Read Twi Asante Yohane 9 Bible Online

Yohane 9 - Twi Asante bible

Yohane 9

¹Na ɔretwam no, ɔhunuu onipa bi a n’ani afira firi n’awoɔ mu.

² Na n’asuafoɔ bisaa no sɛ: Rabi, hwan na ɔyɛɛ bɔne, oyi anaa n’awofoɔ, sɛ wɔwoo no onifirani yi?

³ Yesu buaa sɛ: Ɛnyɛ oyi, anaa n’awofoɔ na wɔyɛɛ bɔne, na mmom sɛ Nyankopɔn nnwuma bɛda adi wɔ ne mu ntira.

⁴ Ɛsɛ yɛn sɛ adekyeeɛ wɔ hɔ yi, yɛyɛ deɛ ɔsomaa me no nnwuma; anadwo reba a obiara ntumi nyɛ adwuma.

⁵ Mewɔ wiase yi, mene wiase hann.

⁶ Ɔkaa saa no, ɔtoo ntasuo guu fam, na ɔde ntasuo no fraa dɔteɛ, na ɔde dɔteɛ no sraa onifirani no aniwa so,

⁷na ɔka kyerɛɛ no sɛ: Kɔ, kɔhohoro so wɔ Ɔtadeɛ Siloa mu (ne nkyerɛaseɛ ne: Deɛ wɔasoma no). Ɛnna ɔsii mu kɔeɛ kɔhohoroo soɔ, na ɔbaeɛ, na ɔhunu adeɛ.

⁸Ɛnna amannifoɔ ne wɔn a kane wɔhunuu no sɛ ɔyɛ ɔsrɛsrɛfoɔ no kaa sɛ: Ɛnyɛ oyi na na ɔte hɔ srɛsrɛ adeɛ no?

⁹Ebinom se: Ɔno ni! Na ebinom nso se: Ɔsɛ no. Na ɔno ara se: Mene no.

¹⁰Ɛnna wɔbisaa no sɛ: Ɛyɛɛ dɛn na w’ani bueeɛ?

¹¹Ɔbua kaa sɛ: Onipa bi a wɔfrɛ no Yesu na ɔpɔtɔɔ dɔteɛ de sraa m’ani soɔ, na ɔka kyerɛɛ me sɛ: Kɔ Ɔtadeɛ Siloa mu kɔhohoro so. Na mekɔ mekɔhohoroo soɔ no, na mehunuu adeɛ.

¹²Ɛnna wɔbisaa no sɛ: Ɔwɔ he? Ɔse: Mennim.

¹³Wɔde deɛ anka ɔyɛ onifirani no kɔɔ Farisifoɔ nkyɛn.

¹⁴ Nso da a Yesu pɔtɔɔ dɔteɛ na ɔbuee n’ani no yɛ homeda.

¹⁵Ɛnna Farisifoɔ no nso bisaa no bio sɛdeɛ ɛyɛeɛ na ɔhunuu adeɛ. Na ɔsee wɔn sɛ: Dɔteɛ na ɔde sraa m’ani soɔ, na mekɔhohoroo soɔ, na mehunu adeɛ yi.

¹⁶ Ɛnna Farisifoɔ no mu bi kaa sɛ: Onipa yi mfiri Nyankopɔn nkyɛn, ɛfiri sɛ, ɔnni homeda. Ebinom se: Ɛbɛyɛ dɛn na onipa debɔneyɛni bɛtumi ayɛ nsɛnkyerɛnneɛ a ɛte seyie? Na mpaepaemu baa wɔn mu.

¹⁷Ɛnna wɔsee onifirani no bio sɛ: Wo deɛ, woka deɛn ne ho, sɛ ɔbuee w’ani no? Na ɔse: Ɔyɛ odiyifoɔ.

¹⁸Nso na Yudafoɔ no nnye ne ho nsɛm no nni, sɛ anka ɔyɛ onifirani na ɔhunuu adeɛ, de kɔsii sɛ wɔfrɛɛ deɛ ɔhunuu adeɛ no awofoɔ,

¹⁹na wɔbisaa wɔn sɛ: Mo ba a moka sɛ wɔwoo no onifirani no ni anaa? Afei ɛyɛɛ dɛn na ɔhunu adeɛ yi?

²⁰N’awofoɔ buaa wɔn kaa sɛ: Yɛnim sɛ yɛn ba ni, na wɔwoo no onifirani;

²¹na sɛ ɛyɛeɛ na afei ɔhunu adeɛ yi deɛ, yɛnnim. Na bio nso onipa korɔ a ɔbuee n’ani no, yɛn deɛ, yɛnnim; mommisa no, wanyini, na ɔno ara bɛkasa ama ne ho.

²² N’awofoɔ kaa yei, ɛfiri sɛ na wɔsuro Yudafoɔ no; na Yudafoɔ no apam dada sɛ, sɛ obi pae mu ka sɛ ɔno ne Kristo no a, wɔbɛtu no afiri hyiadan mu.

²³Yei nti na n’awofoɔ kaa sɛ: Wanyini, mommisa no.

²⁴ Ɛnna wɔfrɛɛ onipa a anka ɔyɛ onifirani no ne mprenu soɔ, na wɔsee no sɛ: Fa animuonyam ma Onyankopɔn! Yɛn deɛ, yɛnim sɛ onipa yi yɛ ɔdebɔneyɛni.

²⁵Ɛnna ɔbua kaa sɛ: Sɛ ɔyɛ ɔdebɔneyɛni a, mennim; adeɛ baako na menim, sɛ na anka meyɛ onifirani, na afei deɛ mehunu adeɛ.

²⁶Na wɔsee no sɛ: Ɛdeɛn na ɔyɛɛ woɔ? Ɔbuee w’ani no sɛn?

²⁷Ɔbuaa wɔn sɛ: Maka makyerɛ mo dada, na moante? Ɛdeɛn na mopɛ sɛ mote bio? Mo nso mopɛ sɛ modane n’asuafoɔ anaa?

²⁸Wɔyaa no, na wɔkaa sɛ: Wo na woyɛ ne suani; na yɛn deɛ, Mose asuafoɔ ne yɛn.

²⁹Yɛnim sɛ Onyankopɔn kasa kyerɛɛ Mose; na oyi deɛ, yɛnnim faako a ɔfire.

³⁰Onipa no bua see wɔn sɛ: Yei na ɛyɛ nwanwa, sɛ monnim faako a ɔfire, nanso ɔbuee m’ani.

³¹ Na yɛnim sɛ Onyankopɔn ntie adebɔneyɛfoɔ; na sɛ obi fɛre Onyankopɔn na ɔyɛ deɛ ɔpɛ a, ɔno na ɔtie no.

³²Ɛfiri wiase mfitiaseɛ, wɔntee sɛ obi abue deɛ wɔwoo no onifirani ani pɛn.

³³ Sɛ oyi mfiri Nyankopɔn nkyɛn a, anka ɔrentumi nyɛ hwee.

³⁴ Wɔbua see no sɛ: Wo deɛ, bɔne mu koraa na wɔwoo woɔ, na wo na wokyerɛkyerɛ yɛn? Na wɔpamm no firii adi.

³⁵Yesu tee sɛ wɔapam no afiri adie; na ɔhunuu no no, ɔbisaa sɛ: Wogye Onipa Ba no di anaa?

³⁶Ɔbuaa sɛ: Hwan ne no, Owura, na mennye no menni?

³⁷ Na Yesu see no sɛ: Woahu no, na deɛ ɔne wo rekasa yi, ɔne no.

³⁸Na ɔse: Megye medi, Awurade! Na ɔkoto sɔree no.

³⁹ Na Yesu kaa sɛ: Atemmuo nti na mebaa wiase, na wɔn a wɔnhunu adeɛ no ahunu, na wɔn a wɔhunu adeɛ no adane anifirafoɔ.

⁴⁰Na Farisifoɔ no mu bi a wɔne no wɔ hɔ no tee nsɛm yi, na wɔsee no sɛ: Na yɛn nso yɛyɛ anifirafoɔ?

⁴¹ Yesu bua see wɔn sɛ: Sɛ moyɛ anifirafoɔ a, anka monni bɔne; na sɛ mose: Yɛhunu adeɛ enti, na mo bɔne aka.