Read Twi Asante 2 Korintofoɔ 13 Bible Online

2 Korintofoɔ 13 - Twi Asante bible

2 Korintofoɔ 13

¹ Mprɛnsa ni a mereba mo nkyɛn. Adansefoɔ baanu anaa baasa ano asɛm biara bɛgyina.

²Mebɔɔ wɔn a wɔyɛɛ bɔne kane no ne wɔn a aka no nyinaa kɔkɔ, saa ara nso na seesei a menni mo nkyɛn yi merebɔ wɔn kɔkɔ, sɛdeɛ meyɛeɛ berɛ a mebaa hɔ ne mprenu soɔ no, sɛ meba bio a, meremfa wɔn ho nkyɛ wɔn.

³Ɛfiri sɛ mohwehwɛ Kristo a ɔkasa me mu no ho adansedie, ɔno na ɔnyɛ mmerɛ wɔ mo fam, na mmom ɔwɔ mo mu tumi.

⁴ Na mmerɛyɛ mu na wɔbɔɔ no asɛnnua mu deɛ, nanso ɔnam Nyankopɔn tumi so te ase. Na yɛn nso yɛyɛ mmerɛ wɔ ne mu deɛ, nanso yɛn ne no nam Nyankopɔn tumi so bɛtena ase wɔ mo fam.

⁵ Monsɔ mo ho nhwɛ sɛ mowɔ gyidie no mu anaa? Mommisa mo ho nhwɛ! Anaasɛ monnim mo ho sɛ Yesu Kristo te mo mu? Gye sɛ mommfata deɛ.

⁶Na m’ani da so sɛ mobɛhunu sɛ yɛn deɛ, yɛnyɛ nnipa a wɔmfata.

⁷Nanso yɛbɔ Onyankopɔn mpaeɛ sɛ monnyɛ bɔne biara, ɛnyɛ sɛ wɔbɛhu yɛn sɛ yɛfata, na mmom mo, mobɛyɛ deɛ ɛyɛ fɛ, na yɛn deɛ yɛayɛ sɛ wɔn a wɔmfata.

⁸Na yɛntumi nyɛ hwee ntia nokorɛ no, na mmom deɛ yɛtumi yɛ no, yɛyɛ ma nokorɛ.

⁹Na sɛ yɛyɛ mmerɛ, na mo deɛ, moyɛ den a, yɛn ani gye; na mo pɛyɛ ho na yɛbɔ mpaeɛ.

¹⁰ Yei nti na, menni mo nkyɛn yi, meretwerɛ yei mabrɛ mo, na sɛ meba a, mene mo anni no denden, sɛdeɛ tumi a Awurade de ama me sɛ ɛmma nkɔsoɔ na ɛnyɛ ɔsɛeɛ no teɛ no.

¹¹ Afei awieeɛ, anuanom, makra mo. Monyɛ pɛ, momma mo werɛ nkyekye, monnya adwene korɔ, montena asomdwoeɛ mu, na ɔdɔ ne asomdwoeɛ Nyankopɔn bɛdi mo akyi.

¹² Momfa mfeano kronkron nkyeakyea mo ho.

¹³Ahotefoɔ no nyinaa kyeakyea mo.

¹⁴ Awurade Yesu Kristo adom, Onyankopɔn dɔ ne Honhom Kronkron ayɔnkofa nka mo nyinaa.