Read Twi Asante Filipifoɔ 4 Bible Online

Filipifoɔ 4 - Twi Asante bible

Filipifoɔ 4

¹ Enti, me nuanom a medɔ mo na mefe mo, m’anigyeɛ ne m’abotire, monnyina pintinn wɔ Awurade mu saa, m’adɔfoɔ.

²Metu Euodia fo, na metu Sintike nso fo sɛ wɔnya adwene korɔ Awurade mu.

³ Na mesrɛ wo nso, me yɔnko konnuasoafoɔ nokwafoɔ, sɔ saa mmaa yi mu abia, ɛfiri sɛ wɔn na wɔkaa me ho peree asɛmpa no, wɔne Klemens nso ne me yɔnko adwumayɛfoɔ a aka a wɔn din hyehyɛ nkwa nwoma mu no.

⁴ Momma mo ani nnye Awurade mu daa! Meka no bio sɛ: Momma mo ani nnye!

⁵Momma nnipa nyinaa nhunu mo abodwokyerɛ! Awurade abɛn.

⁶ Monnna nnnwene biribiara nnha mo ho, na mmom ade nyinaa mu momfa mpaebɔ ne nkotosrɛ ɛne aseda mma mo adesrɛ nnuru Nyankopɔn aso mu;

⁷ na Nyankopɔn asomdwoeɛ a ɛtra nteaseɛ nyinaa soɔ no bɛhwɛ mo akoma ne mo adwene so Kristo Yesu mu.

⁸ Afei deɛ ɛdi akyire, anuanom, deɛ ɛyɛ nokorɛ, deɛ anim yɛ duro, deɛ ɛtene, deɛ ɛho teɛ, deɛ ɛyɛ ahomeka, deɛ ɛwɔ din pa, sɛ ɔbra pa bi wɔ hɔ a, sɛ ayeyie bi wɔ hɔ a, saa nnoɔma yi ho na monnwene;

⁹ deɛ moasua nso na moagyeɛ na moateɛ na moahunu wɔ me ho no, ɛno ara na monyɛ! Na asomdwoeɛ Nyankopɔn ne mo bɛtena.

¹⁰Nso m’ani gye kɛseɛ wɔ Awurade mu sɛ moafiri aseɛ redwene me ho bio; modwene me ho deɛ, nanso moannya ho kwan.

¹¹ Ɛnyɛ sɛ ohia nti na mereka yei; ɛfiri sɛ me deɛ, masua sɛ asetena biara a mewɔ mu no, mepene ma no dɔɔso ma me.

¹² Menim ahokyere, na menim ahonya nso. Biribiara ne nnoɔma nyinaa akokwa me, ɔmeeɛ ne ɛkɔm ne akonkosɛm ne hiadie;

¹³ metumi ade nyinaa yɛ, deɛ ɔhyɛ me den no mu.

¹⁴Nanso moyɛɛ no yie sɛ moboaa me wɔ m’ahohia no mu.

¹⁵ Na mo Filipifoɔ nso monim sɛ asɛmpa no mfitiaseɛ mu a mefiri Makedonia mekɔeɛ no, asafo biara ammoa me ɔma ne ɔgyeɛ nkontabuo ho, sɛ mo nko ara.

¹⁶Na Tesalonika nso mosomaa prɛko ne ne mprenu so de deɛ ɛhia me brɛɛ me.

¹⁷ Ɛnyɛ sɛ merehwehwɛ akyɛdeɛ, na mmom merehwehwɛ aba a ɛma mo nkonta dɔɔso.

¹⁸ Na manya ne nyinaa ama no aboro so. Na ɛfiri sɛ me nsa kaa deɛ mode manee Epafrodito no, mayɛ ma, ɛyɛ ehwa a ɛyɛ dɛ, ɛyɛ afɔrebɔ a wɔgye a ɛsɔ Nyankopɔn ani.

¹⁹Na me Nyankopɔn bɛma mo deɛ ɛhia mo nyinaa, sɛdeɛ n’ahonya no teɛ, animuonyam mu, Kristo Yesu mu.

²⁰Yɛn Agya Nyankopɔn na wɔmfa animuonyam mma no daa daa. Amen.

²¹Monkyeakyea ahotefoɔ no nyinaa mmaako mmaako Kristo Yesu mu. Anuanom a wɔka me ho no kyeakyea mo.

²²Ahotefoɔ no nyinaa kyeakyea mo, ne titire no, wɔn a wɔfiri Kaesare fie.

²³Awurade Yesu Kristo adom nka mo honhom.