Read Twi Asante Asomafoɔ 8 Bible Online

Asomafoɔ 8 - Twi Asante bible

Asomafoɔ 8

¹ Na Saulo nso, penee ne kum no so. Na da no ara ɔtaa kɛseɛ baa asafo a ɛwɔ Yerusalem no so, na wɔn nyinaa hwete kɔɔ Yudea ne Samaria nsase so, gye asomafoɔ no nko.

² Nso nnipa nyamesurofoɔ bi siee Stefano, na wɔsuu no pii.

³ Na Saulo deɛ, ɔhaa asafo no, hyɛnehyɛnee afie mu, kɔtwee mmarima ne mmaa, na ɔde wɔn kɔguu afiase.

⁴Ɛnna wɔn a wɔhweteeɛ no kyinkyini kɔkaa asɛmpa no.

⁵ Na Filipo kɔɔ Samaria kuro bi mu kɔkaa Kristo ho asɛm kyerɛɛ wɔn.

⁶Na nkurɔfoɔ akuakuo no teeɛ, na wɔhunuu nsɛnkyerɛnneɛ a Filipo yɛeɛ no, wɔde akoma korɔ yɛɛ aso maa nsɛm a ɔkaeɛ no.

⁷ Na ahonhom fi a ɛwɔ nnipa bebree mu de nne kɛseɛ teaa mu firii adi, na mmubuafoɔ ne mpakye pii ho sanee wɔn.

⁸ Na anigyeɛ kɛseɛ baa kuro no mu.

⁹Na ɔbarima bi a ɔde Simon wɔ kuro no mu a akane no na ɔyi nkonyaa, na ɔyɛ ne ho sɛ obi a ɔyɛ kɛseɛ maa Samariafoɔ no ho dwirii wɔn.

¹⁰Ɔno na wɔn nyinaa, ɛfiri nketewa soɔ kɔsi akɛseɛ soɔ tie no ka sɛ: Oyi ne Nyankopɔn tumi a wɔfrɛ no Kɛseɛ no.

¹¹Wɔtiee no, ɛfiri sɛ na ɔde nkonyaayie no ama wɔn ho adwiri wɔn akyɛ.

¹² Na wɔgyee Filipo a ɔka Nyankopɔn ahennie ne Yesu Kristo din ho asɛmpa no diiɛ no, mmarima ne mmaa no maa wɔbɔɔ wɔn asu.

¹³Na Simon no ara nso gye dii, na wɔbɔɔ no asu no, ɔde ne ho bataa Filipo ho; na ɔhunuu nsɛnkyerɛnneɛ ne ahoɔdenneɛ akɛseɛ a ɔyɛeɛ no, ne ho dwirii no.

¹⁴Na asomafoɔ a wɔwɔ Yerusalem no tee sɛ Samariafoɔ agye Nyankopɔn asɛm no, wɔsomaa Petro ne Yohane kɔɔ wɔn nkyɛn.

¹⁵Na wɔbaeɛ no, wɔbɔɔ mpaeɛ maa wɔn sɛ wɔnnya Honhom Kronkron;

¹⁶ɛfiri sɛ na ɔmmaa wɔn mu biara so, na asu nko na wɔabɔ wɔn akɔ Awurade Yesu din mu.

¹⁷Ɛnna wɔde wɔn nsa guu wɔn soɔ, na wɔnyaa Honhom Kronkron.

¹⁸Na Simon hunuu sɛ ɛnam asomafoɔ no nsa a wɔde gu obi soɔ no so na wɔde Honhom no ma no, ɔde sika brɛɛ wɔn kaa sɛ:

¹⁹Momma me tumi yi bi, na obiara a mede me nsa bɛgu ne soɔ no, wanya Honhom Kronkron.

²⁰Na Petro ka kyerɛɛ no sɛ: Wo ne wo sika nyinaa nyera, ɛfiri sɛ woasusu sɛ wɔde sika na ɛnya Nyankopɔn akyɛdeɛ.

²¹Wonni asɛm yi mu kyɛfa anaa apɛgyadeɛ, ɛfiri sɛ w’akoma ntene Nyankopɔn anim.

²²Enti sakyera w’adwene firi wo bɔne yi ho, na srɛ Onyankopɔn sɛ ebia wɔde w’akoma mu adwene no bɛkyɛ wo.

²³Ɛfiri sɛ mahunu sɛ wowɔ bɔnwoma nwononwono mu, na amumuyɛ homa akyekyere wo.

²⁴Na Simon buaa sɛ: Monsrɛ Awurade mma me, na deɛ moaka yi mu biara amma me so.

²⁵Na wɔn deɛ, wɔdii adanseɛ na wɔkaa Awurade asɛm no, wɔsane kɔɔ Yerusalem, na wɔkaa asɛmpa no wɔ Samariafoɔ nkuraa bebree ase.

²⁶Na Awurade bɔfoɔ kasa kyerɛɛ Filipo sɛ: Sɔre kɔ anafoɔ fam kwan a ɛsiane firi Yerusalem kɔ Gasa no so! Ɛyɛ anwea pradada so kwan.

²⁷Na ɔsɔre kɔe. Na hwɛ, Etiopiani barima bi a ɔyɛ Etiopiafoɔ hemmaa Kandake piani tumfoɔ a wɔasa no, a ɔhwɛ ne sika nyinaa soɔ ni; waba Yerusalem abɛsɔre,

²⁸na ɔresane akorɔ, na ɔte ne teaseɛnam mu rekenkan Odiyifoɔ Yesaia nwoma.

²⁹Na Honhom no ka kyerɛɛ Filipo sɛ: Twe kɔ teaseɛnam yi ho!

³⁰Na Filipo de mmirika kɔɔ ne nkyɛn, na ɔtee sɛ ɔrekenkan Odiyifoɔ Yesaia nwoma no, ɔbisaa no sɛ: Wote deɛ worekenkan yi ase anaa?

³¹Na ɔse: Ɛbɛyɛ dɛn na mɛtumi, gye sɛ obi kyerɛ me? Na ɔsrɛɛ Filipo sɛ ɔmforo mmɛtena ne nkyɛn.

³² Nso atwerɛ no mu asɛm a ɔrekenkan no nie: Wɔde no kɔɔ sɛ odwanten a wɔrekɔku no, na sɛ adwammaa tɔ ne yifoɔ anim mum no, sɛ nso wammue n’ano ne no.

³³N’ahobrɛaseɛ mu wɔbuu no ntɛnkyea. N’abusua nso hwan na ɔbɛtumi akyerɛ? Ɛfiri sɛ wɔyii ne nkwa firii asase so.

³⁴Na opiani no buaa Filipo sɛ: Mesrɛ wo, hwan ho asɛm na odiyifoɔ no reka yi? Ɔno ara anaa obi ho asɛm?

³⁵Na Filipo buee n’ano, na ɔgyinaa twerɛsɛm no ara so kaa Yesu ho asɛmpa no kyerɛɛ no.

³⁶Na wɔnam kwan so rekorɔ no, wɔkɔduruu asuo bi ho, na opiani no kaa sɛ: Hwɛ, nsuo ni; ɛdeɛn na ɛsi me asubɔ ho kwan?

³⁷ [Na Filipo se: Sɛ wode w’akoma nyinaa gye di a, ɛwɔ ho kwan saa. Na ɔbuaa sɛ: Megye medi sɛ Yesu Kristo ne Nyankopɔn ba.][3]

³⁸Na ɔhyɛ maa teaseɛnam no gyinae, na wɔn baanu siane kɔɔ nsuo no mu, Filipo ne opiani no, na ɔbɔɔ no asu.

³⁹ Na wɔfiri nsuo no mu reba no, Awurade honhom hwimm Filipo, na opiani no anhu no bio; na ɔde anigyeɛ kɔɔ ne kwan.

⁴⁰ Na Filipo deɛ, ɔkɔfirii Asoto; na ɔretwa mu no, ɔkaa asɛmpa no nkuro no nyinaa mu de kɔsii sɛ ɔduruu Kaesarea.