Read Twi Asante Romafoɔ 4 Bible Online

Romafoɔ 4 - Twi Asante bible

Romafoɔ 4

¹Afei ɛdeɛn na yɛbɛka afa yɛn honam fam tete agya Abraham ho?

²Na sɛ ɛfiri nnwuma mu na wɔbuu Abraham bem a, ɛnneɛ na ɔwɔ deɛ ɔde hoahoa ne ho, nanso ɛnyɛ Nyankopɔn anim.

³ Na ɛdeɛn na twerɛ no seɛ? Abraham gyee Onyankopɔn diiɛ, na wɔbuu ɛno sɛ tenenee maa no.

⁴ Na deɛ ɔyɛ nnwuma no deɛ, wɔmmu n’akatua sɛ adom, na mmom sɛ ɛka bi a wɔretua ama no.

⁵Na deɛ ɔnyɛ nnwuma, na ɔgye deɛ ɔbu obusuyɛfoɔ bem die no, wɔbu ne gyidie sɛ tenenee ma no.

⁶Sɛdeɛ Dawid nso ka sɛ, nhyira no yɛ onipa a Onyankopɔn kwati nnwuma bu tenenee ma no no dea,

⁷ sɛ: Nhyira ne wɔn a wɔde wɔn mmarato akyɛ wɔn, na wɔn bɔne so akata.

⁸Nhyira ne onipa a Awurade mmu ne bɔne ngu ne soɔ.

⁹Ɛnneɛ na nhyira yi ba twetiatwafoɔ nko so, anaa momonotofoɔ nso so? Ɛfiri sɛ yɛka sɛ wɔbuu gyidie sɛ tenenee maa Abraham.

¹⁰Na wɔbu maa no sɛn? Ɔwɔ twetiatwa mu anaa momonotoyɛ mu no a? Ɛnyɛ twetiatwafoɔ mu, na mmom momonotoyɛ mu.

¹¹ Na ɔnyaa twetiatwa nsɛnkyerɛnneɛ sɛ ne momonotoyɛ mu gyidie a ɔde nyaa tenenee no nsɔano, na wayɛ momonotoyɛ mu gyidifoɔ nyinaa agya, na wɔabu tenenee no ama wɔn nso,

¹² na wayɛ twetiafoɔ agya nso, a ɛnyɛ sɛ wɔfiri twetiatwa mu nko, na mmom sɛ wɔtiatia yɛn agya Abraham gyidie a na ɔwɔ, ɛberɛ a na ɔyɛ momonoto no anammɔn mu bi.

¹³ Na ɛnyɛ mmara so na ɛbɔ a wɔhyɛɛ Abraham ne n’asefoɔ sɛ wɔbɛyɛ wiase adedifoɔ no nam baeɛ, na mmom ɛnam gyidie tenenee so.

¹⁴Na sɛ wɔn a wɔfiri mmara mu no yɛ adedifoɔ a, na gyidie no ayɛ kwa na bɔhyɛ no adane ohunu;

¹⁵ ɛfiri sɛ mmara no twe abufuo ba. Na deɛ mmara bi nnie no, mmarato nso nni hɔ.

¹⁶Enti ɛfiri gyidie mu, sɛ ɛmfiri adom mu mmra, na bɔhyɛ no atim ama n’asefoɔ no nyinaa; ɛnyɛ wɔn a wɔfiri mmara mu no nko, (na mmom wɔn a wɔfiri Abraham a ɔyɛ yɛn nyinaa agya, gyidie mu no nso bi,

¹⁷ sɛdeɛ wɔatwerɛ sɛ: Mede wo mayɛ amanaman mufoɔ bebree agya,) Onyankopɔn a ɔgyee no diiɛ a ɔnyane awufoɔ, na ɔfrɛ nnoɔma a ɛmmaeɛ sɛ nnoɔma a ɛwɔ hɔ no anim.

¹⁸ Ɔno na faako a anidasoɔ nnie no, ɔgyinaa anidasoɔ so gye diiɛ, na wayɛ amanaman mufoɔ bebree agya, sɛdeɛ wɔaka no sɛ: Sɛdeɛ w’asefoɔ bɛyɛ ne no.

¹⁹ Na wanyɛ mmerɛ gyidie mu, anhwɛ ne nipadua, sɛ wadi mfirinhyia bɛyɛ ɔha nti, anya awu, ne Sara yafunu a emu ato no;

²⁰ na Nyankopɔn bɔhyɛ no ho deɛ, wamfa ɔgyeɛ a wɔnnye nnie annye kyim, na mmom ɔnyaa gyidie mu ahoɔden hyɛɛ Onyankopɔn animuonyam,

²¹na ɔnim ampa sɛ, deɛ wahyɛ ho bɔ no, ɔbɛtumi ayɛ nso.

²² Enti nso wɔbuu no sɛ tenenee maa no.

²³ Na ɛnyɛ ne nko nti na wɔatwerɛ yei, sɛ wɔbuu no saa maa no,

²⁴na mmom yɛn nso a yɛgye deɛ ɔnyanee yɛn Awurade Yesu firii awufoɔ mu no die no, wɔbɛbu no saa ama yɛn;

²⁵ ɔno na yɛn mfomsoɔ nti wɔyii no maeɛ, na yɛn bembuo nti, wɔnyanee no.