Read Twi Asante Yohane 20 Bible Online

Yohane 20 - Twi Asante bible

Yohane 20

¹Na da a ɛdi nnawɔtwe kan anɔpatutuutu a esum da so wɔ mu no, Maria Magdalene baa ɔboda no ho, na ɔbɛhunuu sɛ wɔayi ɔboɔ no afiri ɛda no ano.

² Ɛnna ɔtuu mmirika baa Simon Petro ne osuani baako a Yesu dɔ no no nkyɛn, na ɔsee wɔn sɛ: Wɔayi Awurade afiri ɛda no mu, na yɛnnim faako a wɔde no akɔtoɔ.

³Ɛnna Petro ne osuani baako no firii adi baa ɛda no ho.

⁴Na wɔn baanu nyinaa tutuu mmirika, na osuani baako no yɛɛ ntɛm siane Petro ho, na ɔkɔduruu ɛda no ho kane.

⁵Na ɔbrɛɛ ne mu ase hwɛɛ mu no, n’ani bɔɔ nwera no so sɛ ɛgu hɔ deɛ, nanso wankɔ mu.

⁶Ɛnna Simon Petro dii n’akyiri baeɛ, na ɔkɔɔ ɛda no mu, na ɔhwɛɛ nwera a ɛgu hɔ no

⁷ ne duku a wɔde bɔɔ ne tire nanso sɛ ɛngu nwera no ho, na mmom wɔabobɔ ɛno nkutoo da baabi no.

⁸Ɛno na afei osuani baako a ɔduruu ɛda no ho kane no nso hyɛnee mu, na ɔhunui, na ɔgye dii.

⁹ Na na wɔnnya nhunuu twerɛsɛm no, sɛ ɛtwa sɛ ɔsɔre firi awufoɔ mu no.

¹⁰Ɛnna asuafoɔ no sane baa wɔn fie bio.

¹¹Na Maria deɛ, na ɔgyina ɔboda no ho resu. Ɛnna ɔresu no, ɔbɔɔ ne mu ase hwɛɛ ɛda no mu,

¹²na ɔhunuu abɔfoɔ a wɔhyɛ ntadeɛ fitaa sɛ wɔtete hɔ, ɔbaako te atifi, na ɔbaako te anafoɔ, faako a Yesu amu daeɛ hɔ.

¹³Na wɔbisaa no sɛ: Ɔbaa, adɛn na woresu? Ɔsee wɔn sɛ: Ɛfiri sɛ wɔafa me wura kɔ, na mennim faako a wɔde no akɔtoɔ.

¹⁴Na ɔkaa saa no, ɔdanee ne ho hwɛɛ n’akyi, na ɔhunuu Yesu sɛ ɔgyina hɔ, na na ɔnnim sɛ ɛyɛ Yesu.

¹⁵Yesu see no sɛ: Ɔbaa, adɛn na woresu? Worehwehwɛ hwan? Na ɔno deɛ, ɔsusuu sɛ ɛyɛ turom hɔ hwɛfoɔ nti, ɔsee no sɛ: Owura, sɛ woafa no afiri ha a, kyerɛ me faako a wode no akɔtoɔ, na menkɔfa no!

¹⁶Yesu see no sɛ: Maria! Na ɔdanee ne ho see no Hebri kasa mu sɛ: Raboni! (aseɛ ne sɛ: Ɔkyerɛkyerɛfoɔ).

¹⁷ Yesu see no sɛ: Mfa wo nsa nka me, na mennya menkɔɔ ɔsoro, m’Agya nkyɛn. Na kɔ me nuanom nkyɛn kɔka kyerɛ wɔn sɛ merebɛkɔ ɔsoro, m’Agya ne mo Agya ne me Nyankopɔn ne mo Nyankopɔn nkyɛn.

¹⁸Na Maria Magdalene ba bɛka kyerɛɛ asuafoɔ no sɛ: Mahunu Awurade; ne nsɛm a ɔka kyerɛɛ no no nyinaa.

¹⁹Ɛnna da a ɛdi nnawɔtwe kan no ara, ɛduruu anwummerɛ na Yudafoɔ ho hu nti wɔatoto apono mu faako a asuafoɔ no ahyia hɔ no, Yesu ba bɛgyinaa wɔn mfimfini, na ɔsee wɔn sɛ: Asomdwoeɛ nka mo!

²⁰ Na ɔkaa saa no, ɔde ne nsa ne ne mfe mu kyerɛɛ wɔn. Na asuafoɔ no hunuu Awurade no, wɔn ani gyeeɛ.

²¹ Ɛnna Yesu see wɔn bio sɛ: Asomdwoeɛ nka mo! Sɛdeɛ Agya no asoma me no, me nso mesoma mo.

²²Na ɔkaa saa no, ɔhome guu wɔn so, na ɔsee wɔn sɛ: Monnye Honhom Kronkron!

²³ Wɔn a mode wɔn bɔne kyɛ wɔn no, wɔde akyɛ wɔn; na wɔn a momma wɔn bɔne tena hɔ no, wɔama no atena hɔ.

²⁴ Na Toma, dummienu no mu baako a wɔfrɛ no Ata no, nni wɔn mu na Yesu baeɛ.

²⁵ Ɛnna asuafoɔ no see no sɛ: Yɛahunu Awurade. Na Toma ka kyerɛɛ wɔn sɛ: Sɛ manhunu ne nsam nnadewa no ananmu, na mamfa me nsateaa manka nnadewa no ananmu a, merennye menni.

²⁶ Na ɛno akyiri nnawɔtwe, na n’asuafoɔ no wɔ ɛdan mu bio, na Toma ka wɔn ho. Na Yesu bae, nso na apono no mu atoto, na ɔbɛgyinaa wɔn mfimfini, na ɔkaa sɛ: Asomdwoeɛ nka mo!

²⁷Ɛnna afei ɔsee Toma sɛ: Fa wo nsateaa bra ha na bɛhwɛ me nsamu, na fa wo nsa bɛka me mfe mu, na nyɛ okyinnyegyefoɔ, na gye di!

²⁸ Toma bua see no sɛ: M’Awurade ne me Nyankopɔn!

²⁹ Yesu see no sɛ: Toma, sɛ woahu me nti na woagye adie. Nhyira ne wɔn a wɔnhunuiɛ, na wɔgye die.

³⁰Na afei, nsɛnkyerɛnneɛ pii nso wɔ hɔ a Yesu yɛɛ no asuafoɔ no anim a wɔantwerɛ no nwoma yi mu.

³¹ Na yeinom na wɔatwerɛ sɛ monnye nni sɛ Yesu ne Kristo no, Nyankopɔn Ba, na mogye di a, moanya nkwa ne din mu.