Read Tzeltal Génesis 32 Bible Online

Génesis 32 - Tzeltal bible

Génesis 32

¹Te Jacob hahch xan ta behel, tal ta tahel bahel yu'un ch'ul a'batetic yu'un Dios.

²Hich la yal te Jacob c'alal la yil: Ha campamento yu'un Dios ini, xchi yu'un, la ya'be sbihilin Mahanaim[55] te lugar.

³Te Jacob nahil la sticon bahel jal c'opetic ta stojol te sbanquil Esaú ta sq'uinal te Seir, ta sq'uinal Edom.

⁴Hich la yalbe bahel: Hich xawalbe te cajwal Esaú: Hich ya yal te awa'bat Jacob: La joquin ta nahinel te Labán, tey halajon a ha to suhton tal ta ora ini.

⁵Ayix wacaxetic, burrohetic, tuminchijetic soc a'bat ants-winiquetic cu'un. La jticon tal te c'op ini ta stojol te cajwal scuenta yu'un ayuc yutsil awo'tan ta jtojol, xchihex me.

⁶Te jal c'opetic suhtic tal ta stojol Jacob, hich hul yalbeyic: Suhtotcotiquix tal ta stojol te abanquil Esaú, ha nix ya xtal stahat ta be, soc joquimbil yu'un jbahc' (400) ta tuhl winiquetic, xchihic hulel.

⁷Bayel hahch ta xiwel te Jacob soc bayel la smel yo'tan yu'un. Hich la yac' ta cha'tsohb te mach'atic sjoquinej, soc te tuminchijetic, wacaxetic soc te camellohetic,

⁸como hich la yal: Te Esaú teme ya xtal scontrahin te jtsohb, ya xcol te jtsohb xane.

⁹Patil hich la yal te Jacob: Diosat yu'un te jtat Abraham, soc Diosat yu'un te jtat Isaac, Jehová, ha'at te la awalbon: Suhtan bahel ta alumal soc ta stojol awermanotac, lec ya xc'ohat cu'un, te xchihate,

¹⁰¡peq'uel ayon ya ca'iy yu'un spisil te c'uxultayel awu'un soc te stalel jun awo'tan ta stojol te a'bat awu'une! Ha nax quich'oj jnahbate' te c'alal c'axon bahel ta muc'ul-ha' Jordán, yo'tic cha'tsohb loq'uemonix a.

¹¹Coltayawon loq'uel ta sc'ab te jbanquil Esaú, yu'un ya jxi' te ya xtal smilon soc te alaletic soc te snanique.

¹²Hich awaloj: Ya cac' te lec ya xc'ohat, soc hich yipal ya xc'oht ats'umbal cu'un te bin ut'il shi'al mar te ma xhu' ta ahtayel, xchi ta sc'oponel Dios.

¹³Tey way ta ahc'abal a, soc ta yohlil te bintic ay yu'un la stsabe smahtan te Esaú te sbanquil:

¹⁴ha lajunwinic (200) ta coht yantsilel tentsunetic, jtahb (20) ta coht stat tentsunetic, lajunwinic (200) ta coht yantsilel tuminchijetic, jtahb (20) ta coht stat tuminchijetic,

¹⁵lajuneb scha'winic (30) ta coht sme' camellohetic te yahtalal yalatac, cha'winic (40) ta coht wacaxetic, lajuncoht (10) torohetic, jtahb (20) ta coht yantsilel burrohetic, soc lajuncoht (10) stat burrohetic.

¹⁶La yac'ticlambe ta sc'ab te a'batetic yu'un, parte la yac' ta jujutsohb, soc hich la yalbe te a'batetic yu'un: Nahilijanic bahel, namts'ac me xawil abahic bahel jujutsohb, xchi.

¹⁷Soc hich la yalbe te mach'a ya xnahilij bahel: Te c'alal yac ata ta be te jbanquil Esaú, teme ya sjoc'obat: ¿Mach'a yu'unat? ¿Banti ya xbahat? soc ¿mach'a yu'un te bin amacoj ta behel? teme xchihe,

¹⁸hich me xawalbe: Ha mahtanil te ticombil tal yu'un te awa'bat Jacob ta stojol te cajwal Esaú; soc yac ta talel ta jpatcotic, xchihat me, xchi te Jacob.

¹⁹Soc ha nix hich la spas bahel ta mandar te scha'tsohb, te yoxtsohb, soc spisil mach'atic te patil ya xbahtic yu'un te tsohbotsohb, hich la yalbe: Ha nix hich xawalbeyic te Esaú te c'alal ya xc'oht atahic.

²⁰Soc ya me awalbeyic: Yac ta talel ta jpatcotic te awa'bat Jacob, xchihex me, xchi. Yu'un la snop ta yo'tan: Ya jlecubtesbe yo'tan ta scuenta te mahtanil te ya xnahilij bahel cu'un, patil ya quilbe sit yelaw; ya wan yic'on ta stojol a, xchi.

²¹Hich te mahtanil nahilij bahel yu'un, yan te Jacob tey way ta campamento ta ahc'abal.

²²Ta ahc'abal hahch te Jacob, la yic' tal schebal te yihnam, schebal te scriada soc te buluchtuhl (11) snich'nab, sohlic bahel ta uc'um Jaboc te banti ya xhu' c'axele.

²³La sticon sohlel ta uc'um soc spisil bintic ay yu'un.

²⁴Stuquel xanix hil te Jacob. Ay jtuhl winic te la stsac sba soc yalel c'alal sacub tal q'uinal.

²⁵C'alal la yil te winic te ma ba hu' yu'un ya stsal te Jacob, la smajbe scub, hich pitc'uj te sts'acawul scub te Jacob te c'alal yac stsacbel sba soc a te winique.

²⁶Hich la yal te winique: Coltayawon bahel, yu'un yaquix ta sacubel tal te q'uinale, xchi. La sjac' te Jacob: Ma ba ya jcoltayat bahel teme ma ba yac awa'bon bendición, xchi.

²⁷¿Bin abihil? xchi te winique. Jacob, xchi.

²⁸La yal te winic: Ma ba Jacob ya xhil abihil, Israel[56] ya xc'ohtix, yu'un la atsac aba soc Dios soc winiquetic, la awa'iy tsalaw, xchi.

²⁹Halbon ca'iy te abihil, xchi te Jacob. ¿Bin yu'un yac ajoc'obon jbihil? xchi te winique. Tey la ya'be bendición a.

³⁰Te Jacob la ya'be sbihilin Peniel[57] te lugar, como la yal: La jquilbe sit yelaw te Diose, pero cuxul hilon, xchi.

³¹Yac ta c'axel bahel ta Peniel a loc' tal te c'ahc'al, xcoxquinaj behen bahel yu'un te scube.

³²Ha scuentahil te snich'nab Israel ma ba ya sti'ic te sts'acawul te cub c'alal ora, yu'un la yich' majel te sts'acawul scub te Jacob.