Read Twi Asante 1 Yohane 5 Bible Online

1 Yohane 5 - Twi Asante bible

1 Yohane 5

¹ Obiara a ɔgye di sɛ Yesu ne Kristo no, Onyankopɔn na wawo no; na obiara a ɔdɔ ɔwofoɔ no, ɔdɔ deɛ ɔwoo no no nso.

²Sɛ yɛdɔ Onyankopɔn na yɛdi n’ahyɛdeɛ so a, ɛno ara na yɛde hunu sɛ yɛdɔ Nyankopɔn mma.

³ Na yei ne Nyankopɔn dɔ, sɛ yɛbɛdi n’ahyɛdeɛ soɔ, na n’ahyɛdeɛ no nyɛ den.

⁴ Ɛfiri sɛ biribiara a Onyankopɔn woeɛ no di wiase so nkonim, na yei ne nkonim a yɛadi wiase soɔ, mekyerɛ yɛn gyidie.

⁵ Hwan ne deɛ ɔdi wiase so nkonim sɛ deɛ ɔgye di sɛ Yesu ne Nyankopɔn ba?

⁶ Oyi ne deɛ ɔnam nsuo ne mogya so baeɛ, Yesu Kristo no, na ɛnyɛ nsuo nko mu, na mmom ɛyɛ nsuo ne mogya mu. Na honhom no na ɛdi adanseɛ, ɛfiri sɛ honhom no ne nokorɛ no.

⁷Na baasa na ɛdi adanseɛ:[1]

⁸Honhom, nsuo ne mogya, na baasa yi bɔ mu yɛ baako.

⁹Yɛgye nnipa adanseɛ a, Nyankopɔn adanseɛ so kyɛne no, na Nyankopɔn adanseɛ ne adanseɛ a wadi ne Ba ho no.

¹⁰ Deɛ ɔgye Nyankopɔn Ba no die no wɔ adanseɛ, ɔno ara ne mu. Deɛ ɔnnye Onyankopɔn nnie no ama no adane ɔtorofoɔ, ɛfiri sɛ wannye adanseɛ a Onyankopɔn adi wɔ ne Ba ho no anni.

¹¹Na yei ne adanseɛ no, sɛ Onyankopɔn ama yɛn daa nkwa, na nkwa yi wɔ ne ba no mu.

¹²Deɛ ɔwɔ Ɔba no wɔ nkwa no. Deɛ ɔnni Nyankopɔn Ba no, ɔnni nkwa no.

¹³Yeinom na matwerɛ mabrɛ mo,[2] na moahunu sɛ mowɔ daa nkwa, na moagye Nyankopɔn Ba no din adi.

¹⁴ Na nnam a yɛde kɔ ne nkyɛn ne sɛ, yɛsrɛ biribiara sɛdeɛ ɔpɛ a, ɔtie yɛn.

¹⁵Na sɛ yɛnim sɛ ɔtie yɛn deɛ yɛsrɛ no ho a, yɛnim sɛ yɛwɔ nnoɔma a yɛasrɛ no ne nkyɛn no.

¹⁶ Sɛ obi hunu ne nua sɛ ɔyɛ bɔne a ɛnkɔ owuo mu a, ɔmmɛsrɛ, na Onyankopɔn bɛma no nkwa de ama wɔn a wɔyɛ bɔne a ɛnkɔ owuo mu no. Bɔne bi wɔ hɔ a ɛkɔ owuo mu; ɛno ho deɛ, menka sɛ mommɔ mpaeɛ mmisa.

¹⁷Deɛ ɛntene nyinaa yɛ bɔne, na bɔne bi wɔ hɔ a ɛnkɔ owuo mu.

¹⁸ Yɛnim sɛ obiara a Onyankopɔn awo no no, ɔnyɛ bɔne, na mmom deɛ Onyankopɔn awo no no, ɔhwɛ ne ho so, na ɔbɔnefoɔ no nka no.

¹⁹ Yɛnim sɛ, yɛfiri Onyankopɔn, na wiase nyinaa hyɛ ɔbɔnefoɔ no tumi ase.

²⁰ Na yɛnim sɛ Nyankopɔn Ba no aba, na wabɛma yɛn nteaseɛ a yɛde hunu ɔnokwafoɔ no. Na yɛwɔ ɔnokwafoɔ no mu, ne ba Yesu Kristo no mu. Oyi ne nokorɛ Nyankopɔn ne daa nkwa no.

²¹ Mma nkumaa, monwɛn nyi mo ho mfiri ahonisom ho.