Read Twi Asante 2 Korintofoɔ 8 Bible Online

2 Korintofoɔ 8 - Twi Asante bible

2 Korintofoɔ 8

¹ Nanso, anuanom, yɛrema moahunu Nyankopɔn adom a wɔde adom Makedonia asafo no,

²ɛfiri sɛ, wɔn ahohiahia sɔhwɛ kɛseɛ mu no, wɔn anigyeɛ buu so maa wɔn wɔ wɔn hia bebrebe mu mpo, wɔyii ayamyɛ kɛseɛ kyerɛe;

³na medi wɔn ho adanseɛ sɛ, wɔde wɔn ara wɔn pɛ maa sɛdeɛ wɔbɛtumi, wɔma maa no boroo wɔn ahoɔden so mpo,

⁴ na wɔkoto srɛɛ yɛn pii sɛ, wɔbɛnya kyɛfa wɔ som a wɔde som ahotefoɔ wɔ adɔeyɛ ho.

⁵Na ɛnyɛ sɛdeɛ na yɛn ani da soɔ no, na mmom wɔnam Onyankopɔn pɛ so dii kan de wɔn ho maa Awurade, na afei wɔde wɔn ho maa yɛn nso,

⁶na ama yɛsrɛɛ Tito sɛ, sɛdeɛ ɔfirii aseɛ kane no, ɔnwie adɔeyɛ no saa ara wɔ mo mu.

⁷ Na sɛdeɛ moboro so nnoɔma nyinaa mu no, gyidie ne kasa ne nimdeɛ ne mmɔdemmɔ nyinaa ne ɔdɔ a mode dɔ yɛn mu no, monhwɛ sɛ mobɛboro so adɔeɛ yi mu nso.

⁸Menka no ɔhyɛ so, na mmom menam ebinom mmɔdemmɔ so meresɔ mo dɔ mapa no ahwɛ.

⁹ Na monim yɛn Awurade Yesu Kristo adom no, sɛ ɔyɛ ɔdefoɔ deɛ, nanso mo nti ɔbɛyɛɛ ohiani, na monam ne hia no so abɛyɛ adefoɔ.

¹⁰Na m’adwene a ɛwɔ ho ne sɛ, ɛfata sɛ afei mowie deɛ afe ni, ɛnyɛ ɔyɛ nko ara na mofirii aseɛ yɛeɛ, na mmom monyaa ho pɛ no nso.

¹¹Na afei monwie ne yɛ no nso, na sɛdeɛ mowɔ akoma a ɛpɛ no, moafiri deɛ mowɔ no mu awie ne yɛ no saa ara.

¹² Na sɛ akoma a ɛpɛ no wɔ hɔ a, ɛsɔ ani, sɛdeɛ onii wɔ adeɛ, na ɛnyɛ sɛdeɛ ɔnnie.

¹³Na ɛnyɛ sɛ ebinom ho dwo wɔn na mo deɛ mo ho hiahia mo,

¹⁴ na mmom sɛ ɛnyɛ pɛpɛɛpɛ nti; na saa berɛ yi mu, mo mmorosoɔ akɔgu wɔn hia mu, na wɔn mmorosoɔ nso abɛgu mo hia mu, na ayɛ pɛpɛɛpɛ,

¹⁵ sɛdeɛ wɔatwerɛ sɛ: Deɛ ɔboaboaa bebree ano no, annya ammoro so, na deɛ ɔboaboaa kakraa bi ano no, anhia no hwee.

¹⁶Na aseda nka Onyankopɔn a ɔde mo ho mmɔdemmɔ yi ara bi ahyɛ Tito akoma mu.

¹⁷Ɛwɔ mu sɛ yɛn afotuo na ɔtieeɛ deɛ, nanso ne mmɔdemmɔ mmorosoɔ nti na ɔde ɔno ara ne pɛ baa mo nkyɛn.

¹⁸Na yɛasoma no ne onua bi a wɔayi no ayɛ wɔ asɛmpa no ka ho wɔ asafo no nyinaa mu no,

¹⁹ na ɛnyɛ yei nko ara, na ɔno na asafo no ayi no sɛ ɔne yɛn nnante nkura adɔeyɛ a yɛsom ho yi mu, mma Awurade no ara animuonyam, na ɛnkyerɛ yɛn mmɔdemmɔ kɛseɛ no.

²⁰Na yɛda yɛn ho so, na obiara annya yɛn ho asɛm anka wɔ akyɛdeɛ kɛseɛ a yɛsom ho yi ho;

²¹na yɛdwene deɛ ɛfata, ɛnyɛ Awurade anim nko, na mmom nnipa anim nso.

²²Na yɛresoma yɛn nua a yɛanya no asɔ no ahwɛ sɛ ɔyɛ mmɔdemmɔfoɔ wɔ nnoɔma bebree mu no aka wɔn ho, na afei nso awerɛhyɛmu a ɔwɔ no mo mu nti, ɛma ne mmɔdemmɔ no boro so.

²³ Na Tito deɛ, ɔyɛ me yɔnko ne me yɔnko dwumayɛfoɔ ma mo; yɛn nuanom no deɛ, wɔyɛ asafo ahodoɔ no asomafoɔ, Kristo animuonyam.

²⁴ Enti monyi mo dɔ ne nhoahoa a yɛde hoahoa yɛn ho no nkyerɛ wɔn wɔ asafo ahodoɔ no anim.