Read Twi Asante 2 Korintofoɔ 4 Bible Online

2 Korintofoɔ 4 - Twi Asante bible

2 Korintofoɔ 4

¹ Saa nti, sɛ yɛnam Nyankopɔn mmɔborɔhunu so wɔ saa som yi nti, yɛmpa aba,

² na mmom yɛapo aniwudeɛ a ɛhunta no, na yɛnnante anifire mu, anaasɛ yɛmfra Nyankopɔn asɛm no mu, na mmom yɛda nokorɛ no adi, de yi yɛn ho kyerɛ nnipa nyinaa, Nyankopɔn anim.

³ Na sɛ yɛn asɛmpa so akata a, ɛso akata wɔ wɔn a wɔreyera no mu;

⁴ wɔn mu na wiase nyame afira wɔn a wɔnnye nnie no adwene ani, na Kristo a ɔyɛ Nyankopɔn suban no animuonyam asɛmpa no hann anhyerɛn amma wɔn.

⁵ Na ɛnyɛ yɛn ho asɛm na yɛka, na mmom Kristo Yesu, sɛ ɔne Awurade, ɛne yɛn nso, sɛ Yesu nti yɛyɛ mo nkoa.

⁶ Ɛfiri sɛ ɛyɛ Onyankopɔn a ɔkaa sɛ hann mfiri esum mu nhyerɛn no na wahyerɛn yɛn akoma mu, sɛ Nyankopɔn animuonyam a ɛwɔ Kristo anim no ho nimdeɛ hyerɛn.

⁷ Na yɛwɔ saa agyapadeɛ yi wɔ dɔteɛ anwenneɛ mu, sɛdeɛ wɔbɛma no ada adi pefee na tumi a ɛboro soɔ no ayɛ Nyankopɔn dea, na amfiri yɛn mu.

⁸ Ade nyinaa mu wɔhiahia yɛn ho, nanso yɛn home ntee; yɛn ho akyere yɛn, nanso yɛn ani ntanee.

⁹Wɔtaataa yɛn, nanso wɔmpaa yɛn akyi; wɔabɔ yɛn ato fam, nanso wɔnsɛee yɛn.

¹⁰ Daa yɛso Awurade Yesu wuo no wɔ yɛn nipadua mu nam, na Yesu nkwa no nso ada adi yɛn nipadua mu.

¹¹ Ɛfiri sɛ yɛn a yɛte aseɛ yi, daa Yesu nti, wɔyi yɛn ma owuo, na Yesu nkwa no nso ada adi yɛn honam a ɛbɛwuo no mu.

¹²Enti owuo di dwuma wɔ yɛn mu, na nkwa di dwuma wɔ mo mu.

¹³ Na sɛ yɛwɔ gyidie honhom korɔ no ara nti, sɛdeɛ wɔatwerɛ sɛ: Megye mediiɛ, na mekasaeɛ, yɛn nso yɛgye di na enti yɛkasa nso;

¹⁴ na yɛnim sɛ, deɛ ɔnyanee Awurade Yesu no bɛnyane yɛn nso, ne Yesu, na wayi yɛne mo akyerɛ.

¹⁵ Aane, mo nti na ne nyinaa yɛ, na adom no adɔɔso afa nnipa pii so ama aseda aboro so ama Onyankopɔn animuonyam.

¹⁶ Yei nti na yɛmpa aba, na sɛ yɛn honam ani nipa yi resɛe mpo a, emu nohoa nipa no dane foforɔ daa daa.

¹⁷ Na yɛn seesei amanehunu a ɛyɛ hare yi resiesie daa animuonyam a ɛso kokuroo tra so pii ama yɛn,

¹⁸ na yɛnhwɛ nnoɔma a wɔhunu, na mmom yɛhwɛ nnoɔma a wɔnhunu; ɛfiri sɛ nnoɔma a wɔhunu no nkyɛ na atwa mu; na nnoɔma a wɔnhunu no na ɛtena hɔ daa.