Read Tzeltal Génesis 24 Bible Online

Génesis 24 - Tzeltal bible

Génesis 24

¹Mamalix te Abraham, ayix bayel ya'bilal a; a'botix bayel bendición yu'un Jehová ta stojol spisil.

²Te Abraham hich la yalbe te jtuhl ya'bat, te mach'a mamalix ta stojol spisil yantic ay ta sna, te scuentahinej spisil te biluquetic yu'un: Ac'a tal ac'ab ta ye'tal ca',

³ya jc'an te yac awal ta jamal ta stojol Jehová, te Dios yu'un te ch'ulchan soc te Dios yu'un te bahlumilal, te ma ba yac alehbon yihnam te jnich'an ta stojol te yantsil-nich'nabic te cananeohetic te ayon ta yohlilique.

⁴Ya me xbahat ta jlumal ta banti ay quermanotac, tey ya xc'oht alehbon yihnam a te jnich'an Isaac, xchi.

⁵Hich joc'obot yu'un te ya'bat: ¿Ha xan teme ma sc'an ya st'unon tal te ach'ix, ya bal quic' bahel te anich'an ta q'uinal banti loc'at tal? xchi.

⁶Hich halbot yu'un te Abraham: ¡Ma'uc, ma me xawic'bon bahel tey a te jnich'ane!

⁷Te Jehová, te Dios yu'un te ch'ulchan, te la yic'on loq'uel tal ta sna te jtat soc ta slumal te quermanotac, te la sc'oponon soc te hich la yalbon ta jamal: Ya ca'be ats'umbal te q'uinal ini, te xchihe, ya sticon te ch'ul a'bat yu'un te ya xnahilij bahel awu'un, yu'un tey ya xc'oht alehbe yihnam a te jnich'ane.

⁸Teme ma sc'an ya st'unat tal te ach'ixe, tey ya xlaj sc'oblal a te bin la awalbon ta jamal. Ha nax ma me xawic'bon bahel tey a te jnich'ane, xchi.

⁹Ha yu'un te a'bat la yac' tal sc'ab ta ye'tal ya' te yajwal, ha te Abraham, la yal ta jamal te hich ya spas.

¹⁰Te a'bat la yic' lajuncoht camello yu'un te yajwal, hich baht, soc yich'oj bahel bayel ta chahp tsahbil mahtaniletic yu'un te yajwale. C'oht ta pueblo yu'un Nacor ta Mesopotamia.

¹¹Ta sti'il te pueblo la ya'be spahcan sbahic te camellohetic ta jun pozo, tibilix a, ha yorahil a te ya xloq'uic tal ta yich'el ya'alic te ach'ixetique.

¹²Hich la yal: Jehová, Diosat yu'un te cajwal Abraham, ya calbat wocol te yacuc acoltayon yo'tic, soc yacuc ac'uxultaybon te cajwal Abraham.

¹³Ilawil, ayonix ta pozo, ya xloq'uic tal ta yich'el ya'alic te yantsil-nich'nabic te winiquetic yu'un te pueblo ini.

¹⁴Ac'a te mach'a ach'ixil te ya calbe: Awocoluc, cohtesa aq'uib yu'un ya cuch'bat awa'al, teme ya cute, teme ya sjac': Uch'an hiche, soc ya ca'be yuch' ha' te camellohetic awu'un, teme xchihe, ha'uc me te mach'a atsahojix yu'un te awa'bat Isaac. Hich ya jna' a te yac ac'uxultaybon te cajwal, xchi.

¹⁵Ma to xlaj yo'tan ta sc'oponel Dios a, yac ta loq'uel tal te Rebeca te yantsil-nich'an Betuel, ha te yal te Milca te yihnam Nacor, te yihts'in Abraham, sq'uechoj tal ta snehquel te sq'uibe.

¹⁶Buen t'ujbil ach'ix, ma to tabiluc ta winic. Co bahel ta sloq'uib ha', la snojes sq'uib, loc' talel.

¹⁷Te a'bat ahnimal baht sc'opon: Awocoluc, a'bon cuch' jtebuc awa'al te ay ta aq'uib, xchi.

¹⁸La sjac' te ach'ixe: Uch'an, tatic, xchi. Ora la scohtes te sq'uib, la ya'be yuch' te ha'e.

¹⁹C'alal laj yo'tan ta ya'beyel yuch' ha', la yalbe: Ya jloq'uesbe tal yuch' ha' te camellohetic awu'un, chican ban c'alal ya sc'an ya yuch'ic, xchi.

²⁰Ora la scohcombe ya'lel sq'uib ta canoa, ahnimal baht slic tal ha' yan buelta ta pozo; la sloq'uesbe ha' yu'un spisil te camellohetic yu'une.

²¹Te winic xcham yo'tan yu'un te ach'ixe, ma ba c'opoj, yu'un la sc'an ya yil teme Jehová yac'oj te ay scuentahil te namal behel yu'une.

²²C'alal laj yo'tan ta yuch'el ha' te camellohetic, te winic la ya'be jun ch'ocowil pasbil ta oro te j'ohlil siclo yalal,[28] soc cheb xan staq'uinal snuc' sc'ab pasbil ta oro te lajuneb siclo yalal.[29]

²³Hich la sjoc'obe: ¿Mach'a yantsil-nich'anat? Awocoluc, halbon ca'iy teme jochol sna te atat banti ya xhu' ya xwayotcotic, xchi.

²⁴La yal te ach'ix: Ho'on yantsil-nich'anon Betuel te yal Milca, te la yalataybe snich'an Nacor, xchi.

²⁵Soc la yal xan: Ay ac soc bayel ha'mal, soc ay lugar banti ya xwayat, xchi.

²⁶Te winic la squejan sba, la yalbe wocol te Jehová,

²⁷hich la yal: Bayel yutsil sc'oblal te Jehová te Dios yu'un te cajwal Abraham, te ma ba la yihquitay te sc'uxul yo'tan soc te smelelil sc'op ta stojol te cajwal, te la stojobteson tal ta sbehlal te sna yermanotac te cajwal, xchi.

²⁸Ahnimal baht te ach'ix, c'oht yalbe ya'iy spisil mach'atic ay ta sna te snane.

²⁹Ay jtuhl sbanquil te Rebeca, Labán sbihil, ahnimal loc' bahel ta banti ay te winic te ay ta sloq'uib ha'.

³⁰Te c'alal la yil te ch'ocowil soc te staq'uinal snuc' sc'ab te yihts'in, soc te la yal: Hich la yalbon te winic, te xchihe, baht te banti ay te winique, teq'uel c'oht sta ta banti ay te camellohetic ta sts'ehl te sloq'uib ha'.

³¹Hich c'oht yalbe: Conic, ha'at te awich'oj bendición yu'un te Jehová. ¿Bin yu'un te teq'uelat li'i? La jchahpanix te jna soc banti ya x'ayin te camellohetic awu'un, xchi.

³²Hich tal ta sna te winique, te Labán la scohtesbe yihcats te camellohetic, la yac'ticlambe ac soc ha'mal, soc la ya'be ha' yu'un ya spoc yoc a te winic soc te smohloltac te sjoquinejique.

³³La spahchambe tal swe'el, pero la yal te winique: Ma ba ya xwe'on ha to teme ya calbat awa'iy te c'op talemon yu'une, xchi. C'opojan hiche, xchi te Labán.

³⁴Hich la yal te winic: Ho'on ya'baton Abraham.

³⁵Bayel bendición a'bibil yu'un Jehová te cajwal, soc muc'ubtesbot sc'oblal yu'un; a'bot tuminchijetic, wacaxetic, plata soc oro, a'bat ants-winiquetic, camellohetic soc burrohetic.

³⁶Te Sara te yihnam te cajwal me'elix a te la ya'be squerem-nich'an te cajwal, te ha la ya'be hilel spisil te bin ay yu'une.

³⁷Soc te cajwal hich la yac'on ta yalel ta jamal: Ma me xalehbon yihnam te jnich'an ta stojol te yantsil-nich'nabic te cananeohetic, te ayon ta yohlilique.

³⁸Ya me xbahat ta sna te jtat soc te quermanotac, tey me xalehbon yihnam a te jnich'ane, xchi.

³⁹Pero la jcalbe: ¿Ha xan teme ma sc'an ya st'unon tal te ach'ix? xchihon.

⁴⁰La sjac': Te Jehová, te mach'a behenemon ta stojol, ya me yac' sjoquinat te ch'ul a'bat yu'un soc ya yac' te lec ya xc'oht te behel awu'une. Ya me alehbon yihnam te jnich'an ta banti ay quermanotac ta sna te jtate.

⁴¹Teme c'ohat tey a ta banti ay te quermanotac, teme ma sc'an ya ya'bat te ach'ixe, libre ya xcolat yu'un te bin la jcalbat te yac awal ta jamal, xchi.

⁴²Ha yu'un nax hulon ta pozo, hich la jcal: Jehová, Diosat yu'un te cajwal Abraham, teme yac awac' te lec ya xc'oht te behel cu'une,

⁴³li' ayonix ta pozo ini, teme ay ach'ix ya xtal ta yich'el ya'al, teme ya calbe: Awocoluc, a'bon cuch' jtebuc ya'lel aq'uib, teme ya cut,

⁴⁴soc teme hich ya yalbon: Uch'an, soc ya jloq'uesbe tal yuch'ic ha' te camellohetic, teme xchihe, ha'uc me te mach'a tsahbil yu'un Jehová yu'un te snich'an te cajwal, xchihon ta sc'oponel Dios.

⁴⁵Ma to xlaj jc'opombel Dios ta co'tan a, loc' tal te Rebeca, sq'uechoj tal sq'uib ta snehquel; co bahel ta pozo, la slic loq'uel tal ya'al. Hich la jcalbe: Awocoluc, a'bon cuch' a te awa'al, xchihon.

⁴⁶Ora la scohtes te sq'uib, hich la yalbon: Uch'an, soc ya jloq'uesbe yuch'ic ha' te camellohetic awu'un, xchi. Hich la jcuch' ha', soc la ya'be yuch' ha te camellohetic cu'une.

⁴⁷Ha yu'un la joc'obe: ¿Mach'a yantsil-nich'anat? xchihon. Ho'on yantsil-nich'anon Betuel te snich'an Nacor te alatayot yu'un te Milca, xchi. Ha yu'un la jca'be ch'ocowil ta sni' soc staq'uinal snuc' sc'ab.

⁴⁸Soc la jquejan jba ta yalbeyel wocol te Jehová; la jcalbe yutsilal sc'oblal te Jehová te Dios yu'un te cajwal Abraham te bin ut'il la stojobteson ta be ta sc'ambeyel te yantsil-nich'an snich'ajun te cajwal yu'un ya yihnamin te snich'ane.

⁴⁹Ha yu'un te ha'exe, teme yac ac'uxultayic te cajwal, halbonic ca'iy ta jamal, pero teme ma'uque, jamal xawalbonic ca'iy hiche, yu'un hich ya jnop bin ya sc'an ya jpas, xchi.

⁵⁰La sjaq'uic te Labán soc te Betuel: Yu'un Jehová ini; ma xhu' ya calbatcotic teme lec o ma lecuque.

⁵¹Li' ay te Rebeca, ic'a bahel hiche, ha'uc yihnam ya xc'oht te snich'an te awajwal, hich te bin ut'il yaloj te Jehová, xchihic.

⁵²C'alal la ya'iy te ya'bat Abraham te bin la yalic, la spahcan sba ta lum ta stojol Jehová.

⁵³Soc la sloq'ues mahtaniletic pasbilic ta oro soc ta plata, soc c'u'ul pac'aletic, la ya'be te Rebeca. Soc la ya'be t'ujbil mahtaniletic te sbanquil soc te snane.

⁵⁴Patil we' te winic soc te mach'atic sjoquinej tal, bahtic ta wayel. C'alal hahch ta sab hich la yal te winique: Ac'awonic suhtel ta stojol te cajwal, xchi.

⁵⁵La sjac' te sbanquil soc te snan: Ac'a sjoquinotcotic lajunebuc xan c'ahc'al te ach'ixe, patil ya xhu' ya xbaht, xchihic.

⁵⁶Pero la yal te winique: Ma xahalajteson, yu'un te Jehová la yac' te lec c'oht te behel cu'une. Ac'awonic suhtel ta banti ay te cajwal, xchi.

⁵⁷Hich la sjaq'uic: Ya quic'cotic tal te ach'ix, ya joc'obecotic, xchihic.

⁵⁸Hich la yiq'uic tal te Rebeca, la sjoc'obeyic: ¿Ya bal ajoquin bahel te winic ini? xchihic. Yacuc, ya xbohon, xchi.

⁵⁹Hich la yaq'uic bahel te Rebeca te yihts'in soc te ants te coltesot ta yalalil to, te ya'bat Abraham soc te smohloltac.

⁶⁰La ya'beyic bendición te Rebeca, hich la yalic: Ha'at quihts'inatcotic, ha'uc me nanil ya xc'ohat yu'un tsobol ta mil, soc te ats'umbal ya yu'untaybeyic spuertahul te scontratac, xchihic.

⁶¹Hich hahch bahel te Rebeca soc te ach'ixetic yu'un, mohic ta camellohetic, la st'unic bahel te winique. Hich te a'bat la yic' bahel te Rebeca.

⁶²Te Isaac loq'uemix talel ta pozo ‘Te mach'a cuxul te ya yilon’, te xchi sbihile, como nahinem ta Neguev.

⁶³Ta jun stibiltayel q'uinal baht ta aquiltic ta snopilanel ta yo'tan. La shach sit, la yil yac ta talel te camellohetique.

⁶⁴Ha nix hich te Rebeca la shach sit, c'alal la yil te Isaac, co ta scamello,

⁶⁵la sjoc'obe te a'bat: ¿Mach'a a te winic yac ta talel ta aquiltic ta jtojoltic? xchi. Ha te cajwal, xchi te a'bat. Hich te Rebeca la smuc sit ta rebozo.

⁶⁶Te a'bat la yalbe ya'iy te Isaac spisil bin c'ohem ta pasel.

⁶⁷Te Isaac la yic' ochel te Rebeca ta snahilpac' te snan, ha te Sara, hich la yic' yihnamin, c'ux la ya'iy ta yo'tan. Hich muc'ub q'uinal la ya'iy te Isaac te bin ut'il chamen te snane.