Read Twi Asante 2 Petro 1 Bible Online

2 Petro 1 - Twi Asante bible

2 Petro 1

¹Simon Petro, Yesu Kristo akoa ne somafoɔ, de kɔma wɔn a wɔanya gyidie sɛ yɛn deɛ no, yɛn Nyankopɔn ne Agyenkwa Yesu Kristo tenenee mu:

²Adom ne asomdwoeɛ nnɔɔso mma mo, Nyankopɔn ne yɛn Awurade Yesu ho nimdeɛ mu.

³ Sɛdeɛ ne Nyankopɔn fam ahoɔden de nnoɔma a ɛfa nkwa ne onyamesom pa ho nyinaa akyɛ yɛn, deɛ ɔnam animuonyam ne mmaninyɛ so afrɛ yɛn no ho nimdeɛ mu.

⁴Ɛno nso so na ɔnam akyɛ yɛn bɔhyɛ a ɛsoso akɛseakɛse a ne boɔ yɛ den, na sɛ moanya adwane akɔnnɔ mu porɔ a ɛwɔ wiase a, moafa yeinom so anya Nyankopɔn su no bi.

⁵ Yei ara nti na mo nso mommɔ mmɔden nyinaa mfa nka ho, na monkyerɛ mo papayɛ nka gyidie ho, na nimdeɛ nka papayɛ ho,

⁶na anidahɔ nka nimdeɛ ho, na boasetɔ nka anidahɔ ho,

⁷ na onyamesom pa nka boasetɔ ho, na onuadɔ nka onyamesom pa ho, na ɔdɔ mapa nka onuadɔ ho.

⁸Na sɛ yeinom wɔ mo mu na ɛdɔɔso a, ɛremma monyɛ anihafoɔ ne wɔn a wɔnso aba, yɛn Awurade Yesu Kristo ho nimdeɛ fam.

⁹ Ɛfiri sɛ deɛ yeinom abɔ no no yɛ onifirani, na n’ani anyam, ɔnhunu akyiri adeɛ, na ne werɛ afiri ne bɔne a wayɛ dada no ho hohorɔ.

¹⁰Enti mmom, anuanom, mommɔ mmɔden nhyɛ mo frɛ ne mo yie mu den; na sɛ moyɛ yeinom a, morensunti da.

¹¹Na saa na wɔbɛma mo kwan aboro soɔ akɔ yɛn Awurade ne yɛn Agyenkwa Yesu Kristo daa ahennie no mu.

¹²Enti meremma m’ani mpa so sɛ mɛkae mo yeinom daa, nanso monim dada, na moatim nokorɛ a ɛwɔ hɔ yi mu.

¹³ Nanso mebu no sɛ ɛtene sɛ, mete ntomadan yi mu yi, mede nkaeɛ mekanyane mo,

¹⁴ ɛfiri sɛ, menim sɛ pa a wɔbɛpa me ho ntomadan yi bɛba ntɛm so, sɛdeɛ yɛn Awurade Yesu Kristo nso ayi akyerɛ me no.

¹⁵Nanso mɛbɔ mmɔden, na me wiasefire akyiri no, moatumi akae yeinom da biara.

¹⁶Na ɛnyɛ anansesɛm a wɔtoo no nyansam akyi na yɛdi kaa mo yɛn Awurade Yesu Kristo tumi ne ne ba no ho asɛm, na mmom yɛyɛɛ n’animuonyam kɛseɛ no ho adansefoɔ a na yɛn ani tua.

¹⁷ Na ɔnyaa anidie ne animuonyam firii Agya Nyankopɔn nkyɛn no, ɛne sɛ saa nne yi firii animuonyam a ɛsɛ ɔkɛseɛ no, baa ne so sɛ: Oyi ne me Dɔba a ɔsɔ m’ani no,

¹⁸yɛn a yɛne no wɔ bepɔ kronkron no soɔ no tee saa nne yi sɛ ɛfiri soro baeɛ.

¹⁹Nanso yɛwɔ adiyifoɔ asɛm a ɛgyina hɔ pintinn kyɛne saa, ɛno na sɛ mohwɛ no yie sɛ kanea a ɛhran baabi a ɛhɔ yɛ kusuu, de kɔsi sɛ adeɛ bɛkye na adekyeeɛ nsoromma no apue mo akoma mu a, moyɛ no yie.

²⁰Monhunu yei kane sɛ atwerɛ mu adiyisɛm biara nnam onipa nkyerɛaseɛ so;

²¹ ɛfiri sɛ adiyisɛm bi amfa nnipa pɛ so mmaa pɛn, na mmom Nyankopɔn nnipa kronkron so, sɛdeɛ Honhom Kronkron de wɔn rekorɔ no, na wɔkasaeɛ.