Read Twi Asante 1 Korintofoɔ 13 Bible Online

1 Korintofoɔ 13 - Twi Asante bible

1 Korintofoɔ 13

¹Sɛ mede nnipa ne abɔfoɔ tɛkyerɛma mekasa, na menni dɔ a, na mete sɛ yaawa a ɛregyegyeɛ anaa akasaa a ɛrewosoɔ.

² Na sɛ mewɔ adiyie asɛnka, na menim ahuntasɛm nyinaa, ne nimdeɛ nyinaa, na mewɔ gyidie nyinaa ma metutu mmepɔ mpo, na menni dɔ a, mensɛ hwee.

³ Na sɛ mepore m’ahodeɛ nyinaa mema ahiafoɔ, na mede me nipadua mema sɛ wɔnhye,[4] na menni dɔ a, merennya ho mfasoɔ biara.

⁴Ɔdɔ wɔ abodwokyɛre, ne yam yɛ; ɔdɔ nyɛ ahoɔyea; ɔdɔ nyɛ ahokyerɛ, ɛmmema ne ho so,

⁵ ɛnyɛ ne ho deɛ ɛmfata, ɛnhwehwɛ deɛ ɛyɛ ɔno nko ara ne deɛ, ne bo nha no, ɛmfa bɔne nhyɛ ne yam,

⁶ n’ani nnye deɛ ɛntene ho, na mmom ɛdi ahurisie wɔ nokorɛ mu.

⁷ Ɛtie ade nyinaa, ɛgye ade nyinaa di, ɛnya ade nyinaa mu anidasoɔ, ɛtɔ ne bo ase ade nyinaa mu.

⁸Ɔdɔ to ntwa da. Nkɔmhyɛ deɛ, wɔbɛgu; kasa ahodoɔ deɛ, ɛbɛgyae; nimdeɛ deɛ, ɛbɛsa.

⁹Na yɛhunu adeɛ fa-ne-fa, na yɛhyɛ nkɔm fanefa.

¹⁰Na sɛ deɛ ɛwie pɛyɛ no nya ba a, ɛno na wɔbɛgu deɛ ɛyɛ fa-ne-fa no.

¹¹Meyɛ abɔfra no, mekasaa sɛ abɔfra, medwenee sɛ abɔfra, metee asɛm ase sɛ abɔfra; na mebɛyɛɛ panin yi, magyae mmɔfraasɛm no.

¹² Na seesei deɛ, yɛnam ahwehwɛ mu hunu adeɛ wɔ bɛ mu, na daakye deɛ, anim ne anim; seesei deɛ, mehunu adeɛ fa-ne-fa, na daakye deɛ, mɛhunu adeɛ mua sɛdeɛ wɔahunu me nso yi.

¹³ Na afei gyidie, anidasoɔ, ɔdɔ, adeɛ mmiɛnsa yi na ɛtena hɔ; na ɔdɔ ne emu kɛseɛ.