Read Twi Asante 1 Petro 3 Bible Online

1 Petro 3 - Twi Asante bible

1 Petro 3

¹ Saa ara na mo, ɛyerenom, mommrɛ mo ho ase mma mo ara mo kununom, na sɛ ebinom antie asɛm no nso a, wɔafa ɛyerenom abrabɔ a asɛm nni ho so anya wɔn,

²sɛ wɔbɛhwɛ mo abrabɔ a ɛho teɛ wɔ osuro mu.

³ Mommma mo ahyehyɛdeɛ nnyɛ honam ani deɛ, mmɛsawɔ ne sikahyɛ anaa ntadehyɛ mu,

⁴na mmom momma no nyɛ akoma mu nipa a wahunta no, honhom a ɛdwoɔ, na ɛyɛ komm adeɛ a ɛmporɔ mu. Ɛno na ne boɔ yɛ den Nyankopɔn anim.

⁵Na saa na tete no mmaa kronkron a wɔde wɔn ho too Nyankopɔn soɔ no hyehyɛɛ wɔn ho, na wɔbrɛɛ wɔn ho ase maa wɔn ara wɔn kununom,

⁶ sɛdeɛ Sara tiee Abraham, frɛɛ no owura no. Ɔno na, sɛ moyɛ papa na monsuro ahudeɛ biara a, moyɛ ne mma.

⁷ Okununom, mo ne wɔn ntena nimdeɛ mu saa ara, sɛ ɔyere ne adeɛ a ne ho nyɛ den, na monni wɔn ni, sɛ wɔn nso ne mo yɛ nkwa adom no adedifoɔ bi, na mo mpaebɔ kwan ansi.

⁸N’awieeɛ ne sɛ mo nyinaa nnya adwenkorɔ, monhunu mmema mo ho, monnodɔ mo ho sɛ anuanom, mo yam nhyehye mo mmema mo ho, monnwene ahobrɛaseɛ adwene.

⁹ Mommfa bɔne nntua bɔne ka, nso mommfa ɔyɛ nntua ɔyɛ ka; na mmom monhyira, ɛfiri sɛ yei mu na wɔafrɛ mo, sɛ mommɛgye nhyira.

¹⁰ Na deɛ ɔdɔ nkwa na ɔpɛ sɛ ɔhunu nna pa no, ma no nyi ne tɛkyerɛma mfiri bɔne mu, ne n’ano na anka nnaadaasɛm.

¹¹Ma no nkyiri bɔne na ɔnyɛ papa, ma no nhwehwɛ asomdwoeɛ na ɔnni akyire.

¹²Ɛfiri sɛ Awurade ani wɔ wɔn a wɔtene so, na n’aso abue ama wɔn mpaebɔ, na Awurade ani sa wɔn a wɔyɛ bɔne.

¹³Na sɛ modi papa akyiri a, hwan na ɔbɛha mo?

¹⁴ Na sɛ tenenee nti mohunu amane nso a, nhyira ne mo. Na monnsuro wɔn ho hu, na mommma mo akoma nntu.

¹⁵ Na mommu Awurade Kristo kronkron wɔ mo akoma mu. Nso monsiesie mo ho daa, sɛ mobɛkyerɛ obiara a ɔbisa mo anidasoɔ a ɛwɔ mo mu no aseɛ,

¹⁶ɔdwoɔ ne suro mu, na monnya ahonim pa, na deɛ wɔdi mo ho nsekuro wɔ mu no, wɔn a wɔgu mo abrabɔ pa a ɛwɔ Kristo mu no ho fi no ani awu.

¹⁷ Na sɛ ɔpɛ na Onyankopɔn pɛ sɛ mohunu amane sɛ papayɛfoɔ a, ɛyɛ kyɛne sɛ mohunu sɛ bɔneyɛfoɔ.

¹⁸ Ɛfiri sɛ Kristo nso hunuu bɔne ho amane prɛko, deɛ ɔtene hunu maa wɔn a wɔntene, sɛ ɔde yɛn bɛkɔ Nyankopɔn nkyɛn. Wɔkumm no honam mu, na wɔmaa no tenaa ase honhom mu.

¹⁹ Ɛno mu nso na ɔkɔ kɔkaa asɛm kyerɛɛ ahonhom a wɔwɔ afiase

²⁰ a tete no wɔyɛ asoɔdenfoɔ, ɛberɛ a Nyankopɔn abodwokyɛre twɛneeɛ, Noa nna a wɔreyɛ adaka no mu. Emu na akra kakraa bi a wɔn ano si baawɔtwe nyaa nkwa nsuo no mu.

²¹ Ɛno na afei ne nsɛsoɔ a ɛno ne asubɔ no, gye mo nso nkwa, a ɛnyɛ honam ho fi yi mu, na mmom ɛyɛ ahonim pa ho adebisa a Yesu Kristo wusɔreɛ nti yɛnam so yɛ Nyankopɔn deɛ.

²² Ɔno na ɔkɔɔ ɔsoro no, ɔte Nyankopɔn nifa, na abɔfoɔ ne wɔn a wɔwɔ ahoɔden ne tumi mu no abrɛ wɔn ho ase ama no.