Read Twi Asante 1 Korintofoɔ 6 Bible Online

1 Korintofoɔ 6 - Twi Asante bible

1 Korintofoɔ 6

¹Sɛ mo mu bi ne ne yɔnko nya asɛm a, ɔnsi ne bo nkɔ asɛnniiɛ wɔn a wɔntene anim, na ɛnyɛ ahotefoɔ anim anaa?

² Monnim sɛ ahotefoɔ na wɔbɛbu wiase atɛn anaa? Na sɛ mo na mobɛbu wiase atɛn a, ɛmfata mo sɛ modi nsɛm nketewa anaa?

³Monnim sɛ yɛbɛbu abɔfoɔ atɛn? Na kampɛsɛ asetena yi mu nnoɔma?

⁴Na sɛ mowɔ asetena yi mu nnoɔma ho nsɛm a, wɔn a wɔmmu wɔn asafo no mu no na mode wɔn yɛ badwafoɔ?

⁵Meka yei mehyɛ mo aniwuo. Onyansafoɔ baako mpo nni mo mu a ɔbɛtumi abu onua ne onua ntam atɛn anaa?

⁶Adɛn na onua de onua kɔ asɛnniiɛ wɔn a wɔnnye nnie anim yi?

⁷ Mfomsoɔ anya aba mo mu sɛ mone mo ho mo ho wowɔ nsɛmnsɛm. Adɛn na mommma wɔnni mo amim mmom? Adɛn na mommma wɔnsisi mo mmom?

⁸Mo mmom na modi amim na mosisie, na mode yɛ anuanom mpo.

⁹Anaasɛ monnim sɛ wɔn a wɔntene no rennya Nyankopɔn ahennie no? Mommma wɔnnnaadaa mo: Adwamammɔfoɔ, abosonsomfoɔ, awaresɛefoɔ, mmarima ahohwifoɔ, mmarima a wɔne mmarima da,

¹⁰ awifoɔ, aniberefoɔ, asabofoɔ, ntɔkwapɛfoɔ ne amimfoɔ rennya Nyankopɔn ahennie no.

¹¹ Saa na anka mo mu bi teɛ; na afei wɔadware mo, na wɔate mo ho, na wɔabu mo bem Awurade Yesu Kristo din ne yɛn Nyankopɔn honhom mu.

¹² Mewɔ nnoɔma nyinaa ho kwan, nanso ɛnyɛ ne nyinaa na ɛyɛ; mewɔ nnoɔma nyinaa ho kwan, nanso memma biribiara nhyɛ me so.

¹³ Aduane yɛ yafunu dea, na yafunu nso yɛ aduane dea; na Onyankopɔn bɛma ne mmienu ayɛ kwa. Na nipadua nyɛ adwamammɔ dea, na ɛyɛ Awurade dea, na Awurade yɛ nipadua dea.

¹⁴ Na Onyankopɔn anyane Awurade, na ɔnam ne tumi so bɛnyane yɛn bi.

¹⁵ Monnim sɛ mo nipadua yɛ Kristo akwaa bi? Memfa Kristo akwaa menkɔyɛ no odwamamfoɔ akwaa? Ɛmpare me!

¹⁶ Anaasɛ monnim sɛ deɛ ɔde ne ho bɔ odwamamfoɔ ho no, na ɔne no ayɛ nipadua baako anaa? Ɛfiri sɛ ɔka sɛ: Wɔn baanu bɛyɛ honam baako.

¹⁷ Na deɛ ɔde ne ho bɔ Awurade ho no ne no yɛ honhom baako.

¹⁸Monnwane adwamammɔ! Bɔne biara a onipa yɛ nni nipadua mu, na deɛ ɔbɔ adwaman no deɛ, ɔyɛ ɔno ara ne nipadua bɔne.

¹⁹ Anaasɛ monnim sɛ mo nipadua yɛ Honhom Kronkron a ɔwɔ mo mu, a monya firii Nyankopɔn hɔ no asɔredan, na monne mo ho?

²⁰ Na wɔtɔɔ mo aboɔden; enti monhyɛ Onyankopɔn animuonyam mo nipadua mu.