Read Twi Asante Deuteronomium 6 Bible Online

Deuteronomium 6 - Twi Asante bible

Deuteronomium 6

¹Na yei ne mmara nsɛm, ahyɛdeɛ ne atemmudeɛ a AWURADE mo Nyankopɔn ahyɛ sɛ wɔnkyerɛkyerɛ mo na monyɛ asase a moretwam akɔfa no soɔ,

²na woasuro AWURADE wo Nyankopɔn adi n’ahyɛdeɛ ne ne mmara nsɛm a merehyɛ woɔ yi nyinaa so, wo ne wo ba ne wo ba ba, wo nkwa nna nyinaa, na wo nna aware.

³Enti, Israel, tie, na hwɛ yɛ, na asi wo yie, na woadɔɔso pii, sɛdeɛ AWURADE wo nananom Nyankopɔn ka kyerɛɛ woɔ no, asase a nufosuo ne ɛwoɔ sene soɔ no so.

⁴ Israel, tie, AWURADE yɛn Nyankopɔn yɛ AWURADE koro.

⁵ Na fa w’akoma nyinaa ne wo kra nyinaa ne w’ahoɔden nyinaa dɔ AWURADE wo Nyankopɔn.

⁶ Na nsɛm yi a merehyɛ wo nnɛ yi nna w’akoma so;

⁷ na fa kyerɛkyerɛ wo mma yie, na kasa ho, w’afitena mu ne wo kwan so nanteɛ mu ne wo nna mu ne wo sɔreɛ mu;

⁸ na fa yɛ nsɛnkyerɛnneɛ kyekyere wo nsa, na ɛnyɛ w’aniwa ntam nkaeɛ abotire;

⁹na twerɛ gu wo fie aponnwa ho ne w’aponkɛseɛ so.

¹⁰Na sɛ AWURADE wo Nyankopɔn nya de wo duru asase a ɔkaa wo nananom Abraham, Isak ne Yakob ntam sɛ ɔde bɛma woɔ no so, nkuro akɛseɛ a ɛyɛ fɛ a ɛnyɛ wo na wokyekyereeɛ,

¹¹ ne adan a nnepa nyinaa ayɛ no amaama a ɛnyɛ wo na wode hyehyɛɛ mu, ne mmura a wɔatutuo a ɛnyɛ wo na wotutuiɛ, bobe nturo ne ngodua nturo a ɛnyɛ wo na wotetɛeɛ, na sɛ wodidi mee a,

¹²hwɛ yie na wo werɛ amfiri AWURADE a ɔyii wo Misraim asase so firii nkoafie mu no:

¹³ AWURADE wo Nyankopɔn na suro no, na ɔno na som no, na ne din ho ntam na ka;

¹⁴monnni anyame foforɔ a wɔfiri amanaman a wɔgugu mo ho no anyame no akyi;

¹⁵ na AWURADE wo Nyankopɔn a ɔwɔ wo mu no yɛ Onyankopɔn ninkufoɔ, na AWURADE wo Nyankopɔn abufuo annɛre antia wo, na wansɛe wo amfiri asase ani.

¹⁶ Monnsɔ AWURADE mo Nyankopɔn nnhwɛ, sɛdeɛ mosɔɔ no hwɛɛ Masa hɔ no;

¹⁷monni AWURADE mo Nyankopɔn mmara nsɛm ne n’adansesɛm ne n’ahyɛdeɛ a wahyɛ mo no so pɛpɛɛpɛ;

¹⁸na yɛ deɛ ɛtene na ɛyɛ AWURADE ani soɔ, na asi wo yie, na woakɔ akɔfa asase pa a AWURADE kaa ho ntam kyerɛɛ wo nananom no,

¹⁹ na watu w’atamfo nyinaa afiri w’anim, sɛdeɛ AWURADE kaeɛ no.

²⁰ Sɛ ɔkyena bi, wo ba bisa wo sɛ: Adansesɛm ne ahyɛdeɛ ne atemmudeɛ bɛn na AWURADE yɛn Nyankopɔn de hyɛɛ mo yi?

²¹ Ka kyerɛ wo ba no sɛ: Na anka yɛyɛ Farao nkoa Misraim, na AWURADE de nsa a ɛyɛ den yii yɛn firii Misraim;

²²na AWURADE maa nsɛnkyerɛnneɛ ne anwanwadeɛ akɛseɛ a ɛyɛ hu baa Misraim, Farao ne ne fie nyinaa so wɔ yɛn anim;

²³na yɛn deɛ, ɔyii yɛn firii hɔ sɛ ɔde yɛn reba de asase a ɔkaa ho ntam kyerɛɛ yɛn nananom no abɛma yɛn.

²⁴Na AWURADE hyɛɛ yɛn sɛ yɛnyɛ ahyɛdeɛ yi nyinaa na yɛnsuro AWURADE yɛn Nyankopɔn, na ɛnsi yɛn yie nna nyinaa, na ɔmma yɛnnya nkwa, sɛdeɛ ɛteɛ nnɛ yi;

²⁵na sɛ yɛhwɛ di mmara nsɛm yi nyinaa so, AWURADE yɛn Nyankopɔn anim, sɛdeɛ ɔhyɛɛ yɛn no a, ɛbɛyɛ yɛn ateneneefoɔ.