Read Tzeltal Génesis 17 Bible Online

Génesis 17 - Tzeltal bible

Génesis 17

¹Ay balunlajuneb yo'winic (99) ya'bilal a te Abram te c'alal Jehová la yac' sba ta ilel ta stojol, hich halbot yu'un: Ho'on Dioson te spisil ya xhu' cu'un; behenan ta jtojol soc toj me xawac' aba.

²Ya jpas chapbil-c'op ta atojol soc ya cac' te c'ax bayel ya xp'ohl ats'umbal, xchi.

³Ha yu'un te Abram la spahcan sba la ya'be sta lum te yelaw, c'oponot yu'un Dios, hich halbot:

⁴Ha'at te chapbil-c'op ini te ya jpas ta atojol: ha'at tatilat ya xc'ohat yu'un tsobol nacionetic.

⁵Ma ha'uquix Abram te abihile, Abraham[20] ya xc'ohtix, yu'un la jcac' te tatil ya xc'ohat yu'un tsobol nacionetic.

⁶Ya cac' te c'ax bayel ya xp'ohlat, bayel ta chahp nacionetic ya xc'ohat soc bayel ajwaliletic ya xchicnaj ta acuenta.

⁷Ya jchahp jc'op soc ha'at soc ats'umbal ta cajalcaj bahel, ha chapbil-c'op te mayuc bin ora ya xlaj sc'oblal: te Ho'on Dioson awu'un soc yu'un jayeb ats'umbal ta patil bahel.

⁸Ya ca'bat aq'uinalin soc ats'umbal ta patil bahel te q'uinal ta banti ayat ta nahinel, spisil te sq'uinal Canaán, stalel awu'unic ya xc'oht, soc Ho'on Dioson yu'unic ya xc'ohon, xchi.

⁹Hich halbot xan yu'un Dios te Abraham: Ya me ach'uhun spasel te chapbil-c'op cu'un, ha'at soc ats'umbal ta cajalcaj bahel.

¹⁰Ha ini te chapbil-c'op cu'un te yac ach'uhun spasel soc ats'umbal ta patil bahel: Spisil winiquetic ta awohlilic ya me yich'ic circuncisión.

¹¹Yac ajoybe loq'uel ta bojel te snuhculel sjol sc'unilic, ha seña ya xc'oht yu'un te chapbil-c'op cu'untic.

¹²Ta swaxaquebal c'ahc'al yayinel a ya me yich' circuncisión spisil te alal-queremetic awu'unic ta cajalcaj ats'umbal, ha te mach'a ya x'ayin ta ana soc te jyanlum te mambil awu'un, te ma ats'umbaluc.

¹³Te mach'a ya x'ayin ta ana soc te mach'a mambil awu'un ta ataq'uin, ya me yich' te circuncisión. Ha seña ta abaq'uetalic te chapbil-c'op cu'un te stalel ay.

¹⁴Yan te mach'a ma ba yich'oj circuncisión ya yich' loq'uesel ta alumal, como la sc'axuntaybon te chapbil-c'op cu'un, xchi.

¹⁵Soc hich halbot xan yu'un Dios te Abraham: Te awihnam Sarai, ma xawalbeyix Sarai, ha Sara[21] sbihil ya c'ohtix.

¹⁶Ya ca'be bendición, soc ya ca'bat anich'an ta scuenta. Hich, ya ca'be bendición soc ha nanil ya xc'oht yu'un bayel nacionetic; ya xchicnaj ta scuenta bayel ajwaliletic, xchi.

¹⁷Te Abraham la spahcan sba la ya'be sta lum yelaw ta stojol te Diose, hahch ta tse'ej, hich la yal ta yo'tan: ¿Ya to bal xhu' ya x'ayin snich'an te winic te ayix ho'winic (100) ya'bilal? Soc ¿bin ut'il c'an alajuc te Sara te ayix lajuneb yo'winic (90) ya'bilal? xchi ta yo'tan.

¹⁸Te Abraham la yalbe te Diose: ¡Te ayuc bin ut'il ya yich' te bendición awu'un te Ismael! xchi.

¹⁹La sjac' te Diose: Ya me x'ayin squerem-al te awihnam Sara, ya me awa'be sbihilin Isaac.[22] Ha nix hich ya ca'be te chapbil-c'op cu'un scuenta chapbil-c'op yu'un te sts'umbal ta patil bahel te ma xlaj sc'oblal.

²⁰Yan te Ismael, la jca'iy te bin la awal. Ya ca'be bendición, ya cac' p'ohluc bayel sts'umbal; ha stat lahchayeb ajwaliletic ya xc'oht, soc muc'ul nación ya xc'oht cu'un.

²¹Pero ya jchap te c'op cu'un soc Isaac, ha te anich'an te ya x'ayin ta scuenta Sara ta hich ora ta yan ha'bil, xchi.

²²Te Dios laj yo'tan ta c'op soc Abraham, loc' bahel ta stojol.

²³Ha yu'un te Abraham la yic' tal te Ismael te snich'an, soc spisil te a'batetic te ayinemic ta sna soc spisil te mach'atic smanoj ta staq'uin, spisil te winiquetic te ay ta sna, la ya'be yich'ic circuncisión, hich te bin ut'il halbot yu'un Dios.

²⁴Ay balunlajuneb yo'winic (99) ya'bilal a te Abraham te la yich' circuncisión.

²⁵Soc ay oxlajuneb (13) ya'bilal a te Ismael te la yich' circuncisión.

²⁶Ta junax c'ahc'al la yich'ic circuncisión te Abraham soc Ismael, te snich'ane;

²⁷soc spisil te winiquetic ayic ta sna, ha te a'bat te ayin ta sna soc te jyanlum te smanoj ta staq'uin, pajal la yich'ic circuncisión soc.