Read Tzeltal Génesis 19 Bible Online

Génesis 19 - Tzeltal bible

Génesis 19

¹Yaquix ta ihc'ubel q'uinal a c'ohtic ta Sodoma te cheb ch'ul a'batetique. Te Lot hucul ta yochibal te Sodoma. C'alal la yilbe sitic, hahch spatbe yo'tanic, la spahcan sba ta lum,

²hich la yal: Jtatiquetic, awocoluc conic ta sna te a'bat awu'un, yu'un yac apoc awoquic soc ya xwayex tey a, ta sab pajel ya xhahchex xan bahel, xchi. La sjaq'uic: Ma'uc, ya xwayotcotic ta calle ha'i ahc'abal ini, xchihic.

³Pero te bin ut'il ma ba laj yo'tan ta c'op te Lot ta stojolic, bahtic soc ta sna. La spasbe we'elil, la spas pan te ma ba yich'oj levadura, hich we'ic.

⁴Pero te c'alal ma to xwayic a, tal sjoytayic te na spisil te winiquetic yu'un Sodoma, jcolel ch'ihyeletic soc mamaletic.

⁵La yawtayic te Lot, hich la yalic: ¿Banti ay te winiquetic te talic ta atojol ha'i ahc'abal ini? Loq'uesa tal, yu'un ya xwayotcotic soc, xchihic.

⁶Ha yu'un te Lot loc' bahel ta stojolic, la smac hilel te puerta ta spat,

⁷hich la yal: Awocolicuc, quermanotac, ma me xapasic te bin chopol ini.

⁸Ilawil, ay cheb cantsil-nich'nab te ma ba tahbilic ta winic, ya quic'beyex loq'uel tal, chican bin yac apasbeyic. Pero ma me ayuc bin xapasbe te winiquetic ini te ochemic ta jna, la yut.

⁹La sjaq'uic: Loc'an teye, xchihic. Soc la yalic xan: Te jyanlum winic ini tal ta nahinel ta cohliltic, ¿yu'un bal ya sc'an ya x'ochix ta juez? C'ax hich bin chopol ya jpasbatcotic a te bin ut'il te yantique, xchihic. Tulan la stenic ta c'op te Lot, soc nohpojic bahel yu'un ya stop'ic te ti'nahil.

¹⁰Hich te winiquetic te ayic ta sna la sloq'ues sc'abic, la snitic ochel ta yut na te Lot, la smaquic te ti'nahil.

¹¹Soc la sc'atp'unic ta ts'o'sit te winiquetic te ayic ta ti'nahil, queremetic soc mamaletic, hich lubic ta slehel te ti'nahile.

¹²Te Lot hich halbot yu'un te winiquetic: ¿Ay bal yan mach'a ay awu'un li'i? Loq'uesa bahel li' ta lugar ini te ani'altac, awal-anich'nab, soc spisil bintic ay awu'un ta pueblo,

¹³yu'un ya me jlajincotic te lugar ini, como bayel c'opetic ta scontra te yajwal te pueblo ini te c'ohtix ta stojol Jehová; ha yu'un te Jehová la sticonotcotic talel ta slajinel, xchihic.

¹⁴Hich loc' bahel te Lot, baht sc'opon te queremetic te chapal ya yic' sbahic soc te yantsil-nich'nab, hich la yalbe ya'iyic: Hahchanic, loc'anic bahel ta lugar ini, yu'un te Jehová ya slajin te pueblo ini, la yut. Pero te queremetic la scuyic ta labanel.

¹⁵C'alal yaquix ta sacubel tal a te q'uinale, te cheb ch'ul a'batetic la sujic te Lot, hich la yalbeyic: Hahchan, ic'a bahel awihnam soc te cheb awantsil-nich'nab te li' ayic, scuenta yu'un ma pajaluc ya xlajat soc te pueblo, xchihic.

¹⁶Te bin ut'il yoquelal ma xloc' te Lot, te cheb winiquetic la stsacticlambeyic sc'ab soc te sc'ab te yihnam soc te cheb yantsil-nich'nab, la yiq'uic loq'uel ta pueblo, ta scaj te na'bot yo'bolil sbahic yu'un te Jehová.

¹⁷C'alal loq'uix bahel ta fuera yu'unic a, la yalbeyic: Loc'anic ta ahnel yu'un te acuxlejal, ma me xasut asit ta apat soc ma me ayuc banti ya xhalajat ta spamlej ini; bahan ta ahnel ta witsiltic scuenta yu'un ma ba ya xlajat a, xchihic.

¹⁸Pero te Lot la yalbe: Ma'uc, awocoluc, jtatiquetic.

¹⁹Lec c'oht sc'oblal ta atojolic te a'bat awu'unic soc muc' te sc'uxul awo'tanic te bin ut'il cuxul a la awic'onic loq'uel tal; pero ma xhu' ya xbohon ta ahnel ta witsiltic, ya wan stahon te bin chopol, hich ya xlajon.

²⁰Ay tut pueblo nopol li'i te banti ya xhu' ya xbohon ta ahnel. Ac'awon bahel tey a, tut nax te pueblo, tey ya xcolon a, xchi.

²¹Halbot yu'un: La jca'iyix te bin la ac'ambon. Ma ba ya cac' lajuc te pueblo yac awale.

²²Suja aba, bahan me ta ahnel tey a, yu'un mayuc bin ya xhu' ya jpas ha to teme ya xc'ohat tey a, xchi. (Ha scuentahil te Zoar[23] c'oht sbihil te pueblo.)

²³Loq'uix tal c'ahc'al a te och ta Zoar te Lot.

²⁴Hich te Jehová la yac' tal ta ch'ulchan azufre soc c'ahc' ta stojol Sodoma soc Gomorra.

²⁵La slajin te pueblohetic soc spisil te spamlej, soc spisil mach'atic nahinemic tey ta pueblohetic, soc sts'unub-yawalic.

²⁶Pero te yihnam te Lot la sut sit ta spat, hich c'atp'uj ta teq'uel bahlal ats'am.

²⁷Sab hahch te Abraham, baht ta banti la stehc'an sba ta stojol Jehová.

²⁸La yil bahel ta stojol Sodoma soc Gomorra soc spisil te spamlej, la yil te xtomomet ta loq'uel sch'ahilel hich te bin ut'il sch'ahilel horno.

²⁹Hich te c'alal Dios la slajinlan te pueblohetic ta spamlej, la sna' te Abraham, hich la sticon loq'uel te Lot ta yohlil te jinel te la slajinlan te pueblohetic ta banti nahinem.

³⁰Te Lot la xi' te ya xnahin ta Zoar, ha yu'un baht ta nahinel ta witsiltic soc te cha'tuhl yantsil-nich'nab. Nahin ta ch'en soc te cheb yantsil-nich'nab.

³¹Te wixil la yalbe te yihts'in: Mamalix te jtatic, soc mayuc winic ta sjoyobal te banti ayotic te ya xhu' ya xnuhpunotic soc hich te bin ut'il stalel spisil te ants-winiquetic ta bahlumilal.

³²La', ya ca'betic yuch' vino te jtatic, ya joquintic ta wayel scuenta yu'un hich ay sts'umbal ya xc'oht a te jtatic, xchi.

³³Hich la ya'beyic yuch' vino te static te c'alal ihc'ub q'uinal, och bahel te wixil, la sjoquin ta wayel te state. Pero ma ba la sna' te stat bin ora tal ta joquinel ta wayel soc te bin ora hahch bahel.

³⁴Ta yan c'ahc'al, te wixil la yalbe te yihts'in: La joquin ta wayel ahc'abe te jtatique. Ha nix hich yo'tic ta ahc'abal ya ca'betic yuch' vino, ha'at me ya x'ochatix bahel, yac ajoquin ta wayel scuenta yu'un ay sts'umbal ya xc'oht a te jtatic, xchi.

³⁵Hich la ya'beyic yuch' vino te static ta ahc'abal, te ihts'inal baht sjoquin ta wayel. Pero te static ma ba la sna' bin ora tal ta joquinel ta wayel o bin ora hahch bahel.

³⁶Hich la sta yalic ta schebal yantsil-nich'nab Lot ta scuenta nix te statique.

³⁷Ayin yal te wixil, la ya'be sbihilin Moab.[24] Ha stat te moabetic te ayic ta q'uinal c'alal ora ini.

³⁸Ha nix hich ayin yal te ihts'inal, la ya'be sbihilin Ben-amí.[25] Ha stat te amonetic te ayic ta q'uinal c'alal ora ini.