Read Tzeltal Génesis 31 Bible Online

Génesis 31 - Tzeltal bible

Génesis 31

¹La ya'iy te Jacob bin yac yalbelic te snich'nab Labán, te hich yacalic ta yalel: Te Jacob la spojbe spisil bin ay yu'un te jtatic, la sta spisil sc'ulejal ta scuenta te bin ay yu'un te jtatique, te xchihique.

²Soc la yil te Jacob te yanijemix sit yelaw te Labán, te ma hichuquix yo'tan ta stojol te bin ut'il ay ta nahil to.

³Ha yu'un hich halbot yu'un Jehová te Jacob: Suhtan bahel ta slumal atat soc ta banti ay te awermanotac; ya joquinat bahel, xchi.

⁴Ha yu'un te Jacob la sticon ta iq'uel tal te Raquel soc te Lea ta aquiltic ta banti ay te tuminchijetic yu'une.

⁵Hich la yalbe: Ya quil te ma hichuquix yo'tan cu'un te atatic te bin ut'il ta nahil to; pero sjoquinejon te Dios yu'un te jtate.

⁶Ana'ojic te ta spisil quip cac'oj jba ta a'batinel yu'un te atatique,

⁷pero la slo'loyon, lajuneb buelta la syanijtesbon te jtojole. Pero Dios ma ba la yac' te ya yuts'inon.

⁸Teme hich la yalbon: Ha atojol ya xc'oht te pintohetic, teme xchihe, puro pinto ya xtohc; yan teme la yalbon: Ha atojol ya xc'oht te jisaltic yihc'al, teme xchihe, puro jisaltic yihc'al ya xtohc.

⁹Hich pojbot yu'un Dios te chambahlametic yu'un atatic, la ya'bon te ho'one.

¹⁰Ta yorahil a te yac st'umbel sbahic te tuminchijetic, la jtoy jsit soc ta jwayich la jquil te puro jisaltic yihc'al, pintohetic soc yantic yilel sch'ahlel tat tuminchijetic yac scuchbel te yantsilelique.

¹¹Ta jwayich la sc'oponon te ch'ul a'bat yu'un Dios: Jacob, xchi. Hich la jac'be sc'op: Li' ayoni, xchihon.

¹²La yalbon: Toya asit, ya me awil te puro jisaltic yihc'al, pintohetic soc yantic yilel sch'ahlel te tat chambahlametic te yac scuchbel te yantsilelic, yu'un quilojix spisil te bin la spasbat te Labán.

¹³Ho'on Dioson yu'un Bet-el, te banti la amal aceite ta ton soc te ay bin la awalbon ta jamal. Hahchan ta ora, loc'an bahel li' ta q'uinal ini, suhtan bahel ta alumal, la yuton, xchi te Jacob.

¹⁴Hich la sjaq'uic te Raquel soc te Lea: ¿Yu'un bal ay to bin ay cu'uncotic o te ay bin ya ya'botcotic quich'cotic te jtatcotique?

¹⁵¿Ma bal hichuc c'ohemotcotic yu'un te bin ut'il jyanlumetic, la schonotcotic soc la slajinix jayeb te jtojolcotique?

¹⁶Spisil te c'ulejalil Dios la spojbe te jtatcotic, ha cu'uncotic soc yu'un te cal-jnich'antic. Ha yu'un pasa spisil te bin la yalbat te Diose, xchihic.

¹⁷Hich hahch te Jacob, la yac'ticlan mohel ta camello te snich'nab soc te antsetic yu'un,

¹⁸soc la smac bahel spisil schansbahlam soc spisil sbiluc te stahoj, (ha te chambahlametic te la spas ta ganar ta Padan-aram), yu'un ya suhtix bahel ta banti ay te Isaac te stat te ay ta sq'uinal Canaán.

¹⁹Te Labán bahem ta sloq'uesbeyel stsotsel stuminchij a, ha yu'un te Raquel la yelc'ambe yahcanan te state.

²⁰Te Jacob la slo'loy te Labán te arameo-winic, te bin ut'il ma ba la ya'be sna' te ya xbahte.

²¹Ahn bahel soc spisil bintic ay yu'un, c'ax bahel ta muc'ul-ha' Éufrates, la stojlin bahel te witsiltic ta Galaad.

²²Ta yoxebal c'ahc'al a halbot ya'iy te Labán te loq'uix ta ahnel te Jacob.

²³Ha yu'un te Labán la yic' bahel sjoquin te yermanotac, la snuts bahel te Jacob. Huqueb c'ahc'al ta patil c'oht sta ta witsiltic ta Galaad.

²⁴Ta ahc'abal c'oponot yu'un Dios ta swayich te Labán te arameo-winic, hich halbot yu'un: Tsahtaya me aba, ma me ayuc bin chopol yac awalbe te Jacob, xchi sc'oblal.

²⁵Te Labán c'oht sta te Jacob te stehc'anejix snahilpac' ta wits. Ha nix hich te Labán soc te yermanotac la stehc'anic snahilpac' ta wits Galaad.

²⁶Te Labán la yalbe te Jacob: ¿Bin a te la apas? ¿Bin yu'un la alo'loyon soc te muquen la awic'bon tal te cantsil-nich'nab hich te bin ut'il mach'atic chucbil loq'uel ta querra?

²⁷¿Bin yu'un muquen loc'at bahel ta ahnel, te la alo'loyon soc ma ba la awa'bon jna' scuenta yu'un ya jticonat bahel soc utsil-o'tanil, c'ayoj, tamborín, soc arpa?

²⁸Soc ma ba la awa'bon cuhts'uy bahel te jmamatac soc te cantsil-nich'nab. Mero ma xana' te bin la apase.

²⁹Ay quip yu'un ya ca'bat awocol; pero te Dios yu'un te atat la sc'oponon ahc'abe, hich la yalbon: Tsahtaya me aba, ma me ayuc bin chopol yac awalbe te Jacob, xchi.

³⁰Ya suhtatix bahel yu'un awo'tanuc te ayatix ta sna te atate, pero ¿bin yu'un la awelc'ambon talel te diosetic cu'un? xchi.

³¹Te Jacob hich la yalbe te Labán: Yu'un tal xiwel ta co'tan, yu'un la jcal teme ta scuenta awip yac apojbon hilel te awantsil-nich'nab.

³²Te mach'a yich'beyejat yac ata te diosetic awu'un, ¡ac'a lajuc! Ac'a ta ilel ta stojol te quermanotactic teme ay bin quich'ojbat tal, teme aye ich'a suhtel, xchi. Yu'un ma ba sna'oj te Jacob te ha yelc'anej tal te Raquel.

³³Hich te Labán och bahel ta snahilpac' Jacob, ta snahilpac' Lea, soc ta snahilpac' te cheb criadahetic, pero mayuc bin la sta. C'alal loc' ta snahilpac' te Lea, och bahel ta snahilpac' te Raquel.

³⁴Te Raquel snac'ojbe te yahcanan te stat ta ye'tal montura yu'un camello, tey la shuhcan sba a. Te Labán och slehbe ta spisil sbiluc ta snahilpac', mayuc bin la sta.

³⁵Te Raquel la yalbe te stat: Jtat, ma x'ilinat yu'un te ma xhu' ya xhahchon, como hich ayon te bin ut'il stalel antsetic te ya yil schamel ta jujun u, xchi. Hich te Labán la sle xan te yahcanan pero ma ba la sta.

³⁶Ilin yu'un te Jacob, la yut sba soc te Labán, hich la yalbe: ¿Bin a te jc'axuntayej? ¿Bin jmulinej awu'un te c'ax ilinemat te yac anutsbelon tal?

³⁷La ajohts'ibonix spisil jbiluc, ¿bin la ata te ha yu'un te anahe? Ich'a tal, ac'a ta ilel ta stojol te quermanotac soc ta stojol mach'atic ay awu'un scuenta yu'un ha ya schahpanotic.

³⁸Ayix ta jtahb (20) ha'bil te joquinejat. Te tuminchijetic soc te tentsunetic awu'un, mayuc bin ora c'ax te yalic, soc mayuc la jti'bat jcohtuc tat tuminchij awu'un.

³⁹Mayuc bin ora la jquic'bat tal te lajem ta ti'el ta ha'mal chambahlam, ho'on la jtoj te lajeme. Soc la awa'bon jtoj te baht ta elc'anel ta c'ahc'alel o ta ahc'abal.

⁴⁰Ta c'ahc'alel ay jwocol yu'un sc'uxul c'ahc'al, ta ahc'abal ay jwocol yu'un sic, ay ma ba tal jwayel ta ahc'abal.

⁴¹Hich ayinon te jtahb (20) ha'bil joquinejat ta ana. Chanlajuneb (14) ha'bil la jcac' jba ta a'batinel awu'un ta scuenta te cheb awantsil-nich'nab, soc waqueb ha'bil ta scuenta te chambahlametic awu'un; soc lajuneb buelta la ajelbon te jtojole.

⁴²Te manchuc sjoquinejon te Dios yu'un te jtat, te Dios yu'un Abraham soc te yich'oj ta muc' te Isaac, jochol jc'ab a la aticonon suhtel te hichuque. Pero Dios la yilbon te jwocol soc te ya'tel jc'ab, ha yu'un te la yutat ahc'abe, la yut.

⁴³Te Labán hich la yalbe te Jacob: Te ach'ixetic, ho'on cantsil-nich'nab, soc te queremetic, ho'on jquerem-nich'nab, soc te tuminchijetic, ho'on jtuminchij, soc spisil te bintic chican yac awile, ho'on cu'un. Pero ¿bin ya cut te cantsil-nich'nab soc te yalatac ayinemiquix yu'une?

⁴⁴La', ya jchap jc'optic ta jchebaltic te ya xtuhun scuenta seña cu'untic, xchi.

⁴⁵Ha yu'un te Jacob la sq'uech tal ton, la stehc'an scuenta seña.

⁴⁶Hich la yalbe te yermanotac: Tsobahic tal tonetic, xchi. Hich la stsobic tal tonetic, la sbusanic. Tey ochic ta we'el ta sba te busul tonetic.

⁴⁷Te Labán la ya'be sbihilin Jegar Sahaduta; te Jacob la ya'be sbihilin Galaad.[53]

⁴⁸Hich la yal te Labán: Te ton busul li'e ha testigo ta jchebaltic, xchi. Ha scuentahil Galaad sbihil c'oht,

⁴⁹soc Mizpa[54] te yan sbihile, yu'un la yal: Jehová ac'a yilotic te bin ut'il ya quihquitay jbahtic.

⁵⁰Teme ya xhahch awuts'imbon te cantsil-nich'nab, o teme yac ale xan yan antsetic, aunque mayuc mach'a sjoquinejotic, na'a me te ha testigo cu'untic ta jchebaltic te Diose, xchi.

⁵¹Soc la yal xan ta stojol Jacob te Labán: Ilawil te tonetic busul soc te seña te la jtehc'an ta cohliltic.

⁵²Ha testigo ya xc'oht te busul tonetic ini, soc ha testigo ya xc'oht te seña ini te ma ba ya xc'axon bahel ta busul tonetic yu'un ya jcontrahinat, soc ma ba ya xc'axat talel ta busul tonetic li'i soc ta seña ini yu'un yac acontrahinon.

⁵³Te Dios yu'un Abraham, te Dios yu'un Nacor, te Dios yu'un te static, ac'a schahpanotic ta jchebaltic, xchi. Te Jacob la yal ta jamal ta scuenta te Mach'a yich'oj ta muc' te Isaac te state.

⁵⁴La yac' milbil mahtanil tey ta wits, soc la yic' tal ta we'el te yermanotac. Tey we'ic a soc tey wayic a.

⁵⁵Ta sacubel q'uinal, hahch te Labán, la yuhts'uy hilel te smamatac soc te yantsil-nich'nab, la yac'ticlambe bendición, hich suht bahel ta slumal.