Read Twi Asante Romafoɔ 2 Bible Online

Romafoɔ 2 - Twi Asante bible

Romafoɔ 2

¹ Enti wo onipa biara a wobu atɛn no, anoyie biara nni hɔ mma wo; ɛfiri sɛ deɛ wobu obi atɛn wɔ mu no, wobu wo ara wo ho fɔ, ɛfiri sɛ wo a wobu atɛn no woyɛ saa adeɛ no ara.

²Nanso yɛnim sɛ Nyankopɔn atemmuo fa ne kwan so pɛpɛɛpɛ, ba wɔn a wɔyɛ saa nnoɔma no so.

³Na, wo onipa a wobu wɔn a wɔyɛ saa nnoɔma no atɛn na woyɛ saa ara no, wosusu sɛ wobɛdwane Nyankopɔn atemmuo no anaa?

⁴ Anaasɛ wote n’ayamyɛ ne ne boasetɔ ne n’abodwokyɛre mapa no ho atua a, wonim sɛ Nyankopɔn ayamyɛ de wo rekɔ adwensakyera mu?

⁵Na w’akoma den ne akoma pirim nti, woreboaboa abufuo ano de atwɛn abufuo ne Nyankopɔn atɛntenenee no adiyie da no.

⁶ Ɔno na ɔbɛsusu nnipa nyinaa nnwuma so adeɛ ama wɔn mmaako mmaako.

⁷Wɔn a wɔde papayɛ mu boasetɔ hwehwɛ animuonyam ne anidie ne adeɛ a ɛmporɔ no, ɔbɛma wɔn daa nkwa.

⁸ Na wɔn a wɔfiri atutupɛ mu, na wɔntie nokorɛ, na wɔtie deɛ ɛntene no, abufuo ne abufuhyeɛ bɛba wɔn so.

⁹ Aane, ahohia ne ahometeɛ bɛba nnipa a wɔyɛ bɔne nyinaa so, Yudafoɔ kane ne Helafoɔ nso,

¹⁰na mmom wɔn a wɔyɛ papa no nyinaa deɛ, animuonyam ne anidie ne asomdwoeɛ bɛba ama wɔn, Yudafoɔ kane ne Helafoɔ nso bi.

¹¹ Na nnipa mu nyiyimu ne animhwɛ nni Nyankopɔn fam.

¹²Na dodoɔ a wɔnni mmara na wɔyɛ bɔne no, wɔbɛkwati mmara nso ayera. Na dodoɔ a wɔyɛ bɔne, mmara mu no, wɔnam mmara no so bɛbu wɔn atɛn.

¹³ Na ɛnyɛ mmaratiefoɔ na wɔyɛ ateneneefoɔ wɔ Nyankopɔn anim, na mmom mmara sodifoɔ na wɔbɛbu wɔn bem.

¹⁴ Na amanaman mufoɔ a wɔnni mmara no de wɔn awosu yɛ mmara no mu nnoɔma a, yeinom a wɔnni mmara no yɛ mmara ma wɔn ho.

¹⁵ Wɔde yei kyerɛ sɛ, wɔatwerɛ mmara adwuma no wɔ wɔn akoma mu, na wɔn ahonim nso di wɔn adanseɛ, na wɔn nsusuiɛ toto wɔn ano, anaasɛ nso ɛtwitwa gye wɔn,

¹⁶ɛda a Onyankopɔn nam Kristo Yesu so bɛbu nnipa kokoa mu nsɛm atɛn sɛdeɛ m’asɛmpa teɛ no.

¹⁷Na sɛ wɔfrɛ wo Yudani, na wode wo ho twere mmara, na wohoahoa wo ho Nyankopɔn mu,

¹⁸na wohunu deɛ ɔpɛ, na wogye nnoɔma a ɛyɛ pa ara no to mu, ɛnam sɛ wɔfiri mmara mu kyerɛkyerɛ woɔ nti,

¹⁹ na wode wo ho to wo ho so sɛ woyɛ onifirani kwankyerɛni, wɔn a wɔwɔ sum mu hann,

²⁰nkwasea fotufoɔ, nkɔkoaa kyerɛkyerɛfoɔ, sɛ woawedare wɔ nimdeɛ ne nokorɛ a ɛwɔ mmara no mu a;

²¹ afei wo a wokyerɛkyerɛ obi no, wonkyerɛkyerɛ wo ho? Wo a woka sɛ wɔnnwia adeɛ no, ɛnna wowia adeɛ yi?

²²Wo a wose wɔnnsɛe awadeɛ no, ɛnna wosɛe awadeɛ yi? Wo a wokyiri ohoni no, ɛnna wofom asɔrefie nnoɔma yi?

²³Wo a wohoahoa wo ho mmara mu no, ɛnyɛ nam na wonam mmaratoɔ so de Nyankopɔn anim twitwiri fam anaa?

²⁴ Na mo nti wɔsɛe Nyankopɔn din amanaman mu, sɛdeɛ wɔatwerɛ no.

²⁵ Na sɛ wodi mmara no so deɛ a, twetiatwa ho wɔ mfasoɔ; nanso woto mmara no deɛ a, na wo twetiatwa no adane momonotoyɛ.

²⁶Enti sɛ momonotoni no di mmara mu nsɛntenenee so a, wɔremmu ne momonotoyɛ no sɛ twetiatwa anaa?

²⁷Na deɛ wɔawo no momonoto a ɔdi mmara no soɔ no bɛbu wo a wonim atwerɛ no, na woyɛ twetiani nanso woto mmara no atɛn!

²⁸ Na ɛnyɛ deɛ ɔda adi saa, na ɔyɛ Yudani, nso ɛnyɛ deɛ ɛda adi saa ɔhonam mu na ɛyɛ twetiatwa,

²⁹ na mmom Yudani pa ara ne deɛ ɔte saa wɔ ne mu, na twetiatwa pa ara ne deɛ wɔayɛ no akoma mu wɔ honhom mu, na ɛnyɛ deɛ wɔatwerɛ mu. Ɔno na n’ayeyie mfiri nnipa, na mmom ɛfiri Onyankopɔn.