Read Tzeltal Génesis 29 Bible Online

Génesis 29 - Tzeltal bible

Génesis 29

¹Behen xan bahel te Jacob, c'oht ta slumal te mach'atic ayic ta stojol banti ya xloc' tal c'ahc'al.

²La yil te ay pozo ta aquiltic soc ay oxchahp tuminchijetic tey pacajtic a, yu'un tey ya yuch'ic ha' a. Macal ta muc'ul ton te sti'ile.

³C'alal ya stsob sbahic tey a te jujuchahp tuminchijetic, te jcanan-tuminchijetic ya sloq'uesic te ton macal a, ya ya'beyic yuch' ha' te tuminchijetic, patil ya smaquic xan hilel.

⁴Te Jacob la sjoc'oy: Quermanotac, ¿ban talemex? xchi. Talemotcotic ta Harán, xchihic.

⁵La sjoc'obe xan: ¿Ya bal ana'beyic sba te Labán te snich'an Nacor? xchi. Yac, ya jna'becotic sba, xchihic.

⁶¿Lec bal ay? xchi. Lec ay. Ilawil, yac ta talel Raquel te yantsil-nich'an soc te stuminchij, xchi.

⁷La yal te Jacob: J'ohlil to nax c'ahc'al, ma to yorahiluc a te ya yich' tsobel te tuminchijetique; a'beyahic yuch'ic ha' te tuminchijetic, ic'ahic bahel ta we'el ta aquiltic, xchi.

⁸Pero la yalic: Ma xhu', ha to teme ya stsob sbahic spisil te jchahp tuminchijetic soc teme ya yich' loq'uesel te ton ay ta sti'il te pozo, ha to ya ca'becotic yuch' ha' a te tuminchijetic abi, xchihic.

⁹Yac to ta c'op soc a, c'oht te Raquel soc te tuminchijetic yu'un te stat, yu'un ha jcanan-tuminchij.

¹⁰Te Jacob c'alal la yil te Raquel yantsil-nich'an Labán, te sbanquil snan, soc te tuminchijetic yu'un te Labán, nohpoj tal te Jacob, la sloq'ues te ton te macbil sti'il a te pozo, la ya'be yuch' ha' te tuminchijetic yu'un Labán.

¹¹Te Jacob la yuhts'uy te Raquel, tulan hahch ta oq'uel.

¹²La yalbe te Raquel te ha yichan te stat soc te ha yal te Rebeca. Ha yu'un te Raquel ahnimal baht yalbe ya'iy te state.

¹³Te Labán c'alal la ya'iybe sc'oblal Jacob te yal te yihts'ine, ahnimal baht sta tal, la smech', la yuhts'uy, soc la yic' bahel ta sna. Hich te Jacob la yalbe ya'iy spisil.

¹⁴La yal te Labán: Melel nix a, jbaquelat soc jbaq'uetalat, xchi. Te Jacob halaj jun u tey a.

¹⁵Te Labán la yalbe te Jacob: Te bin ut'il quichanat ¿hich nax bal ya ca'batinat? Halbon ca'iy bin ya jtojat, xchi.

¹⁶Te Labán ay cheb yantsil-nich'nab: Lea sbihil te wixil, Raquel sbihil te ihts'inale.

¹⁷Te Lea mayuc lec yip te site, yan te Raquel mero t'ujbil ta ilel stuquel.

¹⁸Te Jacob la smulan te Raquel, hich la yal: Ya cac' jba ta a'batinel awu'un huqueb ha'bil ta scuenta Raquel te ihts'inal, xchi.

¹⁹Hich la sjac' te Labán: Ha lec te ha'at ya ca'bat awic', te ma ha'uc ya ca'be yan winic. Ya me ajoquinon hilel li'i, xchi.

²⁰Ha yu'un te Jacob huqueb ha'bil la yac' sba ta a'batinel ta scuenta Raquel. Cheb oxeb nax c'ahc'al c'oht la ya'iy ta scaj te c'ux ta yo'tan.

²¹Ay jun c'ahc'al te Jacob hich la yalbe te Labán: A'bonix te quihname, como ts'acayix yorahil te ya quic', xchi.

²²Hich te Labán la yic' tal spisil te winiquetic tey ayic a, la spas q'uin.

²³C'alal ihc'ub q'uinal, la yic' tal te Lea te yantsil-nich'an, la ya'be te Jacob, hich way soc.

²⁴Te Labán la ya'be jtuhl scriada te Lea, Zilpa sbihil.

²⁵Sacub q'uinal, te Jacob la yil te ha Lea, hich la yalbe te Labán: ¿Bin a te la apasbon? ¿Ma bal ha'uc la jcac' jba ta a'batinel awu'un ta scuenta Raquel? ¿Bin yu'un la alo'loyon? xchi.

²⁶La yal te Labán: Ma hichuc ta pasel li'i te ha nahil ya xnuhpun te ihts'inal yu'un te wixile.

²⁷Ts'acaytesa ha semana ini, hich ya ca'bat te yane, teme yac awac' aba ta a'batinel cu'un huqueb xan ha'bil yu'un, xchi.

²⁸Hich la spas te Jacob, la sts'acaytes te semana yu'un te Lea; hich te Labán la ya'be yic' yihnamin Raquel te yantsil-nich'an.

²⁹Te Labán la ya'be jtuhl scriada te Raquel, Bilha sbihil.

³⁰Ha nix hich way soc te Raquel; c'ax hich c'ux ta yo'tan a te bin ut'il te Lea. La yac' sba ta a'batinel huqueb xan ha'bil yu'un te Labán.

³¹Te Jehová la yil te mayuc stuc ta o'tanil te Lea, hich la yac' alajuc; yan te Raquel ma x'alaj stuquel.

³²Hahch yal te Lea, ayin squerem-al, Rubén[41] sbihil, yu'un la yal: Te Jehová la yil te jwocole. Yo'tic, c'ux ya me ya'iyon ta yo'tan te jmamalal, xchi.

³³Cha'hahch xan yal, ayin squerem-al, hich la yal: Te bin ut'il Jehová la ya'iy te mayuc jtuc ta o'tanil, la ya'bon xan cal, xchi. La ya'be sbihilin Simeón.[42]

³⁴Hahch yan yal, ayin squerem-al, hich la yal: Tey jun ya xc'ohon soc a te jmamalal, como la jcalataybeyix oxeb snich'nab, xchi. Ha yu'un la ya'be sbihilin Leví.[43]

³⁵Hahch yan yal, ayin squerem-al, hich la yal: Ta ora ini ya calbe yutsilal te Jehová, xchi. Ha yu'un la ya'be sbihilin Judá.[44] Quehchaj ta al.