Read Twi Asante 2 Korintofoɔ 7 Bible Online

2 Korintofoɔ 7 - Twi Asante bible

2 Korintofoɔ 7

¹Afei sɛ yɛwɔ saa bɔhyɛ yi nti, adɔfoɔ, momma yɛnhohoro yɛn ho mfiri honam ne honhom mu fi nyinaa ho, na yɛawie yɛn ahoteɛ Onyankopɔn suro mu.

² Mommue mo akoma mu mma yɛn; yɛnyɛɛ obiara bɔne, yɛnsɛee obiara, yɛnsisii obiara.

³ Menka yei wɔ afobuo kwan so; ɛfiri sɛ maka dada sɛ, sɛ yɛwu oo, yɛte ase oo, mohyɛ yɛn akoma mu.

⁴Mewɔ akokoɔduro kɛseɛ wɔ mo ho, mewɔ mo ho ahohoahoa pii; awerɛkyekyerɛ ahyɛ me ma, na m’anigyeɛ aboro so pii yɛn ahohia nyinaa mu.

⁵ Na yɛbaa Makedonia no nso, yɛn honam annya ahome biara, na mmom yɛn ho hiahiaa yɛn afa nyinaa: Ɔko atwa yɛn ho ahyia, na ehu ahyɛ yɛn mu ma;

⁶ nanso Onyankopɔn a ɔkyekyere ahobrɛaseɛfoɔ werɛ no de Tito ba a ɔbaeɛ no kyekyeree yɛn werɛ.

⁷Na ɛnyɛ ne ba no nko ara, na mmom awerɛkyekyerɛ nso a ɔnyaa no mo ho berɛ a ɔkaa mo anigyina wɔ yɛn ho, mo awerɛhodie, me ho mmɔden a mobɔ a ɛmaa m’ani gyee pii kyerɛɛ yɛn no.

⁸ Na sɛ mede me krataa no maa mo werɛ hoo mpo a, (mennu me ho); na sɛ menuu me ho nso a, na mehunu sɛ krataa no, sɛ ɛyɛ dɔnhwereɛ pɛ mpo a, ɛhoo mo werɛ.

⁹Afei m’ani agye, ɛnyɛ sɛ mo werɛ hoeɛ ntira, na mmom sɛ mo werɛ ho kɔɔ adwensakyera mu; ɛfiri sɛ mo werɛ hoo Nyankopɔn kwan so, na yɛn nti moanhwere biribi wɔ biribiara mu.

¹⁰ Na Nyankopɔn kwan so awerɛhoɔ yɛ adwensakyera a ɛde kɔ nkwagyeɛ mu, a wɔnnu wɔn ho wɔ ho; na ewiase awerɛhoɔ deɛ, ɛma owuo.

¹¹Na mo werɛ a ɛhoo Nyankopɔn kwan soɔ no ara, monhwɛ nsiyɛ korɔ a ɛmaa mo, ɛne anoyie ne ahi ne ehu ne anigyina ne mmɔdemmɔ ne aweretɔ! Na biribiara mu no moyii mo ho kyerɛɛ sɛ mo ho te, asɛm no mu.

¹²Enti sɛ metwerɛɛ mo a, na ɛnyɛ deɛ ɔyɛɛ bɔne no ntira, nso ɛnyɛ deɛ wɔyɛɛ no bɔne no ntira, na mmom sɛdeɛ nsiyɛ a mowɔ no yɛn ho no bɛda adi mo Nyankopɔn anim.

¹³Yei nti yɛn werɛ akyekye. Na yɛn awerɛkyekyerɛ yi mu yɛn ani gye boroo so, ɛnam Tito anigyeɛ no nti, ɛfiri sɛ mo nyinaa momaa ne honhom nyaa ahotɔ.

¹⁴Na sɛ mede mo mehoahoa me ho mekyerɛɛ no a, m’ani anwu, na mmom sɛdeɛ yɛkaa mo nsɛm nyinaa nokorɛ mu no, saa ara nso na yɛn ahoahoa a yɛhoahoaa yɛn ho wɔ Tito anim no ayɛ nokorɛ.

¹⁵ Na n’akoma wɔ mo ho pii boro so, na ɔkae mo nyinaa setie, sɛdeɛ mode suro ne ahopopoɔ gyee no no.

¹⁶M’ani agye sɛ biribiara mu mewɔ mo mu awerɛhyɛmu.