Read Tzeltal Génesis 2 Bible Online

Génesis 2 - Tzeltal bible

Génesis 2

¹Hich hu' yu'un te ch'ulchan soc bahlumilal, soc spisil bintic nojel tey a.

²Ta shuquebal c'ahc'al hu' ta pasel spisil ya'tel te Diose; la scux yo'tan yu'un spisil te ya'tele.

³La ya'be bendición te shuquebal c'ahc'al soc la sch'ultes, yu'un tey la scux yo'tan yu'un spisil te ya'tele.

⁴Hich ay sc'oblal te shahchibal te ch'ulchan soc bahlumilal. Te c'alal pastaj yu'un Jehová Dios te bahlumilal soc te ch'ulchan,

⁵ma to ayuc te'etic ta lumq'uinal a soc ma to chicanuc ha'maletic a, como te Jehová Dios ma to ba la yac' tal ha'al ta bahlumilal soc ma to ayuc winic a te ya x'a'tej ta lumq'uinal;

⁶pero mo tal sahb ta lumq'uinal te la yahch'es spisil te lumq'uinale.

⁷Dios la spas te winic ta ts'ubil lum,[2] la shuhxibe sni' ta ic' yu'un cuxlejal, hich cuxaj.

⁸Te Jehová Dios la yac' ts'umbil q'uinal ta Edén te ay ta stojol banti ya xloc' tal c'ahc'al. Tey la yac' a te winic te la spase.

⁹Te Jehová Dios la yac' coluc ta lumq'uinal spisil ta chahp te'etic te t'ujbil ta ilel soc te lec ta lo'beyel sit. Soc ta yohlil te ts'umbil q'uinal ay te te' scuenta cuxlejal soc te te' scuenta sna'el te bintic lec soc te bintic ma lecuque.

¹⁰Ay muc'ul-ha' hahchem tey ta Edén te la ya'lelin te ts'umbil q'uinale; tey jetin a, chaneb c'oht.

¹¹Pisón sbihil te june, ha te ya sjoytay spisil te q'uinal yu'un Havila, ta banti ay oro;

¹²buen t'ujbil te oro, soc ay xuch'il te' te sumet yic', soc ay ónice.

¹³Gihón sbihil te schebale, ha te ya sjoytay spisil te q'uinal yu'un Cus.

¹⁴Hidekel[3] sbihil te yoxebale, ha te ya x'oquin c'axel ta stojol banti ya xloc' tal c'ahc'al yu'un te sq'uinal Asiria. Éufrates sbihil te schanebale.

¹⁵Te Jehová Dios la yac' te winic ta yohlil te ts'umbil q'uinal Edén scuenta yu'un ya schahpan te lumq'uinal soc ya scanantay.

¹⁶Te Jehová Dios hich la spas ta mandar te winique: Spisil te'etic ay ta ts'umbil q'uinal ya xhu' yac alo'be sit,

¹⁷yan te te' yu'un sna'el te bintic lec soc te bintic ma lecuc ma me xalo'be sit stuquel, como te bin ora yac alo'be te site, ya me xchamat yu'un, xchi.

¹⁸La yal te Jehová Dios: Ma lecuc te stuquel ay te winique, ya jpasbe snuhp' te ya scoltay sba soque, xchi.

¹⁹Spisil te chambahlametic ayic ta q'uinal soc spisil te mutetic ya xwihlic ta toyol pasticlambil ta lum yu'un te Jehová Dios. La yic'ticlambe tal ta stojol Adán scuenta yu'un ya yil bin sbihil ya yac'ticlambe stuquel. Te bin sbihil ac'ticlambot yu'un Adán te chambahlametic, hich nix sbihil c'oht a.

²⁰Hich te Adán la slehbe sbihil spisil ta chahp ha'mal chambahlametic, mutetic, soc alaq'uil chambahlametic ayic ta q'uinal; pero ma ba weht snuhp' te ya scoltay sba soque.

²¹Ha yu'un te Jehová Dios la yac' c'uhbuc swayel te Adán; c'alal wayalix a la sloq'uesbe jch'ix smochbaquel soc la smacbe te banti la sloq'ues.

²²Te Jehová Dios la spas ta ants te jch'ix smochbaquel, la yic' tal ta stojol te winique.

²³Hich la yal te Adán: ¡Ha'ix jbaquel te sbaquele, soc jbaq'uetal te sbaq'uetale! Ha ants[4] sbihil ya xc'oht, como loq'uem tal ta winic, xchi.

²⁴Ha scuentahil te winic ya yihquitay hilel te stat soc snan, ya yic' sba soc te yihnam, junax ya xc'oht schebalic.

²⁵Mayuc sc'u' spac' te Adán soc te yihnam, pero ma ba q'uexawic yu'un.