Read Twi Asante Deuteronomium 15 Bible Online

Deuteronomium 15 - Twi Asante bible

Deuteronomium 15

¹ Mfirinhyia nson biara awieeɛ no, gya biribi mu kyɛ.

²Na sɛdeɛ wɔnnyaa mu nkyɛ nie: Ɔdefɛmni biara a ɔde biribi afɛm ne yɔnko mfa nkyɛ no; ɔnnhyɛ ne yɔnko ne ne nua sɛ ɔntua, ɛfiri sɛ wɔapae no adekyɛ afe ama AWURADE.

³Ɔnanani deɛ, hyɛ no ma no ntua, nanso wo biribi a ɛwɔ wo nua nkyɛn deɛ, fa kyɛ.

⁴Anka ɛnsɛ sɛ ohiani wɔ wo mu, ɛfiri sɛ hyira na AWURADE bɛhyira wo, asase a AWURADE wo Nyankopɔn de rema wo sɛ agyapadeɛ a kɔfa no so.

⁵Tie nko na tie AWURADE wo Nyankopɔn nne sɛ wobɛhwɛ adi mmara nsɛm a merehyɛ wo nnɛ yi nyinaa so.

⁶ Na AWURADE wo Nyankopɔn bɛhyira wo sɛdeɛ ɔka kyerɛɛ woɔ no, na wode afɛm amanaman pii, na wo deɛ, worenkɔfɛm, na wobɛdi amanaman pii so, na wo deɛ, wɔrenni wo so.

⁷ Sɛ wo nuanom mu biara dane ohiani wɔ kuro biara apono mu, w’asase a AWURADE wo Nyankopɔn de rema woɔ no so a, mpirim w’akoma, na mmua wo nsa so ntia wo nua hiani.

⁸ Na bue wo nsam ma no, na fɛm no deɛ ɛbɛso ne hia a ɛhia no no.

⁹Hwɛ yie na w’akomam amma ahuhusɛm bi sɛ: Afe a ɛtɔ so nson, gyae-mukyɛ afe no abɛn, na woannya wo nua hiani no ho adwemmɔne sɛ woremma no hwee, na wanteam amfrɛ AWURADE antia wo, na annane wo bɔne.

¹⁰Yi wo yam ma no, na mma no nnyɛ w’akoma ahi sɛ wobɛma no; na saa adeɛ yi nti AWURADE wo Nyankopɔn bɛhyira wo, wo nnwuma nyinaa ne deɛ wode wo nsa bɛka nyinaa mu.

¹¹ Na ohiani rempa w’asase so, enti na merehyɛ wo sɛ, bue wo nsam ma wo nua, wo mmɔborɔni ne wo hiani a ɔwɔ w’asase soɔ.

¹² Sɛ wɔtɔn wo nua Hebrini, ɔbarima anaa ɔbaa ma wo, na ɔsom wo mfirinhyia nsia a, afe a ɛtɔ so nson no gya no kwan ma no mfiri wo nkyɛn mfa ne ho nkɔdi.

¹³Na sɛ woregya no kwan ama no afa ne ho afiri wo nkyɛn akɔdi a, mma no nnkɔ nsapan:

¹⁴Fa wo nnwan ne w’ayuporebea ne wo nsakyi-amena no bi kyɛ no; adeɛ a AWURADE wo Nyankopɔn de ahyira woɔ no bi na fa ma no.

¹⁵ Na kae sɛ woyɛɛ akoa Misraim asase so, na AWURADE wo Nyankopɔn gyee wo; enti na nnɛ merehyɛ wo mmara yi.

¹⁶Na sɛ ɛba sɛ ɔka kyerɛ wo sɛ: Meremfiri wo nkyɛn, na medɔ wo ne wo fie, ɛfiri sɛ ɔdi yie wɔ wo nkyɛn a,

¹⁷ɛnneɛ fa fitiiɛ fiti n’aso mu aponnwa ho na ɔnyɛ w’akoa daa; na w’afenaa nso yɛ no saa ara.

¹⁸Mma no nnyɛ wo den sɛ wobɛgya no kwan na wafa ne ho afiri wo nkyɛn akɔdie, na wasom wo mfirinhyia nsia ayɛ ɔpaani akatua mmienu ho adeɛ; na AWURADE wo Nyankopɔn ahyira wo deɛ woyɛ nyinaa mu.

¹⁹ W’anantwie ne wo nnwan mmakan anini a wɔbɛwoɔ no, yɛ wɔn kronkron ma AWURADE wo Nyankopɔn. Mfa wo nantwie abakan nyɛ adwuma, na ntwitwa wo nnwan abakan ho.

²⁰ AWURADE wo Nyankopɔn anim na di no daa afirinhyia, faako a AWURADE bɛyie no, wo ne wo fie.

²¹ Na sɛ ɛdɛm bi wɔ ne ho, ɔtɔ apakye anaasɛ n’ani afira, anaasɛ ɛdɛmmɔne biara wɔ ne ho a, mfa no mmɔ AWURADE wo Nyankopɔn afɔdeɛ;

²² wo kuro apono mu na die, deɛ ne ho nteɛ ne deɛ ne ho teɛ nyinaa, sɛdeɛ wɔdi ɔwansane ne ɔforoteɛ no;

²³ ne mogya nko na nnie, hwie gu fam sɛ nsuo.