Read Twi Asante Atemmufoɔ 15 Bible Online

Atemmufoɔ 15 - Twi Asante bible

Atemmufoɔ 15

¹Na ɛbaa sɛ ɛkyɛree kakra no, ayuotwa berɛ mu no, Samson de abirekyie ba kɔɔ sɛ ɔrekɔhwɛ ne yere anim, na ɔkaa sɛ: Mɛkɔ me yere nkyɛn pia mu. Nanso ɔbaa n’agya amma no kwan amma no ankɔ mu.

² Na ɔbaa n’agya kaa sɛ: Me deɛ, mese wompɛ no bio, enti mede no mama wo yɔnko bi. Ne nua kumaa no ho nyɛ fɛ nsene no anaa? Fa no si n’ananmu.

³Na Samson ka kyerɛɛ wɔn sɛ: Yei deɛ, sɛ me ne Filistifoɔ di no bɔne a, merenni ho so biara.

⁴Na Samson sii mu kɔ kɔkyeree nsakraman ahasa, na ɔfaa ogyatɛnee na ɔde dua sii dua anim de gyatɛnee hyɛɛ dua mmienu biara ntam.

⁵Na ɔsosɔɔ ogyatɛnee no ano no, ɔgyaa wɔn maa wɔkɔɔ Filistifoɔ no ayufuo mu maa no hyee ayuo akuakuo ne ayuo a ɛsisi hɔ ne ngodua nturo no.

⁶Ɛnna Filistifoɔ no kaa sɛ: Hwan mpo na ɔyɛɛ yei? Na wɔse: Timnani no ase Samson, sɛ ɔde ne yere ama ne yɔnko nti. Ɛnna Filistifoɔ no sii mu kɔeɛ de ogya kɔhyee ɔbaa no ne n’agya fie.

⁷Na Samson ka kyerɛɛ wɔn sɛ: Sɛ moayɛ saa a, gye sɛ matɔ mo were ansa na magyae.

⁸Na ɔbobɔɔ wɔn srɛ ne dwonkuo so kunkumm wɔn okunkɛseɛ. Na ɔsii mu kɔtenaa Etam botan tokuro mu.

⁹Ɛnna Filistifoɔ ba bɛkyeree Yuda so nsraban, na wɔtrɛɛ wɔn mu wɔ Lehi.

¹⁰Na Yuda mmarima no kaa sɛ: Adɛn nti na moaba yɛn soɔ yi? Na wɔse: Yɛreba abɛkyekyere Samson na yɛayɛ no sɛdeɛ ɔyɛɛ yɛn no.

¹¹Na Yuda mu mmarima mpensa sii mu kɔɔ Etam botan tokuro no mu, na wɔka kyerɛɛ Samson sɛ: Wonnim sɛ Filistifoɔ na wɔdi yɛn soɔ, na ɛdeɛn na woayɛ yɛn yi? Na ɔka kyerɛɛ wɔn sɛ: Sɛ wɔyɛɛ me no, saa ara na mayɛ wɔn.

¹²Na wɔka kyerɛɛ no sɛ: Yɛreba abɛkyekyere wo na yɛde wo akɔhyɛ Filistifoɔ no nsa. Na Samson ka kyerɛɛ wɔn sɛ: Monka ntam nkyerɛ me sɛ mo ara deɛ, morenyɛ me hwee.

¹³Na wɔka kyerɛɛ no sɛ: Dabi, na kyekyerɛ nko na yɛrebɛkyekyere woɔ de wo akɔhyɛ wɔn nsa. Na kum deɛ, yɛrenku wo. Na wɔde ntampehoma foforɔ mmienu kyekyeree no, na wɔde no foro firii ɔbotan no mu.

¹⁴ Ɔreyɛ aduru Lehi no, Filistifoɔ no bɔɔ ne so ose. Na AWURADE honhom sii ne so, na ntampehoma a ɛwɔ ne basa ho no yɛɛ sɛ asaawa a wɔde ogya aka na ne homa no sanesane firii ne nsa.

¹⁵Na ɔhunuu afunumu abɔgye foforɔ bi, na ɔtenee ne nsa fa de kunkumm mmarima apem.

¹⁶Na Samson kaa sɛ: Mede afunumu abɔgye, ekuo nie, akuo mmienu nie, mede afunumu abɔgye makunkum mmarima apem.

¹⁷Na ɛbaa sɛ ɔwiee kasa no, ɔtoo abɔgyeɛ no mu firi ne nsam twenee, na wɔfrɛɛ hɔ sɛ Ramat-lehi.[3]

¹⁸Na sukɔm de no sɛ, na ɔsu frɛɛ AWURADE sɛ: Wo na wode gyeɛ kɛseɛ yi ahyɛ w’akoa nsa, na afei sukɔm reku me, na mahwe momonotofoɔ nsam.

¹⁹ Na Onyankopɔn paee tokuro a ɛwɔ Lehi no mu, na nsuo firi hɔ bae, na ɔnomee. Na ne honhom sane bae na ɔnyaa nkwa. Enti wɔfrɛ hɔ En-hakore[4] a ɛwɔ Lehi de bɛsi nnɛ yi.

²⁰ Na ɔbuu Israel atɛn Filistifoɔ berɛ no so mfirinhyia aduonu.