Read Twi Asante 1 Tesalonikafoɔ 5 Bible Online

1 Tesalonikafoɔ 5 - Twi Asante bible

1 Tesalonikafoɔ 5

¹ Na nna no ne mmerɛ no deɛ, anuanom, ɛnhia mo sɛ wɔtwerɛ brɛ mo.

² Ɛfiri sɛ mo ara monim yie, sɛ Awurade da no bɛba sɛ owifoɔ ba anadwo.

³ Na berɛ a wɔbɛka sɛ: Yɛwɔ asomdwoeɛ ne ahotɔ no, ɛnneɛ mpofirim na ɔsɛeɛ bɛba wɔn soɔ sɛ awoko ba ɔbaa a ɔnyem soɔ, na wɔrennya kwan nnwane.

⁴Na mo deɛ, anuanom, monni esum mu, na ɛda no abɛto mo sɛ owifoɔ.

⁵ Mo nyinaa moyɛ hann mma ne adekyeeɛ mma; yɛnyɛ anadwo anaa esum dea.

⁶Enti mommma yɛnnna sɛ wɔn a aka no, na mmom momma yɛnwɛn, na yɛn ani nna hɔ.

⁷Ɛfiri sɛ wɔn a wɔda da anadwo, na wɔn a wɔborɔ boro anadwo,

⁸ na yɛn a yɛyɛ adekyeeɛ dea yi, momma yɛn ani nna hɔ, na yɛnhyɛ gyidie ne ɔdɔ nkataboɔ ne nkwagyeɛ anidasoɔ sɛ dadeɛ kyɛ.

⁹Ɛfiri sɛ Onyankopɔn anyi yɛn amma abufuo, na mmom ɔyii yɛn sɛ yɛn Awurade Yesu Kristo nti yɛmmɛnya nkwagyeɛ.

¹⁰ Ɔno na ɔwu maa yɛn sɛ yɛnyane oo, yɛwu oo, yɛne no ntena nkwa mu.

¹¹ Enti montutu mo ho fo na obiara mpia ne yɔnko, sɛdeɛ moreyɛ no ara.

¹² Na yɛsrɛ mo, anuanom, sɛ monhunu wɔn a wɔyɛ mo mu adwuma na wɔdi mo so mpanin Awurade mu, na wɔkasa kyerɛ mo,

¹³na mommu wɔn papaapa ɔdɔ mu, wɔn adwuma nti. Montena asomdwoeɛ mu.

¹⁴ Afei yɛtu mo fo, anuanom, sɛ monkasa nkyerɛ wɔn a wɔnam basabasa, monkyekyere wɔn a wɔn akoma atuo werɛ, monsɔ wɔn a wɔyɛ mmerɛ mu, montɔ mo bo ase mma nnipa nyinaa.

¹⁵ Monhwɛ na obi amfa bɔne antua obi bɔne ka, na mmom monni deɛ ɛyɛ akyiri daa, mo ne nnipa nyinaa ho.

¹⁶ Momma mo ani nnye daa;

¹⁷ monnnyae mpaebɔ da!

¹⁸ Monna ase ade nyinaa mu, na yei ne deɛ Onyankopɔn pɛ Kristo Yesu mu wɔ mo ho.

¹⁹ Monnnum honhom no,

²⁰ monnte adiyisɛm atua!

²¹ Monsɔ ade nyinaa nhwɛ, na monsɔ deɛ ɛyɛ no mu den.

²²Monyi mo ho mfiri bɔne su nyinaa ho.

²³Na ɔno asomdwoeɛ Nyankopɔn no ara nte mo ho koraa, na ɔnhwɛ mo honhom ne mo kra ne mo nipadua so mu a ɛho remma asɛm biara yɛn Awurade Yesu Kristo ba mu.

²⁴ Ɔnokwafoɔ ne deɛ wafrɛ mo no, ɔno nso na ɔbɛyɛ.

²⁵Anuanom, mommɔ mpaeɛ mma yɛn.

²⁶ Momfa mfeano kronkron nkyeakyea anuanom nyinaa.

²⁷Mehyɛ mo Awurade mu sɛ, momma wɔnkenkan nwoma yi nkyerɛ anuanom nyinaa.

²⁸Yɛn Awurade Yesu Kristo adom nka mo.