Read Tzeltal Génesis 18 Bible Online

Génesis 18 - Tzeltal bible

Génesis 18

¹Te Jehová la yac' sba ta ilel ta stojol Abraham ta jihte' yu'un Mamre te c'alal hucul ta sti'il snahilpac' ta yorahil sc'uxul c'ahc'al.

²Te Abraham la shach sit, la yil oxtuhl winiquetic te tec'ajtic ta stojol. C'alal la yil, ahnimal loc' bahel ta sti'il snahilpac', baht sta tal, la spahcan sba ta lum,

³hich la yal: Tatic, teme ay yutsil awo'tan ta jtojol, awocoluc, ma xc'axat bahel ta stojol te awa'bate.

⁴Ya jc'an tal jtebuc ha' yu'un yac apoc awoquic a, patil yac acux awo'tanic ta ye'tal te'.

⁵Ya quich' tal jtebuc we'elil yu'un yac ata xan awipic a, patil ya xbahex; yu'un ha scuentahil te talex ta stojol te awa'bate, xchi. La sjaq'uic: Hichuc, pasa te bin la awale, xchihic.

⁶Hich te Abraham ora baht ta nahilpac' te banti ay te Sara, hich la yalbe: Ich'a ta ora oxp'is lequil harina, wots'a, pasa ta pan, xchi.

⁷Te Abraham ahnimal baht ta banti ay te wacaxetic, la stsac jcoht alal wacax te tut soc lec, la ya'be te ya'bat te la schahpan ta ora.

⁸Patil la yich' tal queso soc leche soc te alal wacax te pasbilix, la spahchambe swe'ic. La sjoquin ta we'el ta ye'tal te'.

⁹La sjoc'oyic: ¿Banti ay te awihnam Sara? xchihic. Ay ta nahilpac', xchi.

¹⁰Hich halbot yu'un: Jamal ya calbat, ya xcha'talon ta hich ora ta yan ha'bil, te awihnam Sara ya me x'ayin squerem-al, xchi. Te Sara yac ta ya'iyel te c'op ta sti'il te nahilpac' te ay ta spat.

¹¹Mamalix a te Abraham soc me'elix a te Sara, soc ma ba yaquix ta yilel schamel te Sara hich te bin ut'il ya xpasbot te antsetique.

¹²Ha yu'un tse'ejin ta yo'tan te Sara, hich la yal: C'alal me'elonix a soc mamalix a te cajwal ¿ya to bal ca'iybe xan yutsil? xchi.

¹³Te Jehová hich la yalbe te Abraham: ¿Bin yu'un tse'ejin te Sara, te hich la yal: ¿Ya to bal x'alajon te bin ut'il me'elonix? te xchihe?

¹⁴¿Ay bal bin wocol ta pasel ya ya'iy te Diose? Ya suhton tal ta atojol ta yorahil te la jcalbate, ha yorahil a te ya x'ayin squerem-al te Sara, xchi.

¹⁵Xiw te Sara, la smuc ta yo'tan: Ma ba tse'ejinon, xchi. Pero halbot yu'un: Ma hichuc, tse'ejinat, xchi.

¹⁶Hahchic te winiquetic, la yilic bahel ta stojol Sodoma; joquinotic bahel yu'un te Abraham.

¹⁷La yal te Jehová: ¿Ya bal jmuc ta stojol Abraham te bin ya xbaht jpas,

¹⁸te bin ut'il muc'ul nación ya xc'oht te ay bayel yip, soc te bin ut'il spisil te nacionetic ta bahlumilal ya x'a'bot bendición ta scuenta?

¹⁹Como ya jna' te ya me spas ta mandar te yal-snich'nab soc te mach'atic ay yu'un ta patil te ya me st'unic te be yu'un Jehová, ha te ya spasic te bintic toj soc te bintic lec ta pasel, scuenta yu'un te Jehová ya yac' c'ohtuc ta pasel ta stojol Abraham te bin yalbeyej ta jamal.

²⁰Ha yu'un te Jehová la yalbe te Abraham: Te bin ut'il yac ta behbe tohyel c'opetic ta stojol te Sodoma soc Gomorra, soc te c'ax bayel te smulique,

²¹ya xcohon bahel, ya quil teme hich nix spasojic te bin ut'il la yich' halel ta jtojol. Teme ma hichuque, ya me jna', xchi.

²²Loq'uic bahel tey a te winiquetic, bahtic ta stojol Sodoma: pero te Abraham teq'uel hil ta stojol Jehová stuquel.

²³Nohpoj xan bahel te Abraham, hich la yal: ¿Pajal bal yac awac' lajuc soc mach'a chopol yo'tan te mach'a toj yo'tan?

²⁴¿Ha xan teme ay lajuneb yoxwinic (50) ta tuhl tey a te toj yo'tanic, ya bal alajin, ma bal yacuc apasbe perdón te pueblo ta scuenta te lajuneb yoxwinic (50) ta tuhl tey a te toj yo'tanic?

²⁵Ma hichuc ay ta pasel awu'un te pajal yac awac' lajuc soc te mach'a chopol yo'tan te mach'a toj yo'tan, te pajal bin ya xc'oht ta stojol te mach'a toj yo'tan soc te mach'a chopol yo'tan. ¡Mayuc bin ora te hich yac apas! Te Jchahpanwanej yu'un swohlol te bahlumilal ¿ma bal ha'uc ya spas te bin toj ta pasele? xchi.

²⁶Ha yu'un la sjac' te Jehová: Teme ya jta lajuneb yoxwinic (50) ta tuhl ta Sodoma te toj yo'tanic, ma ba ya jlajin te pueblo ta scuentahic, xchi.

²⁷La sjac' xan te Abraham: Hahchemonix ta c'op soc te Cajwal, aunque ts'ubilumon soc tanon.

²⁸Teme ay ho'tuhl ma sta lajuneb yoxwinic (50) ta tuhl te toj yo'tanic, ¿ya bal awac' lajuc spisil te pueblo ta scuenta te ho'tuhlique? Halbot yu'un: Ma ba ya jlajin teme ya jta ho'eb yoxwinic (45) ta tuhl tey a, xchi.

²⁹Te Abraham la sc'opon xan: ¿Ha xan teme ay cha'winic (40) ta tuhl? xchi. Ma ba ya jpas ta scuenta te cha'winic (40) ta tuhl, xchi te Jehová.

³⁰Te Abraham la yalbe xan: Ma me x'ilinat, Cajwal, teme ya jc'oponat xane. ¿Ha xan teme ay lajuneb scha'winic (30) ta tuhl tey a? xchi. Ma ba ya jpas teme ay lajuneb scha'winic (30) ta tuhl ya jta tey a, xchi te Jehová.

³¹Te Abraham la yalbe xan: Mero hahchemonix ta c'op soc te Cajwal: ¿Ha xan teme ay jtahb (20) ta tuhl tey a? xchi. Ma ba ya jlajin ta scuenta te jtahb (20) ta tuhl, xchi te Jehová.

³²La yalbe xan: Ma me x'ilinat, Cajwal, teme ya jc'oponat jun xan buelta: ¿Ha xan teme ay lajuntuhl (10) tey a? xchi. Halbot yu'un: Ma ba ya jlajin ta scaj te lajuntuhl (10), xchi te Jehová.

³³C'alal laj yo'tan ta c'op soc Abraham baht te Jehová; yan te Abraham suht bahel ta sna.