Read Tzeltal Génesis 30 Bible Online

Génesis 30 - Tzeltal bible

Génesis 30

¹C'alal la yil te Raquel te ma ba ya yayintesbe snich'an te Jacob, hahch sti'ti'o'tantay te swix, hich la yalbe te Jacob: A'bon calatac, teme ma'uque, ya xchamon, la yut.

²Te Jacob ilin ta stojol Raquel, hich la yalbe: ¿Ho'on bal Dioson te ma xcac' x'alajat? la yut.

³La yal te Raquel: Li' ay te jcriada Bilha; wayan soc, ac'a ayinuc yal ta sjol cacan, hich ay calatac ya xc'oht ta scuenta a, xchi.

⁴La ya'be yic' te scriada; hich te Jacob way soc.

⁵Hahch yal te Bilha, hich la yayintesbe snich'an te Jacob.

⁶Ha yu'un la yal te Raquel: Dios la schahpanon, la ya'iybon jc'op, la ya'bonix jquerem-al, xchi. Ha yu'un la ya'be sbihilin Dan.[45]

⁷Cha'alaj xan te Bilha te scriada Raquel, schebalix yal yu'un a te Jacob.

⁸La yal te Raquel: Ta scuenta tulan tsaltamba la jtsal jba soc te jwix, hu'ix cu'un, xchi. La ya'be sbihilin Neftalí.[46]

⁹C'alal la yil te Lea te quechajemix ta al, la yic' tal te scriada, ha te Zilpa, la ya'be yic' te Jacob.

¹⁰Te Zilpa, te scriada Lea, la yayintesbe snich'an te Jacob.

¹¹La yal te Lea: Mero lec bin c'oht ta jcuenta, xchi. Ha yu'un la ya'be sbihilin Gad.[47]

¹²Patil te Zilpa, te scriada Lea, la yayintesbe yan snich'an te Jacob.

¹³La yal te Lea: C'ax bayel yutsil q'uinal ya ca'iy; como te antsetic ya me yalic te bayel cutsilal, xchi. Ha yu'un la ya'be sbihilin Aser.[48]

¹⁴Ta yorahil te ya yich' tsobel trigo, te Rubén la sta mandrágoras[49] ta aquiltic, la yich'be tal te Lea te snane. Te Raquel la yalbe te Lea: Awocoluc, a'bon te mandrágoras te la sta te awale, xchi.

¹⁵Pero la sjac' te Lea: ¿Yu'un bal jteb nax sc'oblal yac awa'iy te apojbeyejon te jmamalal, ya bal ac'an yac apojbe ehuc te mandrágoras yu'un te cale? xchi. Hich la yal te Raquel: Teme yac awa'bon te mandrágoras yu'un te awale ya xhu' ya sjoquinat ta wayel yo'tic ta ahc'abal te Jacob, xchi.

¹⁶C'alal suht tal ta a'tel ta tibiltic te Jacob, te Lea baht sta tal, hich la yalbe: Ya me ajoquinon ta wayel yo'tic, yu'un jelbilatix cu'un ta mandrágoras yu'un te cale, xchi. Hich te Jacob la sjoquin ta wayel.

¹⁷Dios la stsacbe sc'op te Lea, cha'hahch xan yal, la yayintesbe yo'ebal snich'an te Jacob.

¹⁸La yal te Lea: Dios la ya'bonix jmahtan yu'un te la jcac' wayuc soc jcriada te jmamalal, xchi. Ha yu'un Isacar[50] c'oht sbihil yu'un.

¹⁹Patil cha'hahch xan yal te Lea, swaquebalix squerem-al yu'un a te Jacob.

²⁰La yal te Lea: C'ax bayel yutsil te jmahtan la ya'bon te Diose. Yo'tic ya xtal sjoquinonix ta nahinel te jmamalal, yu'un la jcayintesbeyix waqueb snich'nab, xchi. Ha yu'un la ya'be sbihilin Zabulón.[51]

²¹Patil ayin yantsil-al te Lea, la ya'be sbihilin Dina.

²²Te Dios la sna' te Raquel, la ya'iybe sc'op, la yac' te ya x'alaj.

²³Hahch yal, ayin squerem-al, ha yu'un hich la yal: Dios la sloq'uesbon jq'uexlal, xchi.

²⁴La ya'be sbihilin José,[52] yu'un la yal: Ac'a ya'bon yan jquerem-al te Jehová, xchi.

²⁵C'alal ayinemix yal a te Raquel, ha te José, te Jacob la yalbe te Labán: Ticonawon bahel ta jlumal, ta jq'uinal.

²⁶A'bon bahel te antsetic cu'un te la jcac' jba ta a'batinel awu'un ta scuentahic, soc te jnich'nab, ac'awon bahel. Como yac ana' te jayeb bintic la jpas ta atojol, xchi.

²⁷La sjac' te Labán: Teme ay yutsil awo'tan cu'un, joquinawon xan; yu'un la jquilix te ha'at ta acuenta te ya'beyejon bendición te Jehová, xchi.

²⁸Soc la yal xan: Halbon ca'iy te jayeb atojol yac ac'ambon, ya ca'bat, xchi.

²⁹Hich la sjac' te Jacob: Ha'at ana'oj bin ut'il cac'oj jba ta a'batinel awu'un soc bin ut'il c'oht cu'un te chambahlametic awu'une.

³⁰Mayuc tsobol awu'un a te c'alal hulon talel, pero bayel p'ohlemiquix; te Jehová la ya'batix bendición ta jcuenta. Ta ora ini ¿bin ora ya x'a'tejon ta scuenta te mach'atic ay cu'un ta jna? xchi.

³¹¿Bin yac ac'an ya ca'bat? xchi te Labán. La sjac' te Jacob: Mayuc bin yac awa'bon. Teme yac apasbon te bin ya cal, ya jcanantaybat xan te tuminchijetic awu'une.

³²Ya xc'axon yo'tic ta yohlil spisil te chambahlametic awu'un, parte ya jloq'ues spisil te p'uhlomtic, ts'ihtiltic soc spisil te ihc'al alal tuminchijetic, soc te p'uhlomtic soc ts'ihtiltic tentsunetic; ha jtojol ya xc'oht.

³³Hich ya xchicnaj ta patil bahel te toj te co'tane. Te c'alal ya xtal awil te jtojol, yac ana' teme yacon ta elec' teme ay tentsun te mayuc spintohil soc mayuc sp'uhlomil, soc teme ay tuminchij te ma ba ihc', xchi.

³⁴Ha yu'un la yal te Labán: Lec ay, hich ac'a c'ohtuc te bin yac awale, xchi.

³⁵Pero te Labán ta yorahil nix a la sloq'ues te p'uhlomtic soc jisaltic yihc'al tat tentsunetic, spisil te p'uhlomtic soc ts'ihtiltic me' tentsunetic, spisil te jteb nax sacal soc spisil te jteb nax yihc'al te tuminchijetic, la ya'be scanantay te snich'nabe.

³⁶La yac' te oxeb c'ahc'al sbehlal yiloj sbahic soc te Jacob. Te Jacob la scanantaybe hilel te jayeb xan tuminchijetic yu'un te Labán.

³⁷Pero te Jacob baht sle tal yaxal c'ab-te' álamo, almendro soc castaño-te', pohch'olpohch' la scho'be spat, scuenta yu'un jisaltic sacal ta ilel c'oht.

³⁸La yac' te cho'bil sc'ab te' ta stojol te chambahlametic ta bateahetic te banti ya xtal yuch'ic ha', yu'un tey ya scuch sbahic a te c'alal ya xtal yuch'ic te ha'e.

³⁹Hich ya xhahch yal te tuminchijetic ta stojol te cho'bil sc'ab te'etique. Hich tohc yalic te jisaltic yihc'al, pintohetic, soc ts'ihtiltic sch'ahlel.

⁴⁰Te Jacob parte la yac' te alal tuminchijetic, te yantique la ya'be sjoquin te jisaltic yihc'al soc te ihc'al tuminchijetic yu'un Labán. Parte la yac' te tuminchijetic yu'un, ma ba la ya'be scap sba soc te tuminchijetic yu'un Labán.

⁴¹Soc te jayeb buelta ya sc'an ya scuch sbahic te tuminchijetic te ay yipic, te Jacob la yac' te sc'ab te'etic ta bateahetic ta stojol te tuminchijetic scuenta yu'un tey ya scuch sbahic a ta stojol te sc'ab te'etique.

⁴²Yan teme ha tal te tuminchijetic te mayuc yipic, ma ba la yac' ta stojolic te sc'ab te'etic. Ha yu'un Labán c'oht te banti mayuc yipic, yu'un Jacob c'oht te banti ay yipique.

⁴³Hich bayel p'ohl sc'ulejal te Jacob, ay tsobol tuminchijetic, criadahetic soc a'batetic, camellohetic soc burrohetic yu'un.