Read Tzeltal Génesis 21 Bible Online

Génesis 21 - Tzeltal bible

Génesis 21

¹Te Jehová suht tal ta stojol Sara hich te bin ut'il yaloj, hich nix la spasbe te bin yalojix ta jamal.

²Hahch yal te Sara, hich ayin snich'an Abraham te c'alal mamalix a, ha nix ta yorahil te halbot yu'un Dios.

³Te Abraham la ya'be sbihilin Isaac te snich'an te ayin ta scuenta Sara.

⁴Ta swaxaquebal c'ahc'al yayinel a te Isaac la ya'be yich' circuncisión te Abraham, hich nix te bin ut'il pasot ta mandar yu'un Dios.

⁵Ay ho'winic (100) ya'bilal a te Abraham c'alal ayin te Isaac te snich'ane.

⁶Hich la yal ta yo'tan te Sara: Dios la yac'on ta tse'ej, soc mach'ayuc a te ya ya'iy, pajal ya xtse'ejinon soc, xchi.

⁷Soc la yal xan: ¿Mach'a lajuc yalbe te Abraham te ya me ya'be schu' alaletic te Sara? Pero la to calataybe snich'an te c'alal mamalix a, xchi ta yo'tan.

⁸Muc'ub te alal, hil schu'. Pasbot sq'uin yu'un te Abraham te bin ora hil schu' te Isaac.

⁹Te Sara la yil te yal Agar te egipcia-ants, ha te alaj yu'un te Abraham, te yac ta labanel te Isaac ha te yale.

¹⁰Ha yu'un la yalbe te Abraham: Tena loq'uel soc yal te criada ini, yu'un ma xhu' te pajal ya yich'bat hilel abiluc soc te cal Isaac, la yut.

¹¹Te Abraham bayel la smel yo'tan yu'un te snich'ane.

¹²Pero halbot yu'un Dios te Abraham: Ma xamel awo'tan yu'un te querem soc te criada awu'une. Ch'uhuna spisil te bin ya yalbat te Sara, como ta scuenta Isaac ya xchicnaj ats'umbal.

¹³Soc te yal te criada, muc'ul nación ya xc'oht cu'un, como ha'at nix ats'umbal, xchi.

¹⁴Hich buen sab hahch te Abraham, la yich' tal pan soc jun nuhcul yawil ha', la ya'be sq'uech bahel te Agar, soc la ya'be te yal, la sticon bahel soc. Hich loc' bahel, melmonel ta behel ta jochol taquin q'uinal Beerseba.

¹⁵C'alal laj ya'lel te nuhcul, la yihquitay hilel te querem ta ye'tal te',

¹⁶namal baht shuhcan sba, hich snahtil te bin ut'il ya xjahc stirohil t'ihmalte', yu'un hich la yal ta yo'tan: Ma jc'an ya quil ya xcham te quereme, xchi. Tey hucul a, hahch ta oq'uel te quereme.[26]

¹⁷Dios la ya'iybe yoq'uel te querem. Hich te ch'ul a'bat yu'un Dios la yawtay te Agar c'alal ta ch'ulchan: ¿Bin la apas, Agar? Ma xiwat, yu'un Dios a'iybotix te yoq'uel te querem te banti ay.

¹⁸Hahchan, nita hahchel te querem, tsaca ta ac'ab, yu'un muc'ul nación ya xc'oht cu'un, xchi.

¹⁹Hich Dios la sjambe sit te Agar, la yil sloq'uib-ha'; hich baht sbut'be ya'lel te nuhcul, la ya'be yuch' te quereme.

²⁰Te querem joquinot yu'un Dios; muc'ub, soc nahin ta jochol taquin q'uinal; la sna' yaq'uel t'ihmalte'.

²¹Nahin ta jochol taquin q'uinal Parán; lehbot yihnam yu'un snan ta Egipto.

²²Te Abraham ta hich ora tal ta c'oponel yu'un Abimelec soc Ficol, te jtsobaw yu'un soldadohetic yu'un, hich la yalbeyic: Dios sjoquinejat ta spisil te bintic yac apas.

²³Ha yu'un halbon ta jamal ta stojol Dios te mayuc bin ora yac acontrahinon soc jnich'nab soc te jts'umbal ta patil bahel. Hich te bin ut'il la jc'uxultayat te ha'ate, ha nix hich ya me ac'uxultayon soc te q'uinal te banti nahinemat ta ora ini, xchi.

²⁴La sjac' te Abraham: Ya cal ta jamal, xchi.

²⁵Te Abraham la yac' sparte ta stojol Abimelec yu'un te pozo te pojbot yu'un te a'batetic yu'une.

²⁶Pero la sjac' te Abimelec: Ma jna' mach'a hich la spas, ni ha'ucat la awa'bon jna', ha to nax yac ca'iybel ini, xchi.

²⁷Hich te Abraham la yic' tal tuminchijetic soc wacaxetic, la ya'be te Abimelec; la schap sc'opic ta schebalic.

²⁸Te Abraham parte la yac' huqueb yantsilel tuminchijetic.

²⁹Hich joc'obot yu'un te Abimelec: ¿Bin scuentahil te parte la awac' te huqueb yantsilel tuminchijetic ini? xchi.

³⁰La sjac' te Abraham: Ya ca'bat ta ac'ab te huqueb yantsilel tuminchijetic ini scuenta yu'un ha seña cu'un te ho'on la joc' te pozo ini, xchi.

³¹Ha yu'un Beerseba[27] sbihil c'oht te lugar, yu'un tey ay bin la yalbe sbahic ta jamal ta schebalic a.

³²Hich la schap sc'opic ta Beerseba. Patil te Abimelec soc Ficol, te jtsobaw yu'un soldadohetic yu'un, suhtic bahel ta sq'uinal filisteohetic.

³³Te Abraham la sts'un jtehc' tamarisco ta Beerseba, tey la sc'opon a te Jehová Dios te stalel cuxul sbahtel q'uinal.

³⁴Bayel c'ahc'al nahin ta sq'uinal filisteohetic te Abraham.