Read Twi Asante Rut 2 Bible Online

Rut 2 - Twi Asante bible

Rut 2

¹Na Naomi nyaa ne kunu busuani bi a ɔyɛ ɔbarima kunini a ɔfiri Elimelek abusua mu a ne din de Boas.

²Na Rut, Moabni baa no ka kyerɛɛ Naomi sɛ: Ma menkɔ mfuo mu menkɔdi mmɛtem no mpɛpɛ deɛ mɛnya n’anim animuonyam akyi. Na ɔka kyerɛɛ no sɛ: Me ba, kɔ ɛ!

³Na ɔkɔ kɔdii mpɛpɛ afuo mu wɔ atwafoɔ no akyi. Na ɔkɔfirii afuo bi a ɛyɛ Boas a ɔfiri Elimelek abusua mu no deɛ mu.

⁴Na hwɛ, Boas firi Betlehem bae, na ɔka kyerɛɛ atwafoɔ no sɛ: AWURADE nni mo akyi! Na wɔka kyerɛɛ no sɛ: AWURADE nhyira wo.

⁵Ɛnna Boas ka kyerɛɛ n’akoa a ɔgyina atwafoɔ no akyire sɛ: Hwan ababaa nie?

⁶Na akoa a wɔde no agyina ayutwafoɔ no akyire no kaa sɛ: Ɛyɛ Moabni ababaa a ɔne Naomi sane firii Moab asase so baeɛ no.

⁷Ɔbɛkaa sɛ: Mesrɛ wo, ma menni ayutwafoɔ no akyi menni mpɛpɛ mentase afiafi no ntam. Na ɔbae, na ɔkura mu ara de firi anɔpa de abɛduru sɛsɛɛ a ɔnhomee kakraa bi mpo.

⁸Ɛnna Boas ka kyerɛɛ Rut sɛ: Me ba, tie, nkɔ afuo biara mu nkɔdi mpɛpɛ, nso mfiri ha, na fa wo ho bɔ me mmaawa yi ho.

⁹Ma w’ani mmra afuo no fa a wɔtwa hɔ, na di wɔn akyi. Hwɛ, mahyɛ mmeranteɛ no sɛ wɔnnha wo. Na sɛ sukɔm de wo a, kɔ nnoɔma no ho kɔnom deɛ mmeranteɛ no asa no bi.

¹⁰Ɛnna ɔde n’anim butuiɛ, na ɔkotoo fam na ɔka kyerɛɛ no sɛ: Adɛn nti na manya w’anim adom, na w’ani ku me a meyɛ ɔnanani ho yi?

¹¹ Na Boas buaa no sɛ: Deɛ wo kunu wuo akyi woyɛɛ w’ase no nyinaa, wɔatu aseɛ aka akyerɛ me; sɛdeɛ wogyaa w’agya ne wo na ne asase a wɔwoo wo wɔ soɔ, na wonam baa ɔman a wonni wɔn da yi nkyɛn no.

¹²AWURADE nhyɛ wo wo nneyɛɛ ananmu na nya akatua mu firi AWURADE Israel Nyankopɔn a woaba ne ntaban ase abɛdan no no nsam.

¹³Na ɔkaa sɛ: Me wura, ma me nkɔ so ara nya w’anim adom, ɛfiri sɛ, woakyekyere me werɛ, na woaka w’abaawa asomdwoeɛsɛm, nso mente sɛ wo mmaawa yi mu biara mpo.

¹⁴Na ɛduruu adidiberɛ no, Boas ka kyerɛɛ no sɛ: Bra ha bɛdi aduane no bi, na fa wo buprɛko bɔ nsa kekakeka no mu. Na ɔbɛtenaa ayutwafoɔ no nkyɛn. Na ɔmaa no nkyeweɛ no bi, na ɔwe mee maa ebi kae.

¹⁵Na ɔsɔree sɛ ɔrekɔdi mpɛpɛ no, Boas hyɛɛ ne mmeranteɛ no sɛ: Momma no nni afiafi no nso ntam mpɛpɛ, na mommpoopoo no.

¹⁶ Na monyiyi afiafi no mu deɛ no bi nnyae mu ngu fam mma no, na ɔnni mpɛpɛ; na monnyeyɛ no.

¹⁷Ɛnna ɔdii afuo no mu mpɛpɛ de kɔduruu anwummerɛ, na ɔporee mpɛpɛ a ɔdiiɛ no, na ɛyɛɛ bɛyɛ atokoɔ efa baako.

¹⁸Na ɔsoa baa kuro no mu; na n’ase hunuu deɛ ɔtaseeɛ no; na ɔyii deɛ ɔdi meeɛ na ɛkaeɛ no maa no.

¹⁹Ɛnna n’ase ka kyerɛɛ no sɛ: Ɛhe na wokɔdii mpɛpɛ nnɛ, na ɛhe na wokɔyɛɛ adwuma yi? Nhyira nka deɛ n’ani kuu wo ho no. Na ɔkyerɛɛ n’ase onii ko a ɔkɔyɛɛ ne nkyɛn adwuma no sɛ: Ɔbarima a mekɔyɛɛ ne nkyɛn adwuma nnɛ no din de Boas.

²⁰Na Naomi ka kyerɛɛ n’ase no sɛ: Nhyira nka no AWURADE a ɔnnyaee ateasefoɔ ne awufoɔ adɔeɛyɛ no anim. Na Naomi ka kyerɛɛ no sɛ: Ɔbarima no bɛn yɛn, ɔyɛ yɛn bogya.

²¹Na Moabni Rut kaa sɛ: Nso ɔka kyerɛɛ me sɛ: Mmeranteɛ a mewɔ yi ho na bata kɔsi sɛ wɔbɛwie deɛ mewɔ nyinaa twa.

²²Na Naomi ka kyerɛɛ n’ase Rut sɛ: Me ba, ɛyɛ sɛ wo ne ne mmaawa no bɛkorɔ, na wɔanhu wo, afu foforɔ bi mu.

²³Na ɔbataa Boas mmaawa no ho dii mpɛpɛ de kɔsii sɛ wɔwiee atokoɔ ne ayuo no twa. Na ɔtenaa n’ase no nkyɛn.