Read Twi Asante Asomafoɔ 7 Bible Online

Asomafoɔ 7 - Twi Asante bible

Asomafoɔ 7

¹Na ɔsɔfo panin no bisaa sɛ: Nsɛm yi te saa anaa?

² Na Stefano buaa sɛ: Anuanom ne agyanom, monyɛ aso! Animuonyam Nyankopɔn yii ne ho kyerɛɛ yɛn agya Abraham berɛ a ɔwɔ Mesopotamia ansa na ɔrebɛtena Haran no,

³ na ɔka kyerɛɛ no sɛ: Firi w’asase so ne w’abusua mu, na bra asase a mɛkyerɛ woɔ no so!

⁴ Ɛnna ɔfirii Kaldeafoɔ asase so bɛtenaa Haran; na n’agya wuo akyiri no, ɔmaa no firii hɔ bɛtenaa asase yi a mote soɔ nnɛ yi so.

⁵ Na wamma no agyapadeɛ wɔ mu, wamma no anammɔn baako mpo; na ɔhyɛɛ no bɔ sɛ ɔde bɛma ɔno ne n’asefoɔ a wɔdi n’akyire sɛ wɔmfa nyɛ wɔn deɛ, nanso na ɔnnya nnyaa ɔba.

⁶ Na deɛ Onyankopɔn kaeɛ ne sɛ: N’asefoɔ bɛyɛ ahɔhoɔ ananafoɔ asase so, na wɔde wɔn ayɛ nkoa, na wɔayɛ wɔn bɔne mfirinhyia ahanan.

⁷Na ɔman a wɔbɛsom wɔn sɛ nkoa no na Onyankopɔn kaa no wɔn ho sɛ: Mɛbu wɔn atɛn, na ɛno akyiri no, wɔafiri hɔ abɛsom me wɔ ha.

⁸ Na ɔmaa no twetiatwa apam. Na ɔwoo Isak, na ne nnawɔtwe soɔ no, ɔtwaa no twetia, na Isak woo Yakob, na Yakob woo agyanom mpanimfoɔ dummienu no.

⁹ Na agyanom mpanimfoɔ no de nitan tɔnn Yosef kɔɔ Misraim, nanso Onyankopɔn dii n’akyi.

¹⁰ Na ɔyii no firii n’amanehunu nyinaa mu na ɔmaa no adom ne nyansa Farao a ɔyɛ Misraim hene no anim, na ɔde no sii Misraim ne ne fie nyinaa so amrado.

¹¹Na ɛkɔm baa Misraim ne Kanaan asase nyinaa so, ɛne ahohia kɛseɛ nso, na yɛn agyanom nnya aduane.

¹² Na Yakob tee sɛ aduane wɔ Misraim no, ɔsomaa yɛn agyanom kane.

¹³ Na deɛ ɛtɔ so mmienu no, Yosef yii ne ho kyerɛɛ ne nuanom, na Farao nso hunuu Yosef abusuafoɔ.

¹⁴ Na Yosef soma maa wɔkɔhyiaa n’agya Yakob ne n’abusua nyinaa a wɔyɛ nnipa aduɔson nnum no bae.

¹⁵ Na Yakob kɔɔ Misraim, na ɔno ne yɛn agyanom wuwui,

¹⁶ na wɔde wɔn baa Sekem bɛtotoo ɛda a Abraham de sika tɔ firii Hamor mma nkyɛn wɔ Sekem no mu.

¹⁷ Na ɛbɔ a Onyankopɔn kaa ho ntam kyerɛɛ Abraham no berɛ reduru no, ɔman no dɔree, na wɔyɛɛ bebree wɔ Misraim

¹⁸kɔsii sɛ ɔhene foforɔ bi a ɔnnim Yosef sɔreeɛ.

¹⁹ Ɔno na ɔde aniteɛ hyɛɛ yɛn nkurɔfoɔ soɔ, na ɔyɛɛ yɛn agyanom bɔne, na ɔmaa wɔtotoo wɔn mma nkɔkoaa gui, na ama wɔannya nkwa.

²⁰ Ɛberɛ no ara mu na wɔwoo Mose, na ne ho yɛ fɛ Nyankopɔn anim, na wɔhwɛɛ no abosome mmiɛnsa n’agya fie.

²¹ Na wɔtoo no tweneeɛ no, Farao babaa kɔfaa no, na ɔtetee no de no yɛɛ ne ba.

²²Na wɔkyerɛɛ Mose Misraimfoɔ nyansa nyinaa, na ɔyɛɛ den wɔ ne nsɛm ne nneyɛɛ mu.

²³ Na ɔdii mfirinhyia aduanan no, ɛbaa n’akomam sɛ ɔbɛkɔ akɔhwɛ ne nuanom Israel mma no.

²⁴Na ɔhunuu obi a wɔreyɛ no bɔne no, ɔgyee ne ti, na ɔtɔɔ deɛ wɔrehyɛ no soɔ no were kumm Misraimni no.

²⁵Na ɔsusuu sɛ anuanom no bɛhunu sɛ Onyankopɔn nam ne nsa so rebɛgye wɔn; nanso wɔanhunu.

²⁶Na adeɛ kyeeɛ no, ɔbɛtoo wɔn sɛ wɔreko. Ɛnna ɔpataa wɔn kaa sɛ: Mmarima, moyɛ anuanom; adɛn nti na moreyɛ mo ho bɔne?

²⁷Na deɛ ɔreyɛ ne yɔnko bɔne no summ no kaa sɛ: Hwan na ɔde wo sii yɛn so panin ne temmufoɔ?

²⁸Wopɛ sɛ wokum me, sɛdeɛ nnora wokumm Misraimni no anaa?

²⁹ Na asɛm yi nti Mose dwaneeɛ, na ɔkɔyɛɛ ɔhɔhoɔ Midian asase so, na ɔwoo mmabanin baanu wɔ hɔ.

³⁰ Na mfirinhyia aduanan duruiɛ no, Awurade bɔfoɔ yii ne ho kyerɛɛ no wɔ serɛ so, Sinai bepɔ ho, wɔ wura bi gyaframa mu.

³¹Na Mose hunuiɛ no, anisoadeɛ no yɛɛ no nwanwa; na ɔtwe bɛnee sɛ ɔrekɔhwɛ no, Awurade nne baa sɛ:

³² Mene w’agyanom Nyankopɔn, Abraham ne Isak ne Yakob Nyankopɔn. Na Mose ho popoeɛ, na wansi ne bo ankɔhwɛ.

³³Na Awurade ka kyerɛɛ no sɛ: Yi wo nan mu mpaboa; na deɛ wogyina yi yɛ asase kronkron.

³⁴Hunu na mahunu me man a ɛwɔ Misraim no amanehunu, na mate n’apinisie, na masiane sɛ merebɛgye wɔn; na afei bra na mensoma wo, na kɔ Misraim!

³⁵ Mose yi ara a wɔpaa no sɛ: Hwan na ɔde wo sii ɔpanin ne ɔtemmufoɔ no, ɔno ara na Onyankopɔn nam ɔbɔfoɔ a ɔyii ne ho kyerɛɛ no wɔ wura no mu no nsa soɔ somaa no sɛ ɔpanin ne ɔgyefoɔ.

³⁶ Ɔno ara na ɔde wɔn firii adi yɛɛ anwanwadeɛ ne nsɛnkyerɛnneɛ Misraim asase so, ne Mmɛwa Po mu ne ɛserɛ so mfirinhyia aduanan.

³⁷ Oyi ne Mose a ɔka kyerɛɛ Israel mma sɛ: Odiyifoɔ a ɔte sɛ me na Onyankopɔn bɛma no so mo nuanom mu ama mo.

³⁸ Oyi ne deɛ na ɔne ɔbɔfoɔ no wɔ asafo no mu ɛserɛ so hɔ a ɔbɔfoɔ no ne no ne yɛn agyanom kasaa Sinai bepɔ soɔ, na ɔgyee nkwa nsɛm no de brɛɛ yɛn no.

³⁹Na yɛn agyanom nso ampɛ sɛ wɔtie no, na wɔsumm no twenee, na wɔdanee wɔn akoma kɔɔ Misraim,

⁴⁰ na wɔka kyerɛɛ Aaron sɛ: Yɛ anyame a wɔbɛdi yɛn anim ma yɛn! Na Mose a ɔde yɛn firi Misraim baeɛ yi deɛ, yɛnnim deɛ ayɛ no.

⁴¹Ɛnna wɔyɛɛ nantwie ba, nna no mu, na wɔbɔɔ afɔdeɛ maa ohoni no, na wɔn ani gyee wɔn nsa ano adwuma ho.

⁴² Na Onyankopɔn yii n’ani, na ɔde wɔn maa sɛ wɔnsom ɔsoro asafo, sɛdeɛ wɔatwerɛ adiyifoɔ nwoma no mu sɛ: Israel fiefoɔ, mode mmoa ne nnuane bɔɔ afɔdeɛ maa me mfirinhyia aduanan ɛserɛ so anaa?

⁴³Mmom mofaa Molok ntomadan ne onyame Refan nsoromma, ahoni a moyɛeɛ sɛ mobɛsom wɔn; na mɛsoa mo akɔ Babel akyiri nohoa.

⁴⁴ Yɛn agyanom nyaa adanseɛ ntomadan no wɔ ɛserɛ so, sɛdeɛ deɛ ɔkasa kyerɛɛ Mose no hyɛɛ no sɛ ɔnyɛ no sɛdeɛ adeɛ a ɔhunuiɛ no teɛ no.

⁴⁵ Yɛn agyanom nsa kaa saa ntomadan yi no, wɔne Yosua de baa amanaman a Onyankopɔn pamm wɔn firii yɛn agyanom anim no asase so. Ɛte saa ara de bɛsii Dawid berɛ so.

⁴⁶ Ɔno na ɔnyaa Nyankopɔn anim adom, na ɔsrɛɛ sɛ wɔmma no nsi efie mma Yakob Nyankopɔn.

⁴⁷ Nanso Salomo na ɔsii efie no maa no.

⁴⁸ Mmom deɛ ɔwɔ sorosoro no nte deɛ wɔde nsa ayeyɛ mu, sɛdeɛ odiyifoɔ no ka sɛ:

⁴⁹Awurade se: Ɔsoro yɛ m’ahennwa, na asase yɛ me nan ntiasoɔ; ɔdan bɛn na mobɛsi ama me? Anaasɛ ɛhe ne me homebea?

⁵⁰Ɛnyɛ me nsa na ɛyɛɛ yeinom nyinaa?

⁵¹ Mo a mo kɔn asene na moyɛ akoma ne aso mu momonoto, daa mo ne Honhom Kronkron di asie; sɛdeɛ mo agyanom yɛeɛ no, saa ara na moyɛ.

⁵² Adiyifoɔ no mu hwan na mo agyanom antaa no? Na wɔkumm wɔn a wɔkaa Ɔteneneeni no ba no ho asɛm kane no; ɔno na afei moayi no ama wɔaku no,

⁵³ mo a monyaa mmara no sɛdeɛ abɔfoɔ hyɛeɛ no, nanso moanni soɔ.

⁵⁴ Na wɔtee yeinom no, wɔn ani bereeɛ, na wɔtwɛree wɔn se guu ne so.

⁵⁵Nanso ɔno deɛ, na Honhom Kronkron ahyɛ no ma, na ɔhwɛɛ soro dinn hunuu Nyankopɔn animuonyam ne Yesu sɛ ɔgyina Nyankopɔn nifa,

⁵⁶ na ɔkaa sɛ: Hwɛ, mehunu soro sɛ abue, na Onipa Ba no gyina Nyankopɔn nifa.

⁵⁷Na wɔde nne kɛseɛ teaa mu, na wɔsisii wɔn aso, na wɔbɔɔ kirididi kɔto hyɛɛ ne so,

⁵⁸ na wɔsunsumm no firii kuro no mu kɔsii no aboɔ. Na adansefoɔ no de wɔn ntoma guguu aberanteɛ bi a wɔfrɛ no Saulo nan ase.

⁵⁹ Na wɔresi Stefano aboɔ no, ɔsrɛɛ sɛ: Awurade Yesu, gye me honhom!

⁶⁰ Na ɔkotoo ne nan anim de nne kɛseɛ teaa mu sɛ: Awurade, mfa bɔne yi nto wɔn so! Na ɔkaa yei no, ɔkaa n’ani guu so.