Read Twi Asante 1 Korintofoɔ 11 Bible Online

1 Korintofoɔ 11 - Twi Asante bible

1 Korintofoɔ 11

¹ Monhwɛ me nsua me, sɛdeɛ me nso mehwɛ Kristo mesua no no.

²Na meyi mo ayɛ sɛ mokae me adeɛ nyinaa mu, na mokura atetesɛm a mede mehyɛɛ mo nsa no mu.

³ Na mepɛ sɛ mohunu sɛ ɔbarima biara tiri ne Kristo, na ɔbaa tiri ne ɔbarima, na Kristo tiri ne Onyankopɔn.

⁴ Ɔbarima biara a ɔrebɔ mpaeɛ, anaasɛ ɔrehyɛ nkɔm na wakata ne tiri soɔ no, ɔnni ne tiri ni.

⁵Na ɔbaa biara a ɔrebɔ mpaeɛ, anaasɛ ɔrehyɛ nkɔm na ne tiri so da hɔ no, ɔnni ne tiri ni; na ɛte sɛ wabɔ tikwa.

⁶Na sɛ ɔbaa ankata ne tiri so a, ma no mmɔ tikwa nso; na sɛ ɛyɛ ɔbaa aniwu sɛ ɔtwitwa ne tiri so anaasɛ ɔyi a, ɛnneɛ na ɔnkata ne tiri so.

⁷ Na ɔbarima deɛ, ɛnsɛ sɛ ɔkata ne tiri soɔ, ɛfiri sɛ ɔyɛ Nyankopɔn suban ne n’animuonyam; na ɔbaa deɛ ɔyɛ ɔbarima animuonyam.

⁸ Na ɔbarima mfiri ɔbaa mu, na mmom ɔbaa na ɔfiri ɔbarima mu;

⁹ na ɛnyɛ ɔbaa nti na wɔbɔɔ ɔbarima, na mmom ɔbarima nti na wɔbɔɔ ɔbaa.

¹⁰Ɛno nti na ɛsɛ sɛ ɔbaa nya ne tiri so tumi a ɛyɛ nkatasoɔ, abɔfoɔ nti.

¹¹Nso ɔbarima nkwati ɔbaa, na ɔbaa nkwati ɔbarima, Awurade mu.

¹²Na sɛdeɛ ɔbaa firi ɔbarima mu no, sɛ nso ɔbarima nam ɔbaa so ba ne no; na ne nyinaa firi Nyankopɔn mu.

¹³Mo ara mommu atɛn mo mu: Ɛyɛ fɛ sɛ ɔbaa rebɔ mpaeɛ na ɔnkata ne tiri so anaa?

¹⁴Ɔbrasuo no ara nkyerɛ mo sɛ ɔbarima gyina ne tiri kusuu a, ɛnhyɛ no animuonyam,

¹⁵na ɔbaa deɛ ɔgyina ne tiri kusuu a, ɛhyɛ no animuonyam? Ɛfiri sɛ wɔde nwi no ama no sɛ akatasoɔ.

¹⁶Na sɛ obi pɛ sɛ ɔgye yei ho akyinnyeɛ a, yɛn deɛ yɛmmu saa bra no, na Nyankopɔn asafo ahodoɔ no nso nyɛ saa.

¹⁷ Yei a merehyɛ mo yi, menyi mo ayɛ, ɛfiri sɛ monhyia mu nyɛ adepa, na mmom adebɔne.

¹⁸ Na deɛ ɛdi kan no, mohyia mu asafo no mu a, mete sɛ mpaepaemu wɔ mo mu; na megye emu bi medi.

¹⁹ Wiɛ, ɛtwa sɛ fekuo ahodoɔ ba mo mu na wɔn a wɔfra no ada adi mo mu.

²⁰Enti sɛ mobɛhyia faako a mokɔ Awurade adidie a, ɛnyɛ yie,

²¹ɛfiri sɛ obiara di ɔno ara n’aduane ansa, na ɛkɔm de binom, na ebinom nso aboboro nsa.

²² Na monni afie a modidi na monom wɔ mu anaa? Anaasɛ animtia na mobu Nyankopɔn asafo no na mogu wɔn a wɔnni bie no anim aseɛ? Mense mo sɛn? Menyi mo ayɛ anaa? Yei ho deɛ, menyi mo ayɛ.

²³ Na me deɛ, deɛ menya mefirii Awurade hɔ no ara na mede memaa mo sɛ: Awurade Yesu, anadwo a wɔyii no maeɛ no, ɔfaa paanoo,

²⁴na ɔdaa ase bubuu mu, na ɔkaa sɛ: Yei ne me nipadua a wɔrebubu ama mo no; monyɛ yei mfa nyɛ me nkaeɛ!

²⁵Saa ara nso na adidie no akyiri no, ɔfaa kuruwa no kaa sɛ: Kuruwa yi ne Apam foforɔ me ara me mogya mu; da biara a mobɛnom no monyɛ yei mfa nyɛ me nkaeɛ.

²⁶ Na da biara a mobɛdi paanoo yi na mobɛnom kuruwa yi ano no, mopae Awurade wuo no mu ka kɔsi sɛ ɔbɛba.

²⁷ Enti deɛ ɔbɛdi paanoo yi, anaasɛ ɔbɛnom Awurade kuruwa yi ano sɛdeɛ ɛnsɛ no, ɔbɛdi Awurade nipadua ne ne mogya ho fɔ.

²⁸ Na ma onipa nsɔ ne ho nhwɛ na wadi paanoo no bi, na wanom kuruwa no ano bi.

²⁹Na deɛ ɔdi na ɔnom sɛdeɛ ɛnsɛ no, ɔdi nom de atemmuo ba ɔno ara ne so, ɛfiri sɛ wammu nipadua no yie.

³⁰ Yei nti na wɔn a wɔyɛ mmerɛ na wɔyareyare pii wɔ mo mu, na bebree nso awuwu.[2]

³¹Na sɛ yɛhwehwɛ yɛn mu yie a, anka wɔmmu yɛn atɛn;

³² na sɛ wɔbu yɛn atɛn a, Awurade twe yɛn aso, na wɔammu yɛn ne wiase fɔ.

³³Enti, me nuanom, mohyia mu sɛ morebɛdidi a montwɛn mo ho mo ho.

³⁴Na sɛ ɛkɔm de obi a, ma no nnidi ne fie, na moammɛhyia mu ammɛnya atemmuo. Na deɛ aka no deɛ, meba a mabɛtoto no yie.