Read Tzeltal Génesis 11 Bible Online

Génesis 11 - Tzeltal bible

Génesis 11

¹Ta hich ora junax sc'opic spisil mach'atic ayic ta bahlumilal.

²Te c'alal loq'uic tal ta stojol banti ya xloc' tal c'ahc'al la stahic muc'ul spamlej ta sq'uinal Sinar, tey c'ohtic ta nahinel a.

³Hich la yalbe sbahic: Conic, jpastic ladrillo, ya jchic'tic ta c'ahc', xchihic. Ha ton c'oht yu'unic te ladrillo, soc ha mescla c'oht yu'unic te chapapote.

⁴Patil la yalic: Conic, jpastic muc'ul pueblo soc muc'ul toyol ts'ahc te ya xc'oht c'alal ta ch'ulchan; hich muc' ya xc'oht jc'oblaltic soc hich ma ba ya xpuhcotic bahel ta sba te bahlumilal, xchihic.

⁵Te Jehová co tal ta yilel te muc'ul pueblo soc te muc'ul toyol ts'ahc te yacalic ta spasel te snich'nab winiquetic.

⁶Hich la yal te Jehová: Junax ay te ants-winiquetic, soc junax sc'opic ta spisilic. Hahchemiquix ta a'tel, mayuc bin ya xhu' ya xcomotic yu'un ta spasel te bintic snopoj ta yo'tanic.

⁷Ha yu'un cohucotic bahel, ya jc'atp'umbetic sc'opic scuenta yu'un hich ma xya'iybe sba sc'opic ta tuhlultuhl a, xchi.

⁸Hich te Jehová tey la spucticlan bahel ta swohlol bahlumilal; hich quehchajic ta spasel te muc'ul pueblo.

⁹Ha scuentahil te Babel sbihil c'oht, yu'un tey la sc'atp'umbe sc'opic spisil ants-winiquetic a te Jehová, soc tey la spucticlan bahel ta swohlol bahlumilal.

¹⁰Ha sts'umbal te Sem ini: Schebalix ha'bil sc'axel puhlel a, ay ho'winic (100) ya'bilal te Sem te ayin snich'an, ha te Arfaxad.

¹¹Ho'winic scha'bahc' (500) ha'bil cuxaj xan te Sem te ayinemix a te Arfaxad, soc ayin yan queremetic soc ach'ixetic yu'un.

¹²Ay ho'lajuneb scha'winic (35) ya'bilal a te Arfaxad te ayin snich'an, ha te Sala.

¹³Jbahc' soc oxeb (403) ha'bil cuxaj xan te Arfaxad te ayinemix a te Sala, soc ayin yan queremetic soc ach'ixetic yu'un.

¹⁴Ay lajuneb scha'winic (30) ya'bilal a te Sala te ayin snich'an, ha te Heber.

¹⁵Jbahc' soc oxeb (403) ha'bil cuxaj xan te Sala te ayinemix a te Heber, soc ayin yan queremetic soc ach'ixetic yu'un.

¹⁶Ay chanlajuneb scha'winic (34) ya'bilal a te Heber te ayin snich'an, ha te Peleg.

¹⁷Jbahc' soc lajuneb scha'winic (430) ha'bil cuxaj xan te Heber te ayinemix a te Peleg, soc ayin yan queremetic soc ach'ixetic yu'un.

¹⁸Ay lajuneb scha'winic (30) ya'bilal a te Peleg te ayin snich'an, ha te Reu.

¹⁹Baluneb sbuluchwinic (209) ha'bil cuxaj xan te Peleg te ayinemix a te Reu, soc ayin yan queremetic soc ach'ixetic yu'un.

²⁰Ay lahchayeb scha'winic (32) ya'bilal a te Reu te ayin snich'an, ha te Serug.

²¹Huqueb sbuluchwinic (207) ha'bil cuxaj xan te Reu te ayinemix a te Serug, soc ayin yan queremetic soc ach'ixetic yu'un.

²²Ay lajuneb scha'winic (30) ya'bilal a te Serug te ayin snich'an, ha te Nacor.

²³Lajunwinic (200) ha'bil cuxaj xan te Serug te ayinemix a te Nacor, soc ayin yan queremetic soc ach'ixetic yu'un.

²⁴Ay baluneb scha'winic (29) ya'bilal a te Nacor te ayin snich'an, ha te Taré.

²⁵Balunlajuneb swacwinic (119) ha'bil cuxaj xan te Nacor te ayinemix a te Taré, soc ayin yan queremetic soc ach'ixetic yu'un.

²⁶Ay lajuneb schanwinic (70) ya'bilal a te Taré te ayin snich'nab, ha te Abram, Nacor soc Harán.

²⁷Ha sts'umbal Taré ini: ha snich'nab Taré te Abram, Nacor soc Harán. Ha snich'an Harán te Lot.

²⁸Ha nahil cham te Harán ta Ur te ay ta sq'uinal te caldeohetic, tey nix ta banti ayin, patil cham te state.

²⁹Te Abram soc te Nacor la sta yihnamic, te sbihil te yihnam Abram ha Sarai, te sbihil te yihnam Nacor ha Milca. Ha yantsil-nich'nab Harán te Milca soc te Isca.

³⁰Pero jma'al te Sarai.

³¹Te Taré la yic' bahel te snich'an, ha te Abram, soc te smam, ha te Lot te snich'an Harán, soc te yalib, ha te Sarai te yihnam Abram. Loq'uic bahel ta Ur ay ta sq'uinal te caldeohetic yu'un ya xbahtic ta sq'uinal Canaán, pero c'alal c'ohtic ta Harán tey hilic ta nahinel a.

³²Ay ho'eb sbuluchwinic (205) ya'bilal a te Taré te cham ta Harán.