Read Tzeltal Génesis 22 Bible Online

Génesis 22 - Tzeltal bible

Génesis 22

¹Ta patil te Dios la stsaj te Abraham, hich la yalbe: Abraham, xchi. Li' ayoni, xchi te Abraham.

²Hich halbot yu'un: Ic'a bahel te Isaac te hip jtuhl anich'an te bayel c'ux ta awo'tan, bahan soc ta q'uinal Moriah, tey ta banti wits ya calbat, ya me xc'oht awac' ta scohtol chic'bil mahtanil, xchi.

³Hich te Abraham buen sab hahch, la schahpan sburro, soc la yic' bahel cheb ya'bat soc te Isaac te snich'ane. La sch'uybe si'il te scohtol milbil mahtanil, hahch ta behel, baht ta banti halbot yu'un te Diose.

⁴Yoxebal c'ahc'al a la shach sit te Abraham, la yil ta namal te lugar.

⁵Ha yu'un hich la yalbe te a'batetic yu'une: Mahliyawonic li' soc te burro, lum to ya xbohon soc te quereme, ya xbaht quich'cotic ta muc' te Diose, patil ya suhtotcotic talel, xchi.

⁶Te Abraham och ta sts'alel te si'il te milbil mahtanil, la ya'be scuch bahel te Isaac te snich'ane. Ha la stuch bahel xutunte' soc cuchillo, hich baht schebalic.

⁷Te Isaac la yalbe te Abraham te state: Jtat, xchi. ¿Bin a, jnich'an? xchi te Abraham. La yal te Isaac: Li' ay te c'ahc' soc te si', pero ¿banti ay te tuminchij te ya xtuhun yu'un te scohtol chic'bil mahtanil? xchi.

⁸La sjac' te Abraham: Dios nix ya slehbotic te tuminchij te ya xtuhun yu'un te scohtol chic'bil mahtanil, jnich'an, xchi. Hich pajal behenic bahel schebalic.

⁹C'alal c'ohtic ta lugar te banti halbot yu'un Dios, te Abraham la spasbe scajtajib ta chiq'uel mahtanil, la schahpambe te si'il, la sc'ol ta chuquel te Isaac, soc la sjawan ta ba si' ta scajtajib ta chiq'uel mahtanil.

¹⁰Te Abraham la stsac te cuchillo yu'un ya slow a te snich'ane.

¹¹Pero te ch'ul a'bat yu'un Jehová hich la yawtay c'alal ta ch'ulchan: Abraham, Abraham, xchi. Li' ayoni, xchi te Abraham.

¹²Hich halbot yu'un: Ma me xyahl ac'ab ta stojol te querem, ma me ayuc bin xapasbe, yu'un la jna'ix te axi'oj te Diose, yu'un ma ba la acom aba te yac awa'bon te hip jtuhl anich'an, xchi.

¹³Hich te Abraham la shach sit, la yil ta spat ay tat tuminchij ipajem xulub ta ch'ixiletic. Baht stsac talel te tat tuminchij, ha la smil scuenta scohtol chic'bil mahtanil te ha sjelol c'oht te snich'ane.

¹⁴Te Abraham la ya'be sbihil te lugar: Jehová ya ya'botic, xchi. Ha yu'un hich ay ta halel c'alal ora ini: Ta wits yu'un Jehová ya x'a'bot, xchi.

¹⁵Te ch'ul a'bat yu'un Jehová la scha'c'opon xan tal c'alal ta ch'ulchan te Abraham,

¹⁶hich la yal: Calojix ta jamal ta jtojol, xchi te Jehová, te bin ut'il hich la apas, te ma ba la acom aba te yac awa'bon te hip jtuhl anich'an,

¹⁷ya me ca'bat bendición soc ya cac' te ya xp'ohl ats'umbal hich yipal te bin ut'il eq'uetic te ay ta ch'ulchan soc te hi' te ay ta sti'il mar; soc te ats'umbal ya me stsal spisil scontratac.

¹⁸Ta scuenta ats'umbal ya x'a'bot bendición spisil nacionetic ta swohlol bahlumilal, yu'un te la ach'uhumbon te jc'ope, xchi.

¹⁹Te Abraham suht bahel ta stojol te a'batetic yu'un, hahchic ta behel, bahtic ta Beerseba; tey nahin a te Abraham.

²⁰Patil la yich' halbeyel te Abraham: Te Milca la yalataybe snich'nab te awihts'in Nacor:

²¹Uz sbihil te ba-al, Buz te yihts'ine, Kemuel te stat Aram,

²²Quesed, Hazo, Pildas, Jidlaf soc te Betuel.

²³Te Betuel ha stat te Rebeca. Ha'ic ini te waxactuhl snich'nab Nacor, te yihts'in Abraham, te alataybot yu'un Milca.

²⁴Soc ay yan ants yu'un te Nacor, Reúma sbihil, te la yalatay te Teba, Gaham, Tahas soc te Maaca.