Read Tzeltal Génesis 20 Bible Online

Génesis 20 - Tzeltal bible

Génesis 20

¹Te Abraham loc' bahel tey a, baht ta sq'uinal Neguev; c'oht spas snahil-pac' ta Gerar te ay ta ohlil yu'un Cades soc Shur. Nahin ta Gerar hich te bin ut'il jyanlum.

²Te Abraham la yal tey a te ha yihts'in te Sara. Ha yu'un te Abimelec ajwalil yu'un Gerar la sticon ta iq'uel te Sara.

³Pero ta ahc'abal c'oponot yu'un Dios ta swayich te Abimelec, hich halbot: Ya me xlajat ta scaj te ants awic'oje, yu'un nuhpunem, ay smamalal, xchi sc'oblal.

⁴Pero te Abimelec ma to ba stahoj sba soc, ha yu'un la yal: Cajwal, ¿ya bal amil te mach'a mayuc smul?

⁵¿Ma bal lajuc yalbon te ha yihts'in te ants, soc te laj yalbon te ants te ha sbanquil? Ha yu'un jun co'tan soc mayuc mulil ta jc'ab a la jpas ini, xchi.

⁶Hich halbot ta swayich yu'un te Diose: Ya jna' te jun awo'tan la apas ini. Ha yu'un la jcomat ta slehel mulil ta jtojol, ha scuentahil te ma ba la jca'bat apic.

⁷Ha yu'un ticona bahel te ants ta stojol te smamalal, como ha jalwanej, ya xc'opoj awu'un ta jtojol scuenta yu'un cuxul ya xhilat. Yan teme ma ba yac aticon bahel, na'a me te ya xlajat soc spisil mach'atic ay awu'un, xchi.

⁸Ha yu'un sab hahch te Abimelec, la sticon ta iq'uel te a'batetic yu'un, la yalbe ya'iyic spisil te bin halbot. Te winiquetic bayel xiw yo'tanic yu'un.

⁹Patil te Abimelec la yic' tal te Abraham, hich la yalbe: ¿Bin la apasbotic? ¿Bin mulil jtahoj ta atojol yu'un te la awich' tal te muc'ul mulil ta jtojol soc ta stojol ban c'alal jcuentahinej? La apasbon te bin ma hichuc pasel ya sc'an, la yut.

¹⁰Te Abimelec la yalbe xan te Abraham: ¿Bin yacat ta snopel a te hich la apas? la yut.

¹¹La sjac' te Abraham: La jcal ta co'tan: Melel li' ta lugar ini mayuc ta xi'el te Diose, ya me smilonic ta scaj quihnam.

¹²Soc melel nix a te ha quihts'in, como ha yantsil-nich'an te jtat pero ma ha'uc yal te jnane; ha la jquic' quihnamin.

¹³Te c'alal Dios la yic'on loq'uel tal ta sna jtat, hich la jcalbe: Hich me xac'uxultayon: Bayuc ya xbohotic ya me awal te ho'on abanquilon, xchihon.

¹⁴Ha yu'un te Abimelec la yic' tal tuminchijetic, wacaxetic soc a'bat ants-winiquetic, la ya'be te Abraham, soc la suhtbe te Sara te yihname.

¹⁵Soc hich la yal te Abimelec: Ilawil, ay ta atojol spisil te jq'uinale, nahinan te banti yac amulan ya xnahinat, xchi.

¹⁶Soc la yalbe te Sara: La jca'beyix lajunwinic yoxbahc' (1,000) ta sehp plata te abanquile, ha smahquil aq'uexlal ya xc'oht awu'un ta sit spisil yantic mach'atic ajoquinej, hich lec ac'oblal ya xc'ohat, xchi.

¹⁷Ha yu'un te Abraham la sc'opombe Dios, hich lecubtesot yu'un Dios te Abimelec, te yihnam soc te scriadahetique; hich alajic,

¹⁸como te Jehová jc'axel la smacbe yalajib te antsetic ayic ta sna Abimelec ta scaj te Sara te yihnam Abraham.