Read Twi Asante Deuteronomium 11 Bible Online

Deuteronomium 11 - Twi Asante bible

Deuteronomium 11

¹Enti dɔ AWURADE wo Nyankopɔn, na hwɛ n’ahwɛdeɛ, n’ahyɛdeɛ ne n’atemmudeɛ ne ne mmara nsɛm nna nyinaa.

²Na monhunu nnɛ, (na ɛnyɛ me ne mo mma a wɔnnim na wɔnhunuiɛ no) monhunu AWURADE mo Nyankopɔn ntea, ne kɛseyɛ, ne nsa a ɛyɛ den ne ne basa a watene mu

³ne ne nsɛnkyerɛnneɛ ne ne nneyɛɛ a ɔyɛɛ no Misraim a ɔde yɛɛ Misraimhene Farao ne n’asase nyinaa,

⁴ ne deɛ ɔyɛɛ Misraim dɔm ne n’apɔnkɔ ne ne nteaseɛnam a wɔde reti mo a ɔmaa Mmɛwa Po mu nsuo bu faa wɔn soɔ, na AWURADE sɛee wɔn, de abɛduru nnɛ da yi,

⁵ne deɛ ɔyɛɛ mo ɛserɛ so bɛsii sɛ moduruu ha yi,

⁶ ne deɛ ɔyɛɛ Ruben ba Eliab mma Datan ne Abiram a asase buee n’anomu menee wɔn ne wɔn afie ne wɔn ntomadan ne wɔn a wɔdii wɔn akyire nyinaa firii Israel nyinaa mfimfini no;

⁷na mo ani ahunu AWURADE nneyɛɛ akɛseɛ a ɔyɛeɛ no nyinaa.

⁸Enti monni mmara nsɛm a merehyɛ mo nnɛ yi nyinaa so, na mo ho ayɛ den, na moakɔ akɔfa asase a moretwam akɔ so akɔfa no,

⁹ na mo nna aware asase a AWURADE kaa mo nananom ntam sɛ ɔde bɛma wɔn ne wɔn asefoɔ no so, asase a nufosuo ne ɛwoɔ sene wɔ soɔ.

¹⁰Na asase a worekɔ akɔfa no nte sɛ Misraim asase a mofiri so baeɛ a woguu w’aba na wode wo nan guguu so nsuo sɛ ɛfan turo mu no;

¹¹na asase a moretwam akɔ so akɔfa no yɛ mmepɔ ne mmonhwa asase a ɛnom ɔsoro nsuo,

¹² asase a AWURADE wo Nyankopɔn hwɛ so daa, a n’ani wɔ so firi afe mfitiaseɛ kɔsi afe awieeɛ.

¹³ Na sɛ motie me mmara nsɛm a mede merema mo nnɛ yi, sɛ mode mo akoma nyinaa bɛdɔ AWURADE mo Nyankopɔn na moasom no a,

¹⁴ɛnneɛ mɛma mo asase so osuo atɔ ne berɛ mu, asusɔ ne bereamporɔ, na woaboaboa w’aburoo ne wo nsa ne wo ngo ano,

¹⁵na mɛma wo serɛ so aba wira ama w’afieboa, na woadidi amee.

¹⁶Monhwɛ mo ho yie na wɔannaadaa mo akoma, na moammane ankɔsom anyame foforɔ ansɔre wɔn,

¹⁷ na AWURADE abufuo annɛre antia mo, na wanto ɔsoro mu sɛ osuo nntɔ na asase mmma ne nnɔbaeɛ, na moansɛe ntɛm so amfiri asase pa a AWURADE de rema mo no so.

¹⁸ Enti momfa me nsɛm yi nsie mo akoma ne mo kra mu, na fa yɛ nsɛnkyerɛnneɛ kyekyere wo nsa, na ɛnyɛ w’aniwa ntam nkaeɛ abotire;

¹⁹na momfa nkyerɛkyerɛ mo mma, na kasa ho w’afitena mu ne wo kwan so nanteɛ mu ne wo nna mu ne wo sɔreɛ mu;

²⁰na twerɛ gu wo fie aponnwa ho ne w’aponkɛseɛ so;

²¹na wo nna ne wo mma nna adɔɔso asase a AWURADE kaa wo nananom ntam sɛ ɔde bɛma wɔn no so, sɛdeɛ ɔsoro a ɛkata asase soɔ yi nna teɛ.

²²Na sɛ mobɛdi mmara nsɛm a merehyɛ mo yi so ayɛ, na moadɔ AWURADE mo Nyankopɔn anante n’akwan nyinaa so na moabata ne ho a,

²³ ɛnneɛ AWURADE bɛtutu amanaman yi nyinaa afiri mo anim, na moafa amanaman akɛseɛ a wɔyɛ den sene mo.

²⁴Baabiara a mo nan bɛtia no bɛyɛ mo deɛ, ɛfiri ɛserɛ so ne Lebanon, ɛfiri Asubɔntene Eufrate ho, kɔsi akyiri po no ano bɛyɛ mo asase.

²⁵Obiara rentumi nnyina mo anim; AWURADE mo Nyankopɔn de mo ho hu ne mo ho suro bɛgu asase a mobɛfa soɔ nyinaa so, sɛdeɛ ɔka kyerɛɛ mo no.

²⁶ Hwɛ, mede nhyira ne nnome meregu mo anim nnɛ:

²⁷ Sɛ motie AWURADE mo Nyankopɔn mmara nsɛm a merehyɛ mo nnɛ yi a, mobɛnya nhyira,

²⁸na sɛ moantie AWURADE mo Nyankopɔn mmara nsɛm na momane firi ɔkwan a merehyɛ mo nnɛ yi so kɔdi anyame foforɔ a monni wɔn akyiri a, mobɛnya nnome.

²⁹ Na sɛ AWURADE wo Nyankopɔn de wo duru asase a worekɔ akɔfa no so a, ka nhyira no Gerisim bepɔ so ne nnome no nso Ebal bepɔ so.

³⁰ Ɛnni Yordan agya, owiatɔeɛ kwan no akyi, Kanaanfoɔ a wɔte Araba asase so, Gilgal ntentensoɔ, More pɔ ho?

³¹Na morebɛtwa Yordan akɔ akɔfa asase a AWURADE mo Nyankopɔn de rema mo no, na mobɛfa atena so.

³²Enti monhwɛ yie na monyɛ ahyɛdeɛ ne atemmudeɛ a mede meresi mo anim nnɛ yi nyinaa.