Read Twi Asante Asomafoɔ 28 Bible Online

Asomafoɔ 28 - Twi Asante bible

Asomafoɔ 28

¹Na yɛfirii mu firiiɛ no, ɛno na yɛtee sɛ wɔfrɛ supɔ no Malta.

² Na nnipa a wɔwɔ hɔ no yɛɛ yɛn adɔeɛ kɛseɛ; na osuo a ɛretɔ ne awɔ no nti, wɔsɔɔ ogya maa yɛn gyee yɛn nyinaa fɛ so.

³Na Paulo boaboaa mmabowa ano de guu ogya no soɔ no, ɔhyeɛ no nti, ahuritia bi firii mu bɛbankyeree ne nsa ho.

⁴Na nnipa a wɔwɔ hɔ no hunuu aboa no sɛ ɔsɛne ne nsa ho no, wɔsesee wɔn ho wɔn ho sɛ: Ampa ara, onipa yi yɛ owudini a wanya nkwa afiri ɛpo mu deɛ, nanso aweretɔ nti, ɛremma no nnya nkwa.

⁵ Na ɔpetee aboa no too ogya mu, nso hwee anyɛ no.

⁶ Na wɔn deɛ, na wɔn ani da so sɛ Paulo rebɛhonhono anaasɛ ɔrebɛhwe ase awu mpofirim; nanso wɔhwɛe hwɛeɛ na wɔhunuu sɛ biribiara anyɛ no no, wɔsesaa wɔn adwene kaa sɛ gyama ɔyɛ onyame bi.

⁷Nso ɛhɔnom ara na supɔ no so otitire a ne din de Publio no asase wɔ; na ɔgyee yɛn, yɛɛ yɛn hɔhoɔ nnansa, hwɛɛ yɛn yie.

⁸Na ɛbaa sɛ na Publio n’agya da hɔ yare huraeɛ ne konkurowa; enti Paulo kɔɔ ne nkyɛn, na ɔbɔɔ mpaeɛ, de ne nsa guu ne so saa no yadeɛ.

⁹Yei akyiri no, wɔn a aka nso a wɔyare supɔ no soɔ no bae, maa ɔsaa wɔn yadeɛ.

¹⁰Wɔdii yɛn ni pii, na yɛfiri hɔ rekorɔ no, wɔde nnoɔma a ɛhia yɛn no brɛɛ yɛn.

¹¹Na abosome mmiɛnsa akyiri no, yɛfaa Aleksandria suhyɛn bi a ɛbɛdii awɔ berɛ supɔ no so a ne nsɛnkyerɛnneɛ ne Ata-ne-Ata no mu kɔe.

¹²Na yɛkɔgyinaa Sirakuse no, yɛdii hɔ nnansa.

¹³Ɛhɔ na yɛfiri konton kɔduruu Regio, na dafua akyiri no, anafoɔ mframa bɔe, na adeɛ kyeeɛ no, yɛkɔduruu Puteoli.

¹⁴Ɛhɔ na yɛhunuu anuanom bie, na wɔsrɛɛ yɛn sɛ yɛntena wɔn nkyɛn nnanson. Na yɛfiri hɔ kɔduruu Roma.

¹⁵Ɛhɔ na anuanom a wɔtee yɛn nka no firi bɛhyiaa yɛn Apia dwa mu ne akuraa bi a ɛde Nsadan-Mmiɛnsa, na Paulo hunuu wɔn no, ɔdaa Onyankopɔn ase, na ɔmaa ne bo tɔɔ ne yam.

¹⁶ Na yɛduruu Roma no, wɔmaa Paulo kwan sɛ ɔne ɔsraani a ɔhwɛ no no nkɔtena faako a ɔpɛ.

¹⁷ Na ɛbaa sɛ nnansa akyiri no, Paulo frɛfrɛɛ Yudafoɔ atitire no hyiae; na wɔbaeɛ no, ɔka kyerɛɛ wɔn sɛ: Anuanom, manyɛ biribi mantia ɔman anaa yɛn agyanom amanneɛ deɛ, nanso wɔkyeree me Yerusalem de me hyɛɛ Romafoɔ nsa.

¹⁸Na wɔn nso, wɔhwehwɛɛ asɛm no mu no, wɔpɛɛ sɛ anka wɔgyaa me, ɛfiri sɛ menyɛɛ adeɛ biara a ɛfata okum.

¹⁹ Nanso Yudafoɔ kasa tiaeɛ nti, na ɛtwa sɛ mede m’asɛm mekɔdan Kaesare; na ɛnyɛ sɛ me ne me man wɔ nkuro bi.

²⁰ Afei yei nti na mefrɛɛ mo, sɛ mɛhu mo, na makasa makyerɛ mo; ɛfiri sɛ Israel anidasoɔ nti na wɔde nkɔnsɔnkɔnsɔn yi agu me yi.

²¹Na wɔka kyerɛɛ no sɛ: Yɛn deɛ, yɛnnyaa wo ho nwoma bi mfirii Yudea, nanso anuanom no mu biara mma mmɛbɔɔ kaseɛ, anaasɛ ɔmmɛkaa wo ho asɛmmɔne bi.

²² Na yɛpɛ sɛ yɛtie deɛ wo ara wodwene, na fekuo yi deɛ, yɛnim sɛ wɔkasa tia wɔ mmaa nyinaa.

²³Na wɔhyɛɛ no da no, nnipa bebree baa ne nkyɛn faako a ɔteɛ hɔ; na ɔkyerɛɛ wɔn aseɛ dii Nyankopɔn ahennie ho adanseɛ, na ɔde Mose mmara ne adiyifoɔ no kyerɛɛ wɔn Yesu ho nsɛm no firi anɔpa kɔsii anwummerɛ.

²⁴Na ebinom gyee deɛ ɔkaeɛ no dii, na ebinom nso annye anni.

²⁵ Na wɔn ano ankɔ bɛnkorɔ mu nti, wɔkɔe, berɛ a Paulo kaa asɛm baako sɛ: Nokwasɛm na Honhom Kronkron nam Odiyifoɔ Yesaia so ka kyerɛɛ mo agyanom sɛ:

²⁶Kɔ ɔman yi nkyɛn, na kɔka sɛ: Ɛteɛ deɛ, mobɛte, na morente aseɛ, na ehunu nso, mobɛhunu, na morenhunu mu.

²⁷Na ɔman yi akoma apirim, na wɔmfa wɔn aso nte asɛm yie, na wɔamuamua wɔn ani; na wɔamfa wɔn ani anhunu adeɛ, na wɔamfa wɔn aso ante asɛm, na wɔamfa wɔn akoma ante aseɛ, na wɔannane amma me nkyɛn na mansa wɔn yadeɛ.

²⁸ Enti monhunu sɛ wɔama wɔde Nyankopɔn nkwagyeɛ no akɔma amanaman mufoɔ; na wɔbɛte.

²⁹[Na ɔkaa nsɛm yi no, Yudafoɔ no kɔe, na wɔgyegye akyinnyeɛ pii wɔn mu.][8]

³⁰Na mfeɛ mmienu kusuu na ɔde tenaa ɔno ara ne fie a ɔtua ka no mu, na ɔgyee wɔn a wɔbaa ne nkyɛn nyinaa

³¹ kaa Nyankopɔn ahennie ho asɛm, na ɔde nnam nyinaa kyerɛkyerɛɛ nnoɔma a ɛfa Awurade Yesu Kristo ho, na obiara ansi no kwan.