Read Twi Asante Deuteronomium 33 Bible Online

Deuteronomium 33 - Twi Asante bible

Deuteronomium 33

¹ Na yei ne nhyira a Nyankopɔn nipa Mose de hyiraa Israelfoɔ ansa na ɔrewuo. Na ɔkaa sɛ:

² AWURADE firi Sinai bae, na ɔpue firii Seir maa wɔn, ɔharan firii Paran bepɔ so; ɔfiri akronkronfoɔ ɔpedu no mu na ɛbaeɛ, ogya a ɛyɛ mmara[3] ma wɔn wɔ ne nifa mu.

³Aane, ɔdɔ ne man, n’akronkronfoɔ nyinaa wɔ ne nsam. Na wɔn deɛ, wɔtete wo nan ase na wɔtie w’asɛm.

⁴Mmara na Mose hyɛɛ yɛn, Yakob badwa agyapadeɛ;

⁵ na ɔyɛɛ Yesurun mu hene, ɛda a ɔman no atitire hyiaeɛ na Israel mmusuakuo nyinaa hyiaa faako no.

⁶Ruben nnya nkwa na ɔnnwu, na ne mmarima nso mma wɔn ase nhye.

⁷Na Yuda nso deɛ nie, ɔse: O AWURADE, tie Yuda nne, na fa no kɔ ne man nkyɛn; ma wo nsa nko mma no, na yɛ no ɔboafoɔ firi n’ahohiahiafoɔ nsam.

⁸ Na Lewi ho deɛ, ɔkaa sɛ: Wo nokorɛ ne wo hann wɔ wo hotefoɔ no, deɛ wosɔɔ no hwɛɛ Masa hɔ na wo ne no ham Meriba asuo ho no.

⁹ Ɔno a ɔkaa wɔ n’agya ne ne na ho sɛ: Menni wɔn! Na wammu ne nuanom, na ɔpoo ne mma. Na wɔdi wo nsɛm so, na wɔkora w’apam;

¹⁰wɔde w’atemmudeɛ bɛkyerɛ Yakob, na wɔde wo mmara akyerɛ Israel; wɔde aduhwam bɛtua wo hwene ano, na wɔde afɔdeɛ amuamu abɛgu w’afɔrebukyia so.

¹¹AWURADE, hyira n’ahonyadeɛ so, ma ne nsa ano adwuma nsɔ w’ani; bobɔ wɔn a wɔsɔre tia no no dwonku, ne wɔn a wɔtane no, na wɔansɔre bio.

¹²Benyamin ho nso, ɔkaa sɛ: AWURADE dɔfo bɛtena ne nkyɛn dwoodwoo; ɔkata ne so daa nyinaa, na ɔbɛtena ne mmatiri so.

¹³Na Yosef ho nso, ɔkaa sɛ: AWURADE nhyira n’asase; ɔmma no ɔsoro nnepa, obosuo ne ebunu a ɛtrɛtrɛ aseɛ no deɛ,

¹⁴ne owia mu nnɔbaeɛ nnepa, ne deɛ asrane ma no fifire mu nnepa,

¹⁵ne tete mmepɔ atifi ne daapem nkokoɔ nnepa,

¹⁶ ne asase ne ne mayɛ mu nnepa, na deɛ ɔte nkyɛkyerɛ no mu no anisɔ; ɔmma no mmra Yosef atifi, ne ne nuanom mu hotuafoɔ no mpampam.

¹⁷Ne nantwinini abakan, animuonyam wɔ no, na n’abɛn yɛ ɛkoɔ abɛn; ɛno na ɔde bɛsunsum aman nyinaa aguo akɔduru asase ano. Na wɔn ne Efraim apedu no, Manase mpempem ne no.

¹⁸Na Sebulon ho nso, ɔkaa sɛ: Sebulon, ma w’ani nnye w’adifire mu, ne Isakar, wo ntomadan mu.

¹⁹Wɔbɛfrɛ aman akɔ bepɔ no so, ɛhɔ na wɔbɛbɔ tenenee afɔdeɛ; na wɔbɛfefe ɛpo mu mmorosoɔ ne anwea mu ademudeɛ a ahunta.

²⁰Na Gad ho nso, ɔkaa sɛ: Nhyira ne deɛ ɔtrɛ Gad mu; ɔbutu hɔ sɛ gyatabereɛ, ɔtete basa ne mpampam;

²¹ ɔno na ɔyii deɛ ɛdi kan faeɛ, na ɛhɔ na wɔakora mmarahyɛfoɔ no kyɛfa; na ɔnam di ɔman no atitire mu, ɔyɛ AWURADE teneneedeɛ ne n’atemmudeɛ wɔ Israel.

²²Na Dan ho nso, ɔkaa sɛ: Dan yɛ gyataburuwa, ɔhuri firi Basan.

²³Na Naftali ho nso, ɔkaa sɛ: Naftali a anisɔ amee no na AWURADE nhyira ayɛ no ma, fa ɛpo ne ahuhuro asase no di so.

²⁴Na Aser ho nso, ɔkaa sɛ: Ma wɔmfa mma nhyira Aser, ɔnyɛ deɛ ɔsɔ ani ne nuanom mu, na ɔmfa ne nan mmɔ ngo mu.

²⁵Dadeɛ ne kɔbere mfrafraeɛ nyɛ w’adaban, sɛ wo nna teɛ no, saa na w’ahoɔden nyɛ.

²⁶ Obi nni hɔ a ɔte sɛ Yesurun Nyankopɔn! Ɔnam soro di boa wo, ɔde ne kɛseyɛ nam mununkum mu.

²⁷Tete Nyankopɔn ne wo tenabea, na aseɛ na daapem abasa no wɔ. Na ɔbɛpamo ɔtamfoɔ w’anim, na waka sɛ: Dwɛre wɔn.

²⁸ Na Israel bɛtena hɔ dwoodwoo, Yakob asubura no nkutoo, ɔbɛtena aburoo ne nsa asase so; ne soro nso bɛsosɔ obosuo.

²⁹ Nhyira ne wo, Israel, hwan na ɔte sɛ woɔ, ɔman a wɔanya AWURADE mu nkwagyeɛ! Ɔyɛ wo mmoa kyɛm, na ɔyɛ wo kɛseyɛ nkrantɛ. W’atamfo bɛwae ama wo, na wo deɛ, wobɛtiatia wɔn sorɔnsorɔmmea so.