Read Twi Asante Galatifoɔ 5 Bible Online

Galatifoɔ 5 - Twi Asante bible

Galatifoɔ 5

¹ Adehyedie mu na Kristo ama yɛade yɛn ho. Enti monnyina pintinn, na mommma wɔmmfa akoayɛ kɔnnua ntoatoa mo bio.

²Hwɛ, me Paulo, mese mo sɛ wɔtwa mo twetia a, Kristo ho remma mfasoɔ biara mma mo.

³Na medi adanseɛ bio mekyerɛ onipa biara a wɔatwa no twetia sɛ, ɛtwa sɛ ɔdi mmara no nyinaa soɔ.

⁴Mo a mopɛ sɛ wɔbu mo bem mmara no mu no, wɔatete mo afiri Kristo ho, moafiri adom mu ahwe ase.

⁵Na yɛn deɛ, yɛnam honhom so, firi gyidie mu, twɛn tenenee anidasoɔ.

⁶ Ɛfiri sɛ Kristo Yesu mu deɛ, twetiatwa anaa momonotoyɛ nyɛ hwee, na mmom gyidie a ɛnam ɔdɔ so yɛ adwuma.

⁷Na moretu mmirika no yie; hwan na ɔsii mo kwan sɛ monntie nokorɛ no?

⁸ Saa adwensakyera yi mfiri deɛ ɔfrɛ mo no.

⁹ Mmɔreka ketewaa bi na ɛka mmɔre no nyinaa.

¹⁰ Me deɛ, m’ani da mo so, wɔ Awurade mu sɛ, morennwene biribi foforɔ biara sɛ me deɛ no; na deɛ ɔhaa mo no, sɛ ɔte sɛn dɛn ara a, ɔbɛnya atemmuo.

¹¹ Na me deɛ, anuanom, sɛ meda so meka twetiatwasɛm a, anka adɛn na wɔda so taa me? Ɛnneɛ na anka asɛnnua no suntidua no nni hɔ bio.

¹² Me nko a, anka wɔn a wɔma monya adwenem sakasaka no, wɔadi wɔn ho awu!

¹³ Anuanom, adehyedie mu na wɔafrɛ mo aba; nanso mommma adehyedie no nyɛ ɔkwan mma honam, na mmom momfa ɔdɔ so nsonsom mo ho.

¹⁴ Na mmara no nyinaa wie pɛyɛ asɛm baako mu, ɛne sɛ: Dɔ wo yɔnko sɛ wo ho!

¹⁵Na sɛ mokeka na momemene mo ho a, monhwɛ yie na moanni mo ho awu.

¹⁶ Na mese: Monnante honhom mu na monnni honam akɔnnɔ akyi.

¹⁷ Na honam kɔn dɔ tia honhom, na honhom tia honam, na nnoɔma mmienu yi nhyia, na ɛsi mo deɛ mopɛ sɛ moyɛ ho kwan.

¹⁸Na sɛ honhom de mo nam a, na monni mmara ase.

¹⁹ Na honam nnwuma no da adi pefee, ɛne adwamammɔ, efi, ahohwie,

²⁰abosonsom, adutoɔ, ɔtane, akayɛ, ahoɔyea, abufuo, aperepereɛ, kunsunkunsum, mpaepaemu,

²¹ nitan, nsaborɔ, agobɔne ne deɛ ɛtete saa; yeinom ho na merebɔ mo kɔkɔ, sɛdeɛ mebɔɔ mo kɔkɔ kane no, sɛ wɔn a wɔyɛ saa nnoɔma yi rennya Nyankopɔn ahennie no.

²² Na honhom aba ne ɔdɔ, anigyeɛ, asomdwoeɛ, abodwokyɛre, ayamyɛ, papayɛ, gyidie,

²³ ɔdwoɔ ne anidahɔ. Mmara biara nni hɔ a ɛtia yeinom.

²⁴ Na wɔn a wɔyɛ Kristo Yesu dea no abɔ honam ne ne nhyɛsodeɛ ne n’akɔnnɔ asɛnnua mu.

²⁵ Sɛ yɛte ase honhom mu a, momma yɛnnante honhom mu nso.

²⁶ Mommma yɛmpɛ animuonyam hunu nnyiyi yɛn ho abufuo, nntentane yɛn ho.