Read Twi Asante Romafoɔ 11 Bible Online

Romafoɔ 11 - Twi Asante bible

Romafoɔ 11

¹ Na afei mese: Onyankopɔn ato ne man atwene anaa? Dabi da, na me nso meyɛ Israelni a mefiri Abraham asefoɔ mu, Benyamin abusuakuo mu.

² Onyankopɔn ntoo ne man a ɔhunuu wɔn sieeɛ no ntweneeɛ. Anaasɛ monnim deɛ atwerɛ no ka fa Elia ho, sɛ ɔgyina Nyankopɔn anim bɔɔ Israelfoɔ kwaadu?

³Sɛ: Awurade, w’adiyifoɔ no, wɔakunkum wɔn, na w’afɔremmukyia nso, wɔadwiridwiri, na me nko na maka, na wɔrehwehwɛ me aku me.

⁴ Na Nyankopɔn anomu asɛm se no sɛn? Mama mmarima mpemnson aka ama me a wɔmfaa wɔn nkotodwe nkutoo Baal.

⁵ Saa ara na seesei berɛ yi mu nso, nkaeɛ bi nam adom yi so aka.

⁶Na sɛ ɛnam adom so a, na ɛmfiri nnwuma mu bio, ɛfiri sɛ ɛno deɛ, anka adom nyɛ adom bio.

⁷ Ɛnneɛ na ɛdeɛn? Deɛ Israelfoɔ hwehwɛ no, wɔannya, na wɔn a wɔayi wɔn no anya, na wɔn a aka no akoma apirim;

⁸ sɛdeɛ wɔatwerɛ sɛ: Onyankopɔn ama wɔn honhom a ɛtɔ nko, ani a wɔmmfa nnhunu adeɛ ne aso a wɔmmfa nnte asɛm de abɛduru nnɛ da yi.

⁹ Na Dawid ka sɛ: Ma wɔn didipono nyɛ apa, ne fidie, ne suntidua ne akatua mma wɔn;

¹⁰ma wɔn ani nnuru sum, na wɔanhunu adeɛ, na kuntunu wɔn akyiri daa.

¹¹ Na afei mese: Wɔnsuntii sɛ wɔrehwe aseɛ? Dabi da, na mmom nkwagyeɛ nam wɔn ntereho no so bɛyɛɛ amanaman mufoɔ no deɛ, sɛ ɛrebɛma wɔatwe ninkunu.

¹²Na sɛ wɔn ntereho no dane wiase ahonya, na wɔn ntwodie dane amanaman mufoɔ ahonya a, wɔn mayɛ bɛkyɛne saa sɛn ara!

¹³Na mo amanaman mufoɔ na mekasa mekyerɛ mo: Ɛsiane sɛ meyɛ amanaman mu somafoɔ nti, mekamfo me som,

¹⁴ sɛ ebia mɛma wɔn a wɔyɛ me mfɛfoɔ Yudafoɔ no atwe ninkunu, na magye wɔn mu binom nkwa.

¹⁵Na sɛ wɔn toɔ a wɔtoo wɔn tweneeɛ no yɛ wiase mpata a, ɛdeɛn na wɔn gyeɛ no bɛyɛ, ɛnyɛ nkwa a ɛfiri owuo mu anaa?

¹⁶Sɛ aba a ɛdi kan no yɛ kronkron a, ɛtoa no nyinaa yɛ bi; na sɛ nhini no yɛ kronkron a, dua mman no nso yɛ bi.

¹⁷ Na sɛ dua mman no bi abubu, na wo a woyɛ wuram ngo dua no, wɔde wo afra ahyɛ mu, na woanya ngo dua no nhini ne emu nsuo no bi a,

¹⁸ nhoahoa wo ho dua mman no ho! Na sɛ wohoahoa wo ho a, ɛnyɛ wo na woso nhini no, na nhini no na ɛso woɔ.

¹⁹Afei wobɛka sɛ: Dua mman no bubuu sɛ wɔmfa me nhyɛ mu.

²⁰Wiɛ, gyeɛ a wɔannye annie nti na ɛbubuiɛ, na wo deɛ, wode gyidie na ɛgyina hɔ. Nnwene akokurokosɛm, na mmom suro!

²¹Na sɛ Onyankopɔn ankora dua mman a ɛfiri dua no ara mu fifiriiɛ no a, ɔrenkora wo nso.

²² Enti hwɛ Nyankopɔn ayamyɛ ne ne denyɛ! Ɔne wɔn a wɔahwehwe aseɛ no dii no dendeenden so, na wo deɛ, Onyankopɔn kyerɛɛ n’yamyɛ no wɔ wo so, nanso gye sɛ wotena saa ayamyɛ no mu ara; anyɛ saa a, wɔbɛtwa wo nso atwene.

²³ Na wɔn nso, sɛ wɔantena ɔgyeɛ a wɔnnye nnie no mu a, wɔde wɔn bɛhyɛ mu, ɛfiri sɛ Onyankopɔn bɛtumi de wɔn ahyɛ mu bio.

²⁴Na sɛ wɔatwa wo afiri dua a ne tebea yɛ wuram ngo dua no, na sɛ wɔakwati wo bɔbea no de wo abɛhyɛ ngo dua pa no mu a, mprɛ ahe ara na wɔremfa yeinom a ɛyɛ dua no mman pa no mmɛhyɛ wɔn ankasa ngo dua no mu?

²⁵ Na, anuanom, mempɛ sɛ mesi mo ahuntasɛm yi soɔ, na moammu mo ho anyansafoɔ. Ɛne sɛ akomapirim aba Israel afaafa mu, de kɔsi sɛ amanaman mufoɔ no bɛwie mayɛ;

²⁶ na ɛno ansa na Israel nyinaa bɛnya nkwa, sɛdeɛ wɔatwerɛ sɛ: Ɔgyefoɔ no bɛfiri Sion aba abɛtu amumuyɛsɛm ase afiri Yakob.

²⁷ Na apam a me ne wɔn bɛpam berɛ a mɛyi wɔn bɔne makorɔ no nie.

²⁸Asɛmpa no fam deɛ, mo nti wɔyɛ atamfoɔ, na eyie no fam deɛ, agyanom no nti, wɔyɛ adɔfoɔ;

²⁹ɛfiri sɛ Onyankopɔn ma obi adom akyɛdeɛ na ɔfrɛ no a, ɔnntwe nsan.

³⁰Na sɛ mo nso moannye Onyankopɔn anni pɛn, na afei wɔafa wɔn gyeɛ a wɔnnye annie no so ahu mo mmɔbɔ no,

³¹saa ara nso na seesei yeinom ayɛ asoɔden, na ɛnam ahummɔborɔ a wɔde ahu mo no so, wɔn nso anya ahummɔborɔ.

³² Na Onyankopɔn aka wɔn nyinaa ahyɛ gyeɛ a wɔnnye nnie no ase sɛ ɔbɛhu wɔn nyinaa mmɔbɔ.

³³ O Onyankopɔn ahonya ne nyansa ne nimdeɛ bunu a emu dɔ! Wɔrenhunu n’atemmuo mu peepee, na wɔrenhunu n’akwan akyiri hwehwɛ nwie da.

³⁴ Na hwan na wahunu Awurade adwene, anaasɛ hwan na wayɛ ne fotufoɔ?

³⁵Anaasɛ hwan na ɔmaa no biribi kane, na watua no so ka?

³⁶Ɛfiri sɛ ade nyinaa firi ne mu, na ɛnam ne so ba, na ɛwie ne mu; ɔno na animuonyam wɔ no daa daa. Amen.