Read Twi Asante 2 Korintofoɔ 2 Bible Online

2 Korintofoɔ 2 - Twi Asante bible

2 Korintofoɔ 2

¹ Na meyɛɛ m’adwene sɛ meremfa awerɛhoɔ memma mo nkyɛn bio.

²Na sɛ meho mo werɛ a, na hwan na ɔma me bo tɔ me yam sɛ deɛ mehoo ne werɛ no ara?

³ Na metwerɛɛ ade korɔ yi ara, na sɛ menya meba a, wɔn a ɛsɛ sɛ wɔgye m’ani no anho me werɛ; ɛfiri sɛ mewɔ mo mu awerɛhyɛmu sɛ m’anigyeɛ yɛ mo nyinaa dea.

⁴Na mefiri akoma mu ahohia ne ahometeɛ pii mu de nisuo bebree na metwerɛɛ mo, ɛnyɛ sɛdeɛ mo werɛ bɛhoɔ, na mmom sɛdeɛ mobɛhunu ɔdɔ kɛseɛ a mewɔ ma mo.

⁵ Na sɛ obi ayi awerɛhoɔ a, ɛnyɛ me na wayi me awerɛhoɔ, na ɔkwan bi so no — meka yei na me kasa no mu anyɛ den dodo — ɛyi mo nyinaa awerɛhoɔ.

⁶Ka a mo mu bebree aka saa onipa no anim no dɔɔso ma no,

⁷enti afei momfa nkyɛ mmom na monkyekyere ne werɛ, na awerɛhoɔ bebree no ammene no.

⁸Enti metu mo fo sɛ monyi ɔdɔ adi nkyerɛ no.

⁹ Na yei nti nso na metwerɛeɛ, sɛ mɛhunu sɛ wɔasɔ mo ahwɛ ahunu sɛ mo aso yɛ mmerɛ wɔ adeɛ nyinaa mu anaa?

¹⁰ Na deɛ mode biribi kyɛ no no, me nso mede kyɛ no. Na sɛ mede biribi makyɛ a, deɛ mede makyɛ no, mo nti na mede kyɛɛ Kristo anim;

¹¹ na Satan anni yɛn amim; ɛfiri sɛ yɛnim n’akwan.

¹² Nanso mebaa Troa bɛkaa Kristo asɛmpa, na wɔbuee ɛpono maa me Awurade mu no,

¹³ mannya honhom mu ahomeka, ɛfiri sɛ manhunu me nua Tito; enti mekraa wɔn mefirii hɔ mekɔɔ Makedonia.

¹⁴Na aseda nka Onyankopɔn a ɔma yɛdi Kristo mu nkonim daa, na ɔnam yɛn so yi ne nimdeɛ ho hwa adi mmaa nyinaa;

¹⁵ ɛfiri sɛ yɛyɛ Kristo aduhwam ma Onyankopɔn, de ma wɔn a wɔregye wɔn nkwa ne wɔn a wɔreyera nyinaa.

¹⁶ Yɛyɛ owuo hwa a ɛde kɔ owuo mu ma ebinom, na yɛyɛ nkwa hwa a ɛde kɔ nkwa mu ma ebinom nso. Na hwan na ɔfata yeinom?

¹⁷ Na yɛnte sɛ nnipa bebree a wɔnenam tɔn Nyankopɔn asɛm no, na mmom sɛ wɔn a wɔyi wɔn yam kasa, Nyankopɔn mu; na yɛkasa Kristo mu wɔ Nyankopɔn anim.