔbɛgye ne nsam.

¹⁹Na ne na ne ne nuanom baa ne nkyɛn, na nkyeresoɔ no nti wɔantumi ammɛn no.

²⁰Na wɔbɛka kyerɛɛ no sɛ: Wo na ne wo nuanom gyina mfikyire pɛ sɛ wɔhu woɔ.

²¹Na ɔbua see wɔn sɛ: Me na ne me nuanom ne wɔn a wɔte Nyankopɔn asɛm na wɔdi soɔ.

²²Na ɛbaa sɛ da bi ɔne n’asuafoɔ no kɔtenaa kodoɔ mu, na ɔka kyerɛɛ wɔn sɛ: Momma yɛntwa nkɔ ɔtadeɛ no agya nohoa. Na wɔhare kɔe.

²³Na wɔrekorɔ no, ɔdae. Na mframa kɛseɛ bi bɔɔ huu baa ɔtadeɛ no so, na nsuo bu faa wɔn so, na wɔwɔ amanehunu mu.

²⁴Na wɔbaa ne nkyɛn bɛnyanee no sɛ: Owura, owura, yɛreyera! Na ɔsɔre teateaa mframa ne nsuo no aworɔ no; na ɛgyae yɛɛ dinn.

²⁵Na ɔsee wɔn sɛ: Mo gyidie wɔ he? Na wɔsuroe, na ɛyɛɛ wɔn nwanwa, na wɔsesee wɔn ho sɛ: Onipa bɛn ara ni na ɔhyɛ mframa ne nsuo mpo na ɛtie no yi?

²⁶Na wɔkɔduruu Gerasefoɔ asase a ɛwɔ Galilea ntentensoɔ so.

²⁷Na ɔsii fam no, ɔbarima bi a ahonhommɔne wɔ ne mu dadaada, a ɔfiri kuro no mu bɛhyiaa no, ɔnhyɛ atadeɛ, na ɔnte ɛdan biara mu, na mmom aboda mu na ɔte wɔ asieeɛ.

²⁸Na ɔhunuu Yesu no, ɔteaa mu denden hwee ase n’anim, na ɔde nne kɛseɛ kaa sɛ: Yesu, Onyankopɔn a ɔwɔ sorosoro no ba, ɛdeɛn na me ne wo wɔ yɛ? Mesrɛ wo sɛ nha me!

²⁹Ɛfiri sɛ waka akyerɛ honhom fi no sɛ ɔmfiri onipa no mu; (na daa na ɛkye no a, wɔde nkɔnsɔnkɔnsɔn ne mpokyerɛ gu no wɛn no, na ɔtete deɛ wɔde akyekyere no no mu. Na honhommɔne no pamm no kɔɔ anwea pradada so.)

³⁰Na Yesu bisaa no sɛ: Wo din de sɛn? Na ɔse: Ɛdɔm, ɛfiri sɛ ahonhommɔne pii akɔ ne mu.

³¹Na wɔsrɛɛ no sɛ ɔnnhyɛ wɔn mmma wɔnnkɔ bunu no mu.

³²Na mprakokuo kɛseɛ bi wɔ hɔ a wɔredidi wɔ bepɔ no soɔ; na wɔsrɛɛ no sɛ ɔmma wɔn kwan na wɔnkɔ wɔn mu. Na ɔmaa wɔn kwan.

³³Na ahonhommɔne no firii onipa no mu kɔɔ mprako no mu, na ekuo no bɔɔ kirididi sianee ɔbotan kuronkuron no kɔguu ɔtadeɛ no mu, na wɔmemee.

³⁴Na wɔn a wɔhwɛ wɔn soɔ no hunuu deɛ asie no, wɔdwanee, na wɔkɔkaa no kuro no ne nkuraaseɛ mu.

³⁵Na wɔfirii adi bɛhwɛɛ deɛ asie; na wɔbaa Yesu nkyɛn, na wɔbɛhunuu onipa a ahonhommɔne firii ne mu kɔeɛ no sɛ ɔte Yesu nan ase fira ntoma a n’adwene mu ateɛ; na wɔsuroe.

³⁶Na wɔn nso a wɔhunuiɛ no kaa sɛdeɛ ɛyɛeɛ na deɛ ɔwɔ ahonhommɔne no ho sanee no.

³⁷Na Gerasefoɔ asase a atwa ahyia no so nkurɔfoɔ nyinaa srɛɛ no sɛ ɔmfiri wɔn nkyɛn nkɔ, ɛfiri sɛ na ehu kɛseɛ aka wɔn. Na ɔsii kodoɔ mu sane kɔe.

³⁸Na ɔbarima no a ahonhommɔne firii ne mu no srɛɛ no sɛ ɔbɛtena ne nkyɛn. Nanso Yesu gyaa no kwan sɛ:

³⁹Sane kɔ wo fie, na kɔka ade kɛseɛ a Onyankopɔn ayɛ ama woɔ yi kyerɛ! Na ɔkɔ kɔkaa ade kɛseɛ a Yesu ayɛ ama no no kuro no mu nyinaa.

⁴⁰Na Yesu sane baeɛ no, nkurɔfokuo no gyee no; ɛfiri sɛ na wɔn nyinaa retwɛn no.

⁴¹Na hwɛ, ɔbarima bi a wɔfrɛ no Yairo a ɔyɛ hyiadan mu panin bae, na ɔbɛhwee Yesu nan ase srɛɛ no sɛ ɔmmra ne fie;

⁴²na ɔwɔ ɔbabaa korɔ a wadi bɛyɛ mfirinhyia dummienu, na ɔda hɔ rewu. Na ɔrekorɔ no, na nkurɔfoɔ akuakuo no kyere ne so.

⁴³Na ɔbaa bi a wanya mogyaguo mfirinhyia dummienu, na obiara antumi ansa no yadeɛ

⁴⁴bɛfirii n’akyi bɛkaa n’atadeɛ ano nnwo, na amonom hɔ ara ne mogyaguo no twae.

⁴⁵Na Yesu kaa sɛ: Hwan na ɔkaa me? Na wɔn nyinaa resan no, Petro kaa sɛ: Owura, nkurɔfoɔ akuakuo no akyere wo so, na wɔremia wo.

⁴⁶Na Yesu se: Obi aka me, na mahunu sɛ ahoɔden bi afiri me mu kɔ.

⁴⁷Na ɔbaa no hunuu sɛ ada adi no, ɔde ahopopoɔ ba bɛhwee n’anim, na ɔkaa adekodeɛ a enti ɔkɔkaa no ne sɛdeɛ ne ho sanee no amonom hɔ ara no kyerɛɛ no ɔman no nyinaa anim.

⁴⁸ Na ɔka kyerɛɛ no sɛ: Ɔbabaa, wo gyidie agye wo nkwa, kɔ asomdwoeɛ mu!

⁴⁹Na ɔrekasa no, obi firi hyiadan mu panin no fie bɛkaa sɛ: Wo babaa no awu, nha kyerɛkyerɛfoɔ no!

⁵⁰Na Yesu teeɛ no, ɔbuaa no sɛ: Nsuro, gye di ara, na ɔbɛnya nkwa.

⁵¹Na ɔbaa fie hɔ no, wamma obiara ankɔ mu, gye Petro, Yohane, Yakobo ne abɔfra no agya ne ne na.

⁵² Na wɔn nyinaa resu, na wɔregyam no. Na ɔse: Monnsu! Na ɔnwui, na wada.

⁵³Na wɔseree no, ɛfiri sɛ na wɔnim sɛ wawu.

⁵⁴Na ɔsɔɔ ne nsa frɛɛ no sɛ: Abɔfra, nyane!

⁵⁵Na ne honhom sane baa bio, na ɔsɔree ntɛmntɛm; na ɔhyɛɛ sɛ wɔmma no biribi nni.

⁵⁶ Na ɛyɛɛ n’awofoɔ ahodwiri; na ɔbaraa wɔn sɛ wɔnnka deɛ asie yi nnkyerɛ obiara.