Read Tzeltal Génesis 34 Bible Online

Génesis 34 - Tzeltal bible

Génesis 34

¹Te Dina te yantsil-al Lea, te yantsil-nich'an Jacob, baht yula'tay te yantsil-nich'nab te mach'atic nahinemic tey a.

²C'alal ilot yu'un te Siquem snich'an Hamor te heveo-winic, te jtsobaw yu'un te q'uinal tey a, way soc te Dina, hich la sbohlobtesbe sc'oblal.

³Pero jun sch'uhlel la ya'iy sba soc te Dina te yantsil-nich'an Jacob, bayel la smulan te ach'ix, soc la yutsil c'opon.

⁴Te Siquem la yalbe te Hamor te stat: C'ambon te ach'ix yu'un ya xnuhpunon soc, xchi.

⁵La ya'iy te Jacob te bohlobtesbot sc'oblal yu'un Siquem te Dina te yantsil-nich'an. Pero te bin ut'il bahemic ta yilel schansbahlam ta aquiltic a te snich'nab, mayuc bin la yal yu'un, ha to c'alal hulic talel.

⁶Te Hamor te stat Siquem tal sc'opon te Jacob.

⁷Te snich'nab Jacob suhtic tal te c'alal la ya'iyic; bayel la smel yo'tanic soc bayel ilinic yu'un, como bohlob sc'oblal Israel yu'un te way soc te yantsil-nich'an Jacob te Siquem, te ma hichuc ya sc'an pasele.

⁸Te Hamor la sc'oponlan, hich la yal: Te jnich'an Siquem bayel ya smulan te awantsil-nich'an; awocoluc, a'beya yihnamin.

⁹Ha lec te talel c'axel ya yic' sbahic te cal-jnich'antic; yac awa'botcotic awantsil-nich'anic soc yac awiq'uic te cantsil-nich'ancotique.

¹⁰Nahinanic ta cohlilcotic, ay ta atojolic te q'uinale; nahinanic, a'iyahic mambajel soc chombajel tey a, soc manahic te q'uinale, xchi.

¹¹Soc te Siquem hich la yalbe te stat te Dina soc te sbanquiltac: Ayuc lec ya xc'ohon ta asitic, ya ca'beyex biluc yac ac'ambonic.

¹²Ya ca'beyex jayeb yac ac'ambonic stojol soc jayeb mahtaniletic, pero a'bon quihnamin te ach'ixe, xchi.

¹³Pero te snich'nab Jacob la sjac'beyic sc'op ta scuenta lo'loyel te Siquem soc te Hamor te stat, yu'un te bohlobtesbot sc'oblal te Dina te yihts'inique.

¹⁴Hich la yalbeyic: Ma xhu' te hich ya jpascotic, te ya ca'becotic te quihts'incotic te winic te ma ba yich'oj circuncisión,[60] yu'un ha ihlaybil cu'uncotic.

¹⁵Pero ya xhu' ya jpascotic teme hich yac apasic: teme pajal ya xc'ohotic, ha te ya yich'ic circuncisión spisil winiquetic ta awohlilic.

¹⁶Ha to ya ca'beyex te cantsilelcotic, soc ya quic'beyexcotic te awantsilelique. Hich ya xnahinotcotic ta awohlilic soc junax ya xc'ohotic a.

¹⁷Yan teme ma xac'an xach'uhunic te yac awich'ic circuncisión, ya quic'cotic bahel te quihts'incotic, ya xbohotcotic soc, xchi.

¹⁸Lec la ya'iyic te Hamor soc Siquem te snich'an Hamor te bin halbotic.

¹⁹Te querem ora la spas, como bayel smulanej te yantsil-nich'an Jacob. C'ax hich ich'bil ta cuenta a te querem te bin ut'il yantic ay ta sna te state.

²⁰Ha yu'un te Hamor soc te Siquem talic ta yochibal te pueblo, la sc'oponic te slumalic, hich la yalbeyic:

²¹Te winiquetic ini lamal yo'tanic soc te ho'otique. Ac'a nahinicuc li'i soc ac'a ya'iyic mambajel chombajel, como muc' te q'uinale; ya quic'betic te yantsil-nich'nabic, soc ya ca'betic yic'botic te cantsil-nich'nabtique.

²²Pero ha nax ya sjoquinotic ta nahinel te winiquetic ini yu'un junax jlumaltic ya xc'ohotic soc, teme ya yich'ic circuncisión spisil winiquetic ta cohliltic, hich te bin ut'il yich'ojic circuncisión.

²³Ha cu'untic ya xc'oht te schansbahlamic, sbiluquic soc yantic schansbahlamic. Ha lec ya jchap jc'optic soc, hich ya xnahinic ta cohliltic a, xchihic.

²⁴Spisil te mach'atic ya xloq'uic bahel ta yochibal te pueblo[61] la sch'uhumbeyic sc'op te Hamor soc te Siquem, la yich'ic circuncisión spisil winiquetic.

²⁵Ta yoxebal c'ahc'al yich'belic circuncisión a, yorahil sc'ahc'ubenal a te yehchenic, te cheb snich'nab Jacob, ha te Simeón soc Leví, te sbanquiltac Dina, jujutuhl la stsac te espada yu'unic, baht smilic te pueblo c'alal ma ba sna'ojic a, hich la smilic spisil te winiquetique.

²⁶La smilic ta espada te Hamor soc te Siquem; la yiq'uic loq'uel ta sna Siquem te Dina, bahtic soc.

²⁷Te snich'nab Jacob c'axic ta yohlil te mach'atic lajemic, la spojbeyic bahel te biluquetic yu'un te pueblo, ta scaj te la sbohlobtesbeyic sc'oblal te yihts'inique.

²⁸La yich'beyic bahel stuminchijic, swacaxic, sburrohic, te bintic ay ta pueblo yu'unic soc ta sq'uinalic,

²⁹soc spisil bintic ay yu'unic; la yiq'uic bahel te alaletic soc antsetic, la yelc'ambeyic bahel spisil te bintic ay ta snahic.

³⁰Ha yu'un te Jacob hich la yalbe te Simeón soc Leví: Ha'ex ta acuentahic te ay jwocol yu'un te la awaq'uic te ihlaybil c'ohon ta stojol te cananeohetic soc te ferezeohetic te nahinemic li' ta q'uinal ini. Te bin ut'il mayuc tsobol winiquetic cu'un, ya me stsob tal sbahic yu'un ya scontrahinonic, ya me slajinonic soc spisil mach'atic ay cu'un ta jna, xchi.

³¹Pero la sjaq'uic: ¿Yu'un bal lec te bin la spasbe te quihts'incotic hich te bin ut'il j'antsinel-ants? xchihic yu'un.